قصص حكايتنا

الفصل الثاني

عذرا على التاخير النت عندي ضعيف بكل

#انا_وسلفتي_وضرتي

الفصل الثاني

ليلى
روحنا مليانين سعادة وخشيت على عمتي خبرتها وقعدت تزغرد وفرحت ليا واجد وحتى من عمي خش على زغاريدها نين تحشمت وركبنا شقتنا
واتصلت بخولة وخواتي وفرحن ليا واجد الحق وامي مادورتها لان مايفرقش معاها
ومشن ايام حملي بخير نمشي للجامعة يرفع فيا خالد ويروح بيا وطبعا صارن مشاكل واجد بين سلفتي وسلفي على موضوع المعاينة وحتى كلمة مبارك ماسمعتها منها وعلى حسب ماحكى ليا خالد انهم يعاينو والدكاترة قالو مافيهم شئ ويوم مكسدة نستنى في خالد وخولة تستنى معاي

خولة .. معقولة ماقالت لك مبارك حتى بالكذب
انا.. والله زي مانقولك ولما ننزل لوطى لعمتي وهيا تحت تركب
خولة ..عليك غيرة واضحة
انا.. شكلها هك مع اني مش عارفة ليش تي هيا اجمل مني بواجد
خولة .. يابنتي مش كل شئ الجمال ياما من كناين شكلهن مش حلو بكل لكن تلقيها محبوبة بين عربها مع انك يا ليو مش شينة وبالذات الحمل محليك
انا.. عيونك الحلوات وعشان تحبيني تشوفي فيا هك
خولة .. لا والله
انا قصيت عليها .. استني محمد يرن عليا ان شاءالله خير ... الو السلام عليكم
محمد.. وعليكم السلام اطلعي يا ليلى نستنى فيك برا
انا باستغراب .. ان شاءالله خير
محمد.. خير طمني بالك غير خالد جتهم لجنة فجأة وقالي نروح بيك
انا .. اه هيا طالعة
محمد .. تمام تلقيني قدام الباب
خولة .. محمد جاي بيروح بيك
انا.. اه خالد مشغول متصل بيه يروح بيا واكيد اريام معاه ربي يعيني عليها
خولة .. الحمدلله مش معاك في الجامعة هذي
انا.. اه نحمد في ربي ان تخصصها مختلف تصدقي هيا مش قد الطب لكن خشتله بس عشان تتباهى بيه
خولة .. مع انك انتي لو خشيتيه كنتي فعلا تفوقتي فيه
انا .. مانكذب عليك نبي تخصص اربع سنين ونكمل لان لولا خالد ماكملت ومانبي نقصر معاه
خولة .. ربي يعطيك على قد نيتك
انا.. هيا سلام قبل ماتفتح هذيك فمها عليا
خولة .. سلام

*وطلعت ليلى ولقت محمد بروحه واستغربت وارتاحت في نفس الوقت *

ليلى .. السلام عليكم
محمد .. عليكم السلام
ليلى .. معليش عطلت عليك
محمد.. لا عادي مش واجد عطلتي
ليلى .. اريام وين امنا
محمد .. اليوم مامشتش للجامعة قالت ماعندي شئ
ليلى .. اه

*وكملت الطريق عادي يحكو بالعموم ووصلت ليلى وخشت زي العادة سلمت على عمتها وركبت شقتها لكن سمعت صوت اريام عالي وشكلها تتعارك مع محمد *

محمد بعصبية .. بنفهم تو شنو اللي معصبك بس
اريام .. كيف تروح بيها بروحك
محمد .. يا سلام (وبسهوكة ) عندك حق كنت روحت حتى بصاحبتها معاها انتي فيش تخرطي
اريام وصوتها علي .. انا مانبيهاش تركب معاك بروحك كنت جيت خذيتني بعدين مشيت روحت بيها
محمد وهو مش مصدق فيش تقول .. قصدك نا نسيب مرت خوي الحامل تقعد مادة وجهها نين سيادتك امتى تلبسي وتفتلكي وبعدها نمشي للجامعة لا اكيد مش طبيعية انتي
اريام وايديها في وسطها .. لا نا صح راجلي وحقي نغير عليه
محمد قعد يبحث فيها من فوق للوطى وماردش عليها
اريام .. اه سكتت شفت عشان عندي حق
محمد.. كلمة زيادة وحوش هلك بابه مفتوح نا شكلي سكتت ليك اكثر من اللازم (وبضحكة هزوة )تغير عليا قال
اريام .. شنو مش مصدقني
محمد.. اللي تغير على راجلها من وحدة تشوف شنو عندها واديره لراجلها بيش ما يشوف لغيرها مع ان ليلى اقل منك جمال لكن اخلاق يشهد عليهن ربي ولعلمك وركزي عليها كويس كلامك هذا لو يتعاود من جديد معاش فيها ناخذ ونعطي معاك في الكلام لا يا ماما حوش هلك طول هذي مرت خوي شقيقي ماليا غيره ولو قالي كل يوم نروح بيها حندير هك (وبصوت عالي ) فاهمة والله نعاوده
اريام بصوت واطي ... فاهمة