قصص حكايتنا

الفصل العاشر والاخير

#مطلقة_ولكن

الفصل العاشر والاخير  

اضبطني محمد وباركلي وبعدها بشرى وطلع محمد عشان بيكلم باتي ويحكيله على طلب سامي لي واني موافقة وبعدها بلغ سامي
وجو هل سامي طلبوني رسمي وحسيت هله عادي لا هالفرحانين واجد ولا المضايقين وهذا ماضايقنيش لاني في الاخير مطلقة بنتزوج ولدهم الشاب اللي ماسبقش ليه يتزوج

للاسف نحن في مجتمع اصبحت المطلقة فيه كأنها عار ولايحق ليها الزواج الا بمن سبق ليه الزواج سوى كان مطلق زيها او ارمل يبحث على من تعيل عياله

وطبعا كانت حاضرة سارة وصبايا خوتي بس اما خواتي مابيتش نكلمهن ولانخلي امي تكلمهن
واتفقو على كل شئ وطلع سامي ولله الحمد مايبيش يدير فرح عزومة يوم الصباحية عشاء وخلاص للاشهار والحق عجبني لان لاخاطري في لبسة ڤيلو ولا عيشة دور العروس مرة اخرى
بس مايمنعش اني نعرف اسبابه وكلمت محمد اني بنشوف سامي وفعلا جاء وبعد السلام والمباركة ليا وليه

انا.. ليش ماتبيش ادير فرح
سامي .. كنك انتي تبي فرح
انا .. لا بس انت شاب ومن حقك ادير فرح غير انك يعني مش مستحق بيش نقول مصاريف الفرح واجد
سامي .. ليا اسباب
انا.. ممكن نعرفهن
سامي .. اولهن البهرجة الكذابة بتاعت الفرح مانحبهاش وشفتها في افراح خوتي وخواتي كلهن وماعجبتنيش مصاريف على الفاضي عشان يعجبو الناس اللي مايعجبهم عجب
انا.. صدقت والله
سامي.. وثانيا الفلوس اللي بنصرفهن ع الزايد ما نا اولى بيهن بدل ما اندير رحلة لدولة رخيصة عشان نوفر نقدر نطلع لدولة افضل وندير شهر عسل حلو وبدل اسبوع يقعد اثنين او اكثر 
انا.. صح في ناس واجد يبقى خاطرها تمشي شهر عسل لمكانات كويسة لكن بسبب المصاريف بتاعت الفرح تكون هدت الحيل يدوب يلحقو على مصر والله تونس والله تركيا
سامي .. والثالث انتي
انا باستغراب .. نا كيف
سامي .. مانبيش حد يجرحك حتى بنظرة ومانبيكش تشوفي في عيون الناس شوفي الشاب خذا وحدة مطلقة
انا .. عندك حق فعلا نا اصلا تمنيت انك ما اديرش فرح لكن قلت انت شاب ومانبيش نخرب عليك فرحتك
سامي وقرب مني .. نا فرحتي بقربك شوشو واكيد حنعيش فرحتي بس بطريقتي متفقين
انا بي احراج من قربه  .. تمام
سامي .. يبقى بكرة تطلعي ادورليك قفطان حلو ومش شرط يكون لونه ابيض لان مافيش حاجة مفروضة انك تلبسي ابيض للعلم واه نبيك تحني
انا بي احراج اكبر وخدود انحمرو .. حاضر
سامي .. هيا نخليك تو قبل ما ندير تصرف يزعلك

وطلع سامي ونا مازالت سرحانة في كلامه وفي داخلي فرحة بدت تبان
وطلعت نا وبشرى اما سارة ماخليتهاش خفت عليها تتعب وخذيت فستان حلو لونه وردي هادي يمشي مع بشرتي وبسيط مافيشي تفاصيل واجد قصير لتحت الركبة بشوي منفوخ شوي مش واجد وكله دانتيل وكمه لعند المرفق ضابط ورقبته واسعة نازالة للكتف مبينة طول رقبتي واتفقت مع حنايا
وبعدها خذيت اسبوع نجهز في بتاتي وكملته لان معايا بشرى وصبايا خوتي دارن القدر وحتى خوتي تقول فرحانين ليا واجد ومش عارفة هل بس عشان بنتزوج والله حتى عشان هالعريس يبوه كلهم فمش عارفة 
وجاء اليوم قراية الفاتحة وبنروح مع سامي طول بعد العشاء يلي هلي دايرينه  واليوم اللي قبله جت الحنايا وحنتني بعد ما برمت على روحي زي اي عروس والمكياج قررت نمكيج بروحي درت مكياج خفيف وروج دمي داكن ولبست حذاء فضي وشنطة فضية مع قفطاني وشعري خليته مطلوق وبعدها انقرت الفاتحة والمباركات وكانت حاضرة ام سامي وخواته الاثنين  وصبايا خوته الاثنين  وحتى خطيبة انس جت وبعد العشاء قالولي سامي قالي هيا وكانت حازة في نفسي اني ماصورتش معاه وليش هو ماقالش على التصوير المهم لبست كابي وبعد السلامات وطبعا خواتي حضرن وحاوالن واجد انهن يحتكن بيا مابيتش بالذات بعد الكلام اللي قالنه لما عيالي ماتو قالو افتكيت من ذرية عادل باتها ومعاها بتقعد مطلقة وبتربي عياله الحق كلامهن زاد ضايقني منهن وحتى لما جن وباركن نرد عليهن قدام الناس بس لان عيب الناس تعرف مشاكلنا