قصص حكايتنا

الفصل الاول

القصة الثالثة من قصص #حكايتنا
#قلبي_معي

الفصل الاول

علاء وهو حاضني زين .. واخيرا تميتي مرتي اخيرا تميتي حلالي
انا وزدت حضنته .. صبرنا ونلنا الحمدلله 
علاء بعدني شوي عليه وباس جبيني بوسة طولت شوي .. هيا يا عمري غيري وتوضي نصلو ركعتين لربي يبارك في زواجنا
انا.. حاضر

خذا علاء بيجامته وطلع والحمدلله الڤيلو ساهل تحويلته رغم سنين اللي بيني وبين علاء لكن مازالت نتحشم منه حولت الڤيلو وعلقته وخشيت لحمام الدار توضيت ولبست روب دخلتي ولبست عليه ملاية الصلاة وفتحت باب الدار بيش يعرف علاء اني كملت شوي وخش عليا صلينا وحط ايده على راسي ودعاء
دعاء الزواج وبعدها خذاني في حضنه ومنها بدينا حياتنا باول حاجة يديرها اي اثنين تزوجو وبالذات نا وعلاء قصتنا قصة

اسمي ولاء عمر عمري 24 سنة خريجة علوم تخصص احياء تخرجت وماحصلتش شغل عيلتنا حالتها المادية عادي يعني مقضينها بالرواتب ماما سميحة معلمة وبابا موظف وخوي اللي اكبر مني  بخمسة سنين ايهاب هذا وين تزوج معاي  ومرته اسمها يسرا وخواتي اثنين كبار ميرا وليلى متزوجات وبعيالهن ومازال عندي اخ اسامة واخت اصغر مني زينة 
علاقتي بعلاء قديمة حبيته من لما كنت في اعدادي لانه كان يجي لمدرستنا يروح باخته ولما خشيت ثالثة اعدادي كلمني وبدت علاقتنا واستمرت ومع اني كنت صغيرة الا اني حبيته واجد وكل ماكبرت كل ماحبي له يكبر وعلاء يبادل فيا نفس الشعور كان نعم الحبيب والسند ليا  والحمدلله ماقدر واحد يخش بينا

علاء اكبر مني بي ست سنوات وكمل قراية خريج اقتصاد قسم محاسبة واشتغل في مصرف وقعد يلم القرش على القرش وبنى شقة صغيرة فوق هله لانه هو الكبير في عيلته وعنده اخ اخر وثلاث خوات اثنين متزوجات بدري وهنا صغار ووحدة مخطوبة اللي زي عمري وباته موظف في نفس عمل بابا وامه ربة بيت والحق انها ماتحبنيش ودارت واجد بيش علاء يسبني لكن حبه ليا اكبر من كل شئ وقدر يقنع امه بيا واخيرا بعد عشر سنوات علاقة اتوج حبنا بالزواج بحلال ربي

نا شكلي عادي يعني مافيشي حاجة مميزة عيون بنية وكبيرة وبشرتي قمحية فاتحة وشعري عادي غير طويل لنهاية خصري لازم من السشوار بيش ينفرد لونه قهوي باهت ونصبخ فيه بيش يعطي لمعة بنفس لونه الطبيعي ومش طويلة ولاقصيرة وجسمي رشيق عشان مهتمة بروحي لبسي بسيط مانحبش التكلف في لبسي
علاء شكله حلو وجسم انيق ومش طويل واجد عيونه بنيات زيي صغار شوي وشعرته سودا تهبل ولحيته خيال وبشرة قمحية داكنة شوي ولبسه انيق وبحكم انه يشتغل في مصرف فلازم لبسه يكون انيق ورسمي وممكن اكثر راجل شفته يلبس سروال قماش وقميص ويطلع خيال بيهن او ممكن من كثر حبي له كل شئ نشوف فيه عليه حلو

وبعد ايام من فرحنا مشينا لمصر لشرم الشيخ لان يا دوب كانت ميزانية علاء تسمح بي اسبوع في مصر واستمتعنا بيه واجد ورجعنا لليبيا ولحياتنا العادية الروتينية المعتادة زي اي عيلة ليبية نفطر راجلي ويعدي لشغله نبرم على شقتي ونضمها وننزل شوي تحت رغم ان عمتي تعامل فيا بجفاف لكن هيا ام حبيبي غصب عني نتحملها وصبيتي عادي رغم انها تنفخ فيهن ليا بكلامها خطيبي قال وخطيبي جاب بالذات ان خطيبها حالته المادية مرتاحة بكل وتقهر فيا ماتقولش راجلي هذا خوها وبعدها نركب نحط الغذاء عالنار ونقعد نستنى في علاء ويروح نتغذا نا وياه ونضم حوسة الغذاء وبعدها نقيلو ونوعو بعد العصر يا نطلع نا وياه انديرو برمة بالسيارة يا ننزلو تحت نكسدو عندهم ويوم الخميس نمشو لهلي نتعشو عندهم ونروحو وكل ليلة مع علاء حلوة يعبرلي عن حب سنين ماقدرناش نعبرو عليه غير بالكلام
وتوالت علينا الايام وسكرنا شهرين زواج واموري نا وعلاء مية المية وحتى امه حسيتها بدت تتقبل فيا ورغم اني كنت انكابر ونقول عادي مايهمنيش رضاها نعاملها باصلي ونتحملها لانها ام راجلي وخلاص لكن  لما حسيت بيها تقبلتني ارتحت واجد 

وبعد شهرين من زواجنا حصلي علاء عمل في مدرسة خاصة لعميل جاه في المصرف وسمعه يحكي انه يدور في مدرسين فكلمه علاء عليا وبديت انداوم وفترة دوامي الصبح يحطني علاء في المدرسة ويمشي للمصرف ويجي يروح بيا ومشت حياتنا امورها تمام وخطب سلفي سفيان اللي اصغر من علاء بنية في المصرف تخدم مع علاء والحق شكلها طيوبة وقعدنا نجهزو لفرحهم اللي كان بعد شهرين ومشن الايام عادي لكن سؤال مادرتيش حاجة عقدني تقول ليا سنين متزوجة مش اربعة شهور وتزوج سلفي والفرح كان حلو بس طبعا اقل تكلفة من فرحنا لان سلفي حاجات واجد استغنى عليهن عشان يقعدن معاه فلوس اكثر بيش يطلع بيه بعد الفرح لتركيا
وعدى سلفي وقعدنا ايام حايسين وحسيت بتباعد علاء عليا واستغربته ولما كثر التباعد قررت نسئله لان الامور هذي لازم اناقشوها مانسكتوش عليها وليلة لبست روب جديد شريته في فترة فرح سلفي وعاودت الحنة اللي طارت من الغسل وسشورت شعري وحطيت شوي رتوش وعطرت روحي وبخرت شقتي وجهزت قعدة حلوة لينا وروح علاء وحسيت بفرحته لما شافني هكي وبعد حضن حلو وبوسة كبيرة وقبل ما نمشي معاه لدنيتنا الحلوة وننسى اللي شاغلني ونا مازالت في حضنه ويبوس في كتفي

انا.. حبيبي
علاء بصوت هادي .. نعم
انا .. بنحكي معاك موضوع مهم
علاء نهض روحه وعدل قعدته .. ان شاءالله خير
انا .. مش نحن متفقين اننا ماندسوش حاجة على بعض مهما كانت
علاء .. اكيد
انا .. حبيبي ليش حسيتك الشهر هذا متباعد عليا واجد انت عارف ان ليك قريب اسبوعين ماقربتنيش حتى حضن تحضني شوي ولما نرقد نلقى روحي بعيدة عليك راقدة
علاء .. نقولك بس ماتزعليش
انا.. اكيد لا  لان لو بنزعل ماكنتش فتحت الموضوع هذا
علاء.. انتي قصرتي معاي يا عمري
انا باستغراب .. كيف قصرت مافهمتش
علاء.. معاش تلبسي زي تو ترقدي احذاي بلبستك اللي اطيبي بيها وتقضي نهارك كله بيها معاش تعطرتي ليا زي قبل نا من يوم عرفتك وانتي تهتمي بروحك ونا نحب الصفة هذي فيك وفجاءة لقيتك اهملتي روحك تقول لينا سنين وسنين متزوجين مش في حسبة مازالنا عرسان
انا وفعلا فطنت لروحي شنو كنت اندير وكيف بطلت نهتم بروحي.. الحق من التعب وضيق الوقت المدرسة الصبح ومعاها باقي النهار لوطى نعاون فيهم ونروح باطلة ماعاد عندي جهد لشئ
علاء.. حبيبي نا ما طلبت منك تشتغلي ولو الشغل تعب ليك سيبيه نا لما حصلت ليك الشغل قلت تلهي فيه بدل ما تقعدي بروحك بالذات اذا تزوجت روان بتكسدي رسمي ومساعدتك لهلي انتي مش مجبورة بيها اذا بسببها بتقصري  معاي وقدرتي تعاونيهم شوي وتركبي لحوشك ولي صح ياقلبي
انا وبسته على خده .. صح عندك حق بس معقولة تهملني بسبب اني قصرت معاك شوي امنا كان نمرض او تتعب صحتي او نحمل ومنظري يقعد شين يعني بتباعد عليا زي تو
علاء وحضني .. لا يا عمري لو قصرتي معاي بسبب انك مريضة او تاعبة صحتك كنت نا اللي نهتم بيك وندير بالي عليك وعلى حوشنا ومانخليك تستحقي حد لكن انتي اهملتيني بسبب الناس نا مانبيش هك نا نسامحك انك تهمليني في حالة وحدة بس
انا .. شنو هي
علاء .. انك تنشغلي عليا بولد او بنت ليا منك
انا.. ربي يحفظك لي وعندك حق معاش نعاودها
علاء.. وتو نقدر نكمل اللي بديت فيه
انا وزدت خشيت في حضنه وهزيت راسي
#حياة

الجاهل عدو نفسه فكيف يكون صديق غيره  
مراجعة وتعديل اخطاء املائية وحواراية زي العادة لصديقتي الغالية #الصابرة