قصص حكايتنا

الفصل الخامس

#قلبي_معي

الفصل الخامس

انا .. برغم انه يحاول انه يكون معاي عادي ومخليني ديمة معاه لكن علاقتنا باردة ابرد من الثلج
سلمى .. اليوم كلمتني صاحبتي انتي عارفة اني في اجازة وضع وتسئل فيا ان علاء طلقك او لا
انا بخوف واضح .. وعليش تسئل على حاجة كيف هذي
سلمى .. لانها تشوف في علاء ليه شهر يحكي مع موظفة معانا نا نعرفها من قبل علاقتهم عادي كانت رسمية موظف وموظفة لكن صاحبتي اكدت ليا من شهر ان العلاقة اللي بينهم فاتت موظف وموظفة
انا ودمعة نزلت .. بالك قوية علاقة الصداقة اللي بينهم بس
سلمى .. ما تضحكيش على روحك وتحاولي تهوني الموقف علاء فقدك انتي بس من ذاكرته ومافقد شئ ثاني وعلاء كان من يوم ماخشيت للمصرف وكلهم يحكولي على جديته ومايحبش يخلط العلاقات في العمل
انا ودموعي غلبوني .. انا شنو اندير قوليلي شنو اندير به درت اللي نقدر عليه مشيت على كل النصايح اللي عطاهن ليا الدكتور بيش ترد ذاكرته اكثر من هك شنو اندير
سلمى .. انا ماحبيتش تكوني على غفلة واحسن شئ صدقيني ومافيش خير من المواجهة اسئليه وقولي عادي اني نا اللي قلت لك لاني ماكذبتش حددي حياتك اللي حسيتها معاش تما شئ مهم عندك غير ان علاء يتفكرك لامتى بتصبري يا ولاء ترا قولي 
انا ومسحت دموعي .. والله ماني عارفة لكن صح لامتى بتقعد حياتي هك
سلمى .. انتي عارفة معزتك عندي شنو والله لو ما واجعني حالك كنت خليتك على عماك نين يجيك علاء ويقولك بنتزوج فشوفي روحك يا ولاء وحرام يضيع عمرك
انا.. شكرا ليك يا سلمى انك ماسكتيش او دسيتي عليا اللي علمتيه
سلمى .. انتي تستاهلي احسن من اللي صاير فيك تو  
انا.. قوليلي شنو اسمها
سلمى .. جوري
انا.. شكرا ليك يا سلمى انك كنتي ليا اخت وديمة مصبية معاي
سلمى .. ثقي وتأكدي مهما يصير انتي اختي وغالية عليا

ونزلت سلمى ونا دموعي ردن ينزلن صح نا من يوم صار لعلاء الحادث ونا مش مستوعبة كيف ينساني وبعد ما استوعبت قعد شغلي الشاغل انه يذكرني مشيت معاه لدكتوره النفسي وحكيت تفاصيل عمري ماقلتهن لحد وقلتهن للدكتور لعل وعسى يساعدنا وماصار شئ قالي اننا نحاولو نرقدو مع بعض من جديد وان فترة المداعبة تكون اطول بعد ما حكينا له شنو صار في يوم ذكرى زواجنا والكارثة ان حتى المرة هذي ماوصلش اصلا لحاجة اكبر من المداعبة هو بدا يبوس فيا وبمجرد ما بديت نبادل فيه بعد عليا طول وفي المرة هذي كان الوجع اكبر والجرح اعمق ومع ذلك دست على كل شئ ونقول تو يعوضني لما يذكر لكن اهو ليه مابين الحادث وانه صح قريب يخش للشهر السابع وحاسة ان حياتي تمت مصبية على ان علاء يذكرني ليش تصبي حياتي هك 

تعوذت من الشيطان وصبيت توضيت وصليت استخارة وكانت اول مرة نصلي استخارة على علاء عشرة سنين علاقة ولا مرة فكرت نصليها وبعد ماسلمت وهديت رغم اني ونا ساجدة دموعي غلبوني ونا ندعي لربي انه يريح قلبي اللي والعة فيه النار