قصص حكايتنا

الفصل السابع

#مطلقة_ولكن

الفصل السابع

مشن ايام وجن ايام ونا حالي قعد احسن لكن نفسيا سئ بكل لا طلعة ولاخشة على قد مادارو فيا ومافيش حاجة تفرح فيا كيف شوفت عظومي حتى عادل على قد ماجاء ماشفتاش بكل ويوم اصر عليا باتي لازم نحز القصص اللي بيني وبينه

باتي .. اسمعي يا بنتي نا مقدر حالتك والوجع اللي انتي فيه لكن لازم ماتحلي الموضوع بينك وبين راجلك
انا.. معاش راجلي يا باتي
باتي .. نا عمري ماعارضتك ومعاك في كل شئ لكن فكري بالعقل الراجل جاء وحكى معاي وقالي ان مرته قاعدة في حوش هلها ومقربهاش بكل ومستعد يدير كل شئ يرضيك المهم ترجعي ليه
امي .. تفكري يا بنتي نحن بين ناس ماترحمش البنت لابال تكون مطلقة الخشة بحساب والطلعة بحساب وحتى اللبس بحساب وقريب حتى النفس بحساب
انا.. يعني تبيني نعيش غصب عني يا امي معاه
امي .. ماهو المطلقة وضعها صعب يا بنتي في مجتمعنا هذا
باتي .. ماتعدليش على كلام امك بالنسبة ليا سوى مطلقة ولا متزوجة اوبنت انتي بنتي مايفرق عندي شئ صدقيني وعمرك ماتفكري انك تردي لعادل عشان بس تتفادي كلمة مطلقة
انا .. شكرا لانك انت باتي (والتفتت لامي) تعرفي يا امي اللي خلى المطلقة حقها مهضوم في مجتمعنا هذا هو تفكير الاهل قبل حتى الناس لو كل اهل بنتهم انفصلت على راجلها عاملوها كويس وبي احترام لكينونتها وماهمهمش اذا بنتهم مطلقة او لا كنهدا راه الناس كلها ماقدرتش تحكي عليها
لان ديمة تلقي الام في اي مجلس تحكي على بنتها يا كأنها عار عشان اطلقت يا تلقيها تسخف عليها
لكن لو كل ام والله اب او حتى اخ والله اخت لما يجيبو طاري بنتهم او اختهم المطلقة وحكو عليها بفخر واهتمام وماعدلوش على نقطة ان بنتهم اطلقت راه اللي بيقول اي كلمة يسكت عليها ومعاش يطلع اي كلام سئ عليها
امي .. كلامك صح هذا بالنسبة للهل بين الاقارب والاصحاب والجيران به اللي في الشارع واللي في العمل والصاحبات اللي يبقن خايفات على رجالتهن كيف بديري ليهن
انا .. الصاحبة اللي بتخاف على راجلها مني يبقى ماتلزمنيش صح مانقطعش علاقتي بيها لكن حتى هيا مانلومهاش لانها ماعندهاش ثقة في روحها قبل راجلها ونخلي علاقتي بيها في الحاجة الضرورية ومانختلطش براجلها بكل والافضل نخليها هي اللي تجيني مش نا اللي نمشي ليها هذا لو تهمني صاحبتي واجد لكن طالما الصاحبة فكرت فيا اني ممكن نخون ثقتها وناخذ راجلها يبقى زي ماقلت ماتلزمنيش
وبالنسبة للعمل
محمد خش .. والعمل لما تكون هيا محترمة في لبسها وكلامها وتعاملها بحدود مع الجنس الاخر وحتى مع الكل الكل حيحترمها ومايذكرهاش الا بالخير ومايمنعش ان طلاقها حيعرضها لمواقف بايخة لكن فرض الاحترام حيرد اي حد عند حده حتى لو بعد وقت 
باتي .. كلامكم الاثنين عين العقل فهمتي يا حاجة والله نزيد عليهم
امي .. نا والله مانبي الا راحتها ونا عارفة قديش هيا تحبه ومتعلقة بيه
محمد.. وليش ماحكيتي هك من الاول يا امي
امي .. لازم نحط قدامها كل حاجة
باتي .. زي ماقلت ليك يا بنتي لازم تفضي القصة انتي وياه تبيه والله ما واحد قايلك لا تبي تفارقي كلنا معاك لكن معاش تخلي الراجل متعلق
انا .. حاضر يا بتي
محمد.. تو نكلمه يجي
انا.. به