#انا_وسلفتي_وضرتي
الفصل الاول
ليلى
تزوجت ليا سنة ومعاي سلفة ومارزقنيش لا نا ولاسلفتي بعيال وبالنسبة ليا متفقة نا وراجلي ان مانعينوش نين نسكرو سنة
وعدت سنة من عمري كل يوم مع خالد عروس بمعنى الكلمة ولله الحمد وحياتنا هادية واحتفلنا بذكرى زواجنا وحجز خالد شاليه في قرية ودارلي جو يهبل وجابلي سلسلة ذهب هدية يهبل ذوقه حلو بكل وبعد يومين روحنا قضيتهن زي الشهد
عمتي غالية .. ها يا ليلى غيرتو جو
انا.. اكيد ياعمتي ربي يباركلي في خالد دار اللي في خاطري وزيادة
عمتي غالية .. ربي يحفظه من يومه مرضي وجاته ولية كيف مايبي مش زي ناس وزي مايقولو على نوايكم ترزقون
انا.. الحمدلله يا عمتي شكلي دايرة حاجة حلوة عشان ربي جازني براجل زيه
على خشت سلفتي اريام ووجها واضح انها مضايقة وسلمت سلام بارد
اريام .. قالو كنتو في شاليه اليومين اللي فاتن
انا.. اه احتفلنا بذكرى زواجنا الاولى ان شاءالله العمر كله يارب حتى انتي زيي
اريام .. اه زيك بالتاريخ بس نا اللي عندي قال حرام
عمتي .. حرام شنو يا بنتي غير يتسبل بس
انا وبحتت في عمتي بمعنى ماتزيدي النار .. عادي يا اريام مرات نسى ولما انحرج قالك هك
اريام .. بختي وعارفاته
خالد وهو خاش .. السلام عليكم
نحن ردينا السلام
خالد.. كنه بختك يا مرت خوي والله محمد ماشاءالله غير عصبي شوي وانتي ماتهديش فيه
اريام .. به كيف نسكت وهو يفور في الاعصاب
خالد بهدوء .. مش هك يا اريام التعامل العصبي خليه يطلع فورة عصبيته وبعد ما يهدا ناقشيه بالراحة مش عصبي وانتي تزيدي في النار بدل ماتهديه
اريام بعدم اقتناع .. يستر الله
اريام عبد الرحمن سلفتي مرات سلفي الاصغر من راجلي تزوجت معاي واصغر مني عمرها 17 سنة سمحة ماشاءالله عليها جسم متناسق وطول يهبل وشعر لاقوة الا بالله عيون ملونة عسلية فاتحة وشعر قسطلي ناعم وغمزات لكن الاسلوب واخذ اجازة اذا مش عطلة طويلة
محمد خش بضحكة .. طالما مجتمعين هك معناها نا سبب قرمتكم
عمتي .. كلا من ناحية نقرمو نش بالله نقرمو وفيك هذا شئ اكيد
محمد ضحك والتفت لخالد .. شنو جو مشيتكم ان شاءالله قضيتو وقت حلو
خالد .. الحمدلله
وصبا خالد وكر محمد معاه وعدو شور المربوعة
خالد.. ليش قلت لي مرتك الاحتفال بذكرى زواجكم حرام وانت يا معفن ماليكش اسبوعين محتفل معانا بعيد ميلاد وئام ولد اختك زينب
محمد.. بالله اسكت يا خالد خليني في قهرتي
خالد.. اسماله الكريم قهرت شنو
محمد.. تو انت لما احتفلت انت وليلى وين عديتو وشنو درتو ومن رفعتو
خالد.. حجزت شاليه يومين وحجزت تورتة واتفقت مع ادارة القرية انها ادير اجواء العاب نارية واضاءة بحذا الشاليه بتاعنا وطلبت عشاء سمح وقضيت نا وياها احلى جو وجبت خاتم ذهب هدية وهي جابتلي ساعة ليا فترة اندور عليها وهي وصت عليها توصية ومن رفعنا معانا كيف تجي نرفعو معانا حد هذا ذكرى زواجنا نحن يعني حاجة خاصة
محمد.. هها هنا وين حطنا الجمال قلتها بروحك ذكرى زواجكم يعني حاجة خاصة كيف نا بنحتفل بذكرى زواجي ونا معاي نسباتي كلهم وبما فيهم خواتها المتزوجات برجالتهن وعيالهن تخيل
خالد باستغراب .. مافهمتش
محمد.. قلت ليها انديرو زيكم بس نحجزو في قرية ثانية وفرحت والامور تمام وحتى نا بنسق زيك بنحجز تورتة وعشاء حلو مانبيش حتى انتعبها في حاجة وموفر ميزانية باننا بنقعدو ثلاثة ايام ووكالنا كله من برا ونا بنتصل بناكد على الحجز سمعتها تحكي مع اختها تعزم فيها وتقوللها قولي لخواتي كلهن وهلي تخيل تو هذي كيف بديرلها جو ترا
خالد .. به حاوالت تفهمها
محمد بضحكة .. ومن قال اني ماحكيتش معاها عارف شنو ردت عليا قالت هنا ثلاثة ايام معقولة بنقضوهن وجهي في وجهك فاتصلت قدامها ولغيت الحجز ولما دارت حالة قلت لها حرام الاحتفال بيه ومانيش محتفل بيه
خالد.. ماتنساش حتى صغر عمرها
محمد.. بالله فكني من قصة العمر كل ماتصير حاجة تقولولي عمر طالما وافقت على الزواج وتحمل المسؤلية معناها معاش صغيرة وعلى اساس ليلى كبيرة تو تي هيا اكبر منها بسنتين بس ومعاها الفرق اللي بينكم بالله كم
خالد.. عشر سنوات
محمد.. حسيت بالفرق بينكم
خالد.. اكيد لا لان ليلى صح صغيرة في العمر بس العقل ماشاءالله وحتى في قرايتها ماشاءالله عليها واريام مازالت صغيرة بالذات واضح ان مافيش حد يعلم فيها صح كيف تتصرف خوذها بالهدواة يا محمد والله الولية لما تسايسها تاخذ عقلها
محمد.. يستر الله
أنت تقرأ
قصص حكايتنا
Nouvellesهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
