#مطلقة_ولكن
الفصل الرابع
محمد بلهفة .. طمنا يا دكتور على قد ما وعينا فيها ما وعتش بكل
الدكتور .. اهدا يا استاذ هبوط ضغط وسكر وانهيار عصبي
محمد.. وليش هضا كله يارب وخيتي ماتستاهل
الدكتور .. بالذات في وضعها الحالي اكيد اي شئ ولو بسيط يأثر عليها وخصوصا واضح من عيونها انها كانت تمر بوضع مش تمام
محمد .. شنو قصدك بوضعها الحالي
الدكتور .. المدام حامل في الشهر الاول
محمد بصدمة لدرجة قمعز على الكرسي اللي وراه .. حاااامل
الدكتور .. كيف ماعندهاش علم
محمد بهزة راس .. لا يا دكتور
الدكتور .. اليوم لازم تقعد هنا وبكرة تقدر تطلع لكن لازم تراعو نفسيتها وتبعدو عنها كل شئ مش تمام
محمد.. يا دكتور نحن بعد عشرة ايام بنطلعو عمرة عادي سفرها
الدكتور .. لو قعدت بالوضع هذا اكيد السفر مش كويس ليها لكن لو تحسن مزاجها ان شاءالله مافيش مشكلة
محمد .. شكرا يا دكتور
واتصل محمد بسامي انه يجيه في المصحة وفعلا شوي وسامي جاه
سامي .. ان شاءالله خير كنها شوشو حسك شغلتني
محمد .. الحقني يا سامي كيف اندير
سامي بخوف .. شنو في يا احميدة
محمد بتنهيدة .. شوشو حامل يا سامي ومش عارف كيف اندير
سامي بصدمة .. حامل وراجلها بيتزوج على خاطر العيال لاحول ولاقوة الا بالله عليك دنيا غريبة صح
محمد.. شفت النصيب راجلها بيتزوج الاسبوع الجاي ومش عارف شنو بندير
سامي بهدوء .. ما ادير شئ ورد بالك تفكر تقوله نين تأخذ راي شوشو قبل راك تخبره وتندم بعدين
محمد.. والله ماني عارف
سامي .. هي اصلا ليش ماقالتش ليه لتو انها تعلم
محمد حكى ليه شنو نا قررت بندير وبعد سكوت وهدوء دام لوقت
سامي .. هذي الشامخة اللي نعرفها
محمد .. شنو قصدك
سامي .. الواثقة من روحها حتى لو تغيرت بسبب ظروفها لكن اصلها يغلب
تصدق ان شوشو حتمشي ليه يوم الفرح عشان بس تقوله انها حامل وهكي حتتنتقم ولو شوي لروحها منه بانها نكدت عليه ليلته وفي نفس الوقت بينت ليه انه خلاص معاش يفرق معاها
محمد.. ومن قال ان ليلته حتتنكد
سامي .. لان عادل يحب شوشو واجد ورغم انه تزوج عليها بس شوشو حبه الاول اللي مستحيل ينساه ومعاها تقوله انها حامل تخيل وقتها ندم عادل انه ماقدرش يصبر وحيفهم انه خسر شوشو
محمد.. نا نبي نفهم حاجة كيف انت وبشرى فاهمين شوشو واجد ونا لا
سامي .. عشان انت خوها وتحبها واجد وتشوف فيها انها انظلمت من عيلتها وخوتها وخواتها فقررت تكون ليها الكل وتعوضها عليهم فكنت مايهمكش شئ الا اذا مرتاحة والله مضايقة فرحانة او حزينة لكن نا وبشرى مركزين معاها واجد وفاهمين تفكيرها صح اطرت تتغير او الوقت جبرها تتغير لكن صدقني الاصل يغلب وشوشو بنت اصل وواثقة من روحها مش ساهل كسرتها ولو انكسرت بسرعة يجبر كسرها
محمد بتنهيدة .. ياريت يا سامي الكلام اللي تقول فيه
سامي وهو يخبط على رجل محمد كنوع من الدعم .. اطمن وصدقني حتمشي للعمرة وتجي شوشو اللي تعرفها من قبل حتى تتزوج عادل
محمد.. يارب يارب
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
