#مطلقة_ولكن
الفصل الثامن
سامي .. انك تردي للحياة من جديد شوشو انتي قريب تسكري سنة مازالن ايام بس وحتى عدتك كملتيها في شنو تستني ترا قوليلي
انا.. مش عارفة حاليا خايفة نواجه الحياة
سامي.. مش شوشو اللي نعرفها اللي تخاف من شئ هيا مش غالطة فيه
ردي يا شوشو لحياتك ولشغلك كملي واقري ماجستير والله ابدي في مشروعك اللي خاطرك ديمة بديريه مش ديمة حلمك انك تكوني رائدة اعمال وليك علامة في مجال العناية بالشعر اهو حتى فلوس عندك ونا مستعد ومحمد معاي ندعموك بلي تبيه المهم تردي شوشو اللي نعرفوها الواثقة المناضلة وراء حلمها
انا .. تعرف نسيت حلمي هذا بالذات من لما لقيت روحي اندير في البروتين وكأن هذا اخري
سامي .. معاش تفكري في الماضي تو خليك في الوقت الحاضر انتي انجليزيتك تمام التمام ابحثي في المواقع وشوفي روحك وابدي نفذي حلمك واسعي وراه والله عشان تميتي مطلقة خلاص معاش بديري شئ
انا بثقة ..صبيت لا مش عشان مطلقة لكن صح نا خذيت وقت طويل في حزني وكسرتي ووجع قلبي وتو لازم نصبي لروحي
سامي.. ايوه هذي شوشو اللي نعرفها
انا مسكت ايدين سامي .. شكرا سامو عشان انت صديقي وشكرا عشان انت صديق خوي شكرا وااااجد
وطلعت سيبت سامي ونا كلي حماس
ونشكر في ربي ان عندي ناس هك تدعمني وخشيت على محمد وبشرى بضحكة كبيرة
سامي صديق محمد من زمان قديش مش عارفة ليهم مع بعض لكن تقريبا من وقت طويل سامي امديد محمد خوي يعني اكبر مني بتسع سنوات وهو دكتور اطفال ماشاءالله سمعته كويسة في مجاله ومش متزوج لتو وماحد يعرف السبب وديمة لما نسئلوه يقول مازال ماجاش النصيب
شكله يسهف يعني جنتل جسم انيق ورشيق مش ضعيف ولا مليان وطويل شعرته مش عارفة ناعمة والله عادية لان ديمة ايدرلها في جل سودا وعنده خلقة لحية ماتفهم شئ رغم طولها لكن زايداته شموخ وفخامة مع عيون بنيات واسعات ورموش طوال وبشرة قمحية راجل تتمناه كل بنت وتقريبا خواتي كلهن تمننا يكون راجلهن ومافيش بنت في عيلتنا او عيلتهم ما عاكستاش لكن اشبح هو قلبه وين
محمد بفرحة لضحكتي ..هذي وخيتي اللي نعرفها
انا وحضنته.. ربي مايحرمني منكم يارب
محمد وزاد حضني .. شكل سامي جاء ونفذ اللي في راسه
انا.. انت الغلا والسند ليا وصحبتك كيفك ياخيي
بشرى .. احم احم نحن هنا
انا وجيت حضنتها .. تي انتي احلى حاجة دارها محمد في عمره
محمد .. خزيه بشرى بس الكويسة
انا.. لا الكويسات عندك واجد لكن بشرى اكبرهن واجملهن واحلاهن وافضلهن
محمد .. ربي يخليكن لي الاثنين
بشرى .. راه سامي بروحه قاعد
وعدى محمد ونا حاسة براحة كبيرة وجهزت مع بشرى الضيافة
بشرى .. تصدقي ان سامي طلع بدري اليوم من المصحة اللي يشتغل فيها بس عشان يجيك ويطلعك من اللي كنتي فيه
انا.. سامي هذا غلاه كبير وربي يرزقه ببنت الحلال يارب
بشرى .. امين يارب
أنت تقرأ
قصص حكايتنا
Contoهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
