قصص حكايتنا

الفصل الرابع

#قلبي_معي

الفصل الرابع

الدكتور .. الحمدلله ماطلع شئ في الصورة حاليا السبب اكيد نفسي
انا باستغراب.. نفسي
الدكتور.. اكيد هذا السبب هو كان بينكم خلاف او مشكلة
انا .. لا كانت امورنا على احسن مايكون
الدكتور .. غريبة لان عادتا لما تصير حاجة كيف هذي والمريض ينسى شخص معين او فترة معينة تكون يا اصعب فترة مرت عليه يا الشخص بينه وبين المريض خلافات واجد
انا ودمعة نزلت .. والله ماكان بينا حاجة
ايهاب .. اهدي يا خيتي البكا مش حيفيد تو
عمي .. به والحل شنو
الدكتور .. انه ينعرض على دكتور نفسي وزوجته تكون بعيدة عليه
عمي بحمق .. اين تكون بعيدة عليه نا ما نعرفش الكلام هذا نعرف الولية مع راجلها ولما تكون قدامه تو يذكرها والدكتور تو اندورو دكتور والله اذا انت تعرف عطينا اسم نرفعوه ليه بعد ماتبدا صحته كويسة
الدكتور .. ديرو اللي يريحكم وحاضر حنعطيكم اسم دكتور نفسي كويس نعرفه واصلا هو اللي اكد ليا حالة علاء
عمي .. تمام تسلم يا دكتور
الدكتور .. هذا واجبنا

وعدى الدكتور وسيبنا ونا نتخبط مشكلة شنو اللي بينا ونحن كانت امورنا تمام التمام وعندي كأن الدكتور يكذب عليا ومافطنتش الا بي ايهاب يهز فيا

ايهاب .. ولاء وين رحتي عمك يكلم فيك
انا .. نعم يا عمي
عمي .. الدكتور قال ان علاء مازال يبي عشرة ايام ثانية في المستشفى بيش يعطوه خروج يوم اللي يروح تكوني في شقتك والايام هذين قضيهن في حوش هلك حتى تروقي شوي وخلي الباقي على ربي ونا متأكد انه طالما بتكوني في وجه مستحيل ينساك وحيذكرك صدقيني يا بنتي
انا وثقتي بدت تهتز .. يستر الله يا عمي

وروحت نا وايهاب بدون ما نشوف حبيبي ونبض قلبي معقولة كل شئ ينتهي بسهولة هكي كيف ينساني نا عقلي مش مستوعب

وصلت نا وايهاب ونا مش مهزوزة من جواي لا حاجة اكبر من هكي احساسي مش عارفة شنو هو وصلت لحوش اهلي وخشيت لدارنا بتاعتي نا وخواتي تمددت ونا مش عارفة حياتي وين بتمشي وخليت ايهاب يحكي لاهلي شنو صار

ومشن العشرة ايام ونا نتصل بس نطمن عليه واتصل بيا عمي وقالي نروح وفعلا روحت لكن نكذب كان نقوللكم بشنو حاسة روحت بدري وبرمت على شقتي رغم اني عارفة ان علاء واعرات عليه الدروج ومع ذلك شقتي لازم تبي برمة
وبعدها غيرت دبشي ونزلت نعول معاهن لان اكيد الناس حتكب عليهم بالذات عمتي ماشاءالله قديش رجليها طوال
وروح علاء ويا دوب سلمنا عليه وسلم عليا عادي كشخص غريب ومش عارفة شنو اللي صاير او الاحساس اللي حسيت بيه مش قادرة نوصفه وطبعا روان كانت وصلت اليومين اللي فاتو لان العشية لقيتها جاية وفي نظرة عيونها نظرة شماتة مافهمتش ليش او عليش هالنظرة عمتي اللي ما كانت طايقتني على الاقل تنظر ليا بشفقة واني واجعتها ورغم ان النظرات هذين يقتلن فيا لكن قاعدات اهون من الشماتة اللي مش عارفة ليش