قصص حكايتنا

الفصل السادس

#انا_وسلفتي_وضرتي

الفصل السادس

ركب محمد الشقة بعد مامشى لمحلات الاثاث واختار دار وبيجبوها ثاني يوم وفتح الباب وحس بشعور غريب وبرم في الشقة كلها وقديش شكلها مرتب ومتناسق ونظيفة غير غبار على الاثاث بس رغم انه مغطي كله قعد محمد يحول في الانسولات اللي مغطيات الاثاث وبعدها فتح دار شهد وحس انها كبرت عليها وتبي دار جديدة وخش لدار النوم وحس بشعور غريب ومشى شور الزيانة ولقى شيشة عطر فتحها وعرف انه عطر ليلى اللي من لما مات خالد معاش شمه عليها وفتح الدولاب ولقى دبش خالد قاعد مرتب وحس بغصة بسرعة ما اختفت بمجرد مافتح دولاب ليلى وقعد يتفرج على الارواب وفساتينها القصيرة والعريانة 

محمد
عنده حق خوي كان مايفارقش فيها اذا هي لما تنزل تحت لبسها ديمة حلو رغم سترته وهي ادس في الخير كله لخوي

وقعد محمد يتخيل في ليلى بدبشها اللي يشوف فيه على رنة فونه ولقاها ليلى

محمد.. اهلين
ليلى باحراج .. معليش يا محمد انت خشيت للشقة او لا
محمد ومش عارف ليش قلت ليها هك .. لا مازال قاعد كيف درست السيارة كنت في محل الاثاث وبكرة بيجيبو دار النوم الجديدة كنه في حاجة
ليلى .. اه ياريت تخلي عمتي غالية تلم دبشي قاعد في الدولاب
محمد بمكر .. كيف انتي مش شلتي دبشك كله
ليلى باحراج .. ماهو ماهو في دبش مانقدرش نلبسه قدام خوتي فخليته (وبتطلع من الاحراج بسرعة ) حتى دبش المرحوم قاعد كله نا ماقدرتش اندير فيه شئ حتى هو خلي عمتي اتلمه وكان تعرف حد مستحق تعطيه له انت عارف المرحوم كيف محافظ على دبشه كانه جديد
محمد.. تم خلاص تو نخلي امي تلم الدبش في حاجة اخرى
ليلى .. لا شكرا هذا بس وزي ماقلت لك اي حاجة تبي تغيرها براحتك اصرف كأنها شقتك
محمد.. ان شاءالله
ليلى .. سلام
محمد.. سلام

محمد
مش عارف ليش مابيتش نقول لها اني في الشقة ممكن لاني نبي نشوف ليا نا شنو تلبس مش عارف
المهم كملت برمتي في الشقة ولقيت ان دار شهد تبي التغيير والصالون حسيته موديله قديم لكن قلت خليه تجي تغيره بذوقها وطلعت ونزلت لامي وقضتها على دبش ليلى وحياة خالد وخليت لها المفتاح

مصطفى .. تو نا فهمت دار النوم ليش بتغيرها وشهد هذي مافيهاش كلام ولاشك بحبك ليها لكن الصالون استغربتك الحق
محمد.. وشنو فيها لاني حتى لو سيبتها هي بتقعد مسؤلة مني يعني
مصطفى .. تي انت مايطلع منك القرش الا بعد وين ووين بتقنعني انك هك يعني مافيش مقابل
محمد.. ماهي بتكون مراتي
مصطفى .. محمد انت حاسس بالذنب عشان انت بتتزوج ليلى لغرض بس صح
محمد .. مش عارف لكن والله مانكذب عليك نا صليت استخارة وحاسس اني مرتاح رغم خبث نيتي
مصطفى .. الله اعلم بلي مكتوب يا رفيقي

وجاء ثاني يوم وفكو دار وركبو دار وحتى دار شهد ركبت لها دار جديدة والقدم خلاهن مفككات في المخزن نين يشوف ليلى شنو بدير بيهن وجاب بضاعة للشقة ومانقصها شئ
اما ليلى طبعا خولة معاها طلعن شرن مع بعضهن دبش وحاجات ناقصاتها وعدت دارت برمة على روحها زي اي عروس