قصص حكايتنا

الفصل الثاني

#قلبي_معي

الفصل الثاني

مرن ستة شهور على زواجنا وكانن من اجمل الايام علينا واليوم العشية درت كيكة ونزلت بيها عشان حتى سلفتي جاية لانها ماتسكنش حذانا والحق رغم انها طيوبة لكن شادة روحها و عمتي تهتم بيها اكثر مني وروان صبيتي معاش تعدل عليا لما تجي سلفتي لكن نكبر في عقلي عليهن ونقول مازالن طاهقات بيها و المهم عندي علاء ويكفي
ونزلت وبعد السلام والسهراية العادية  

سلمى ..بنقولك عمتي
عمتي .. نعم
سلمى .. باركيلي نا حامل
عمتي بفرحة .. ماشاءالله الف مبارك يا بنتي وربي يكملك على خير وبسرعة تبارك الرحمن مش زي ناس
انا ماعدلتش على كلمتها الاخيرة .. الف مبارك يا سلفتي وربي يكملك على خير وديري بالك على روحك
سلمى .. الله يبارك فيك والفال ليك يارب
انا.. امين
روان .. صح يا ولاء ليش لتو ماحملتيش شنو دايرة مانع
انا.. لا مش دايرة شئ لكن ماسخرش ربي
عمتي .. وليش ماعاينتو ساكتة لتو
انا.. عادي يا عمتي مازال بدري على المعاينة
عمتي بشهقة .. بدري شنو وانتي قريب تسكري الخمسة وعشرين
انا باستغراب .. وحتى كان سكرتهن نا مش كبيرة للدرجة هذي ولما قصدت مازال بدري على قديش لينا متزوجين مش العمر
عمتي ببرود .. امنا ليش سلفتك اللي عمرها اثنين وعشرين حملت بسرعة اهو كيف كملت الشهرين 
انا .. لاحول ولاقوة الا بالله واستغفر الله العظيم معقولة ياعمتي هذا كلام ينقال
عمتي بعصبية .. شنو تشوفي فيا انجنيت عشان تستغفري في وجهي
انا بارتباك .. لا والله حشاك يا عمتي قصدي استغفرت انك معترضة على حكم ربي
عمتي وعلي صوتها .. نا معترضة على حكم ربي بتكفريني تو والله بديري روحك شيخة عليا
انا ومعاش عرفت شنو نقول ودمعة خانتني ونزلت .. والله ماقصدي حاجة

وقعدت عمتي تلعلع ونا قعدت نرعش وحتى من سلمى وجهها تغير على خشة علاء وشافني نبكي ونرعش مع بعضي وصوت عمتي عالي وتحكي بعصبية

عمتي .. تعال يا ولد بطني تعال يا اول فرحتي شوف مرتك شنو طلعتني تستغفر في وجهي اللي ماتتحشم وطلعتني كافرة
انا من بين دموعي .. والله ماقصدت هك ياعلاء والله ما قلت هك
علاء بهدوء وهذي طبيعته صعب انه يتعصب  .. اركبي يا ولاء
انا وزادن دموعي ورعشتي .. انا والله عمتي فهمتني غلط
عمتي وبعصبية اكبر .. شوف ها اسمعت معاها بطلعني حمارة
انا.. لا والله ماقصدي هكي ياعمتـــ...
علاء.. قلت اركبي يا ولاء فوق معاش بنعاود كلامي

هزيت راسي وتحسبت ربي في سري وركبت لشقتي وخشيت ببكا وجسم يرعش مع بعضه توضيت وصليت ركعتين لربي يهدي بالي ودعيت ليه ان علاء يفهم قصدي ومايحكم عليا زي امه وسلمت من صلاتي وقمعزت نستنى فيه ودموعي مابنش يوقفن صح الموضوع مش مستاهل لكن نا جيت من عيلة رغم بساطتها الا باتي ربانا ان نحسنو الظن بالناس مهما كانت نوايهم وكان النقاش الهادي والاستفسار قبل مانحكمو على حد من طبعنا عيلتنا هادية محبة وباتي عمره ماصوته علي على حد فينا حتى لما نغلطو كان ياخذ فينا بالنصح والعقاب احيانا على خشة علاء صبيت ونا نرعش