قصص حكايتنا

الفصل السابع

#قلبي_معي

الفصل السابع

ونا غارقة في دموعي وصوت شهاقتي عالي وما عدلتش لاني حسيت وجع قلبي اعلى حتى من صوت بكاي وبدون مانفطن انحط قدامي علبة مناديل ومعاها كباية اميه

احمد بهدوء.. اشربي اميه واستهدي بالله
انا بصوت معبي بكا .. لا اله الا الله (وبدون تركيز مع من نحكي المهم نبي نحكي)
انا شنو درت ليهن ينقضو في وجعي وياريت حتى صح اللي قالوه حرام عليهن نا عمري ما حكيت على حد ولا خضت في عرض وحدة ليش يصير فيا هك (ودموع نزلن من جديد ) مش ذنبي ان ربي ابتلاني وان حب عمري يدير حادث وينساني نا من كل شئ في حياته ونا مانشوفش في الدنيا الاهو ونا كل يوم خاطري نعرف السبب اللي خلاه ينساني ومعاها يطلعني خاينة ونا في حياتي ماعرفت شباب غير خوتي  وهو حتى الاستاذ عبدالله صاحب خوي الكبير من زمااان بكل عمري حتى شوف ماشفته والسبب كان هو مانعني على اي اختلاط بشباب حتى اقاربي وضنا عمي وخوالي وفي الاخير يديروني ابصر شنو دايرة وانه هو ماتحملش الصدمة ونساني نا

ورديت نبكي ونبكي لان الظلم واعر وساعاتها قديش حسيت بكل مطلقة اطلقت ظلم وخذاها الكلام ودارو الغلط منها مهما كان السبب وشوي هديت وشربت المية

احمد على نفس هدوءه .. خلاص هديتي تو
انا بصوت واطي .. الحمدلله

وبعدين علمت لمبة  التيرمو متر في دماغي وبتوتر واحراج وخدود انحمرو بسبب بكاي واحراجي

انا باحراج .. آسفة معليش انك انجبرت تسمع شئ ماليك فيه بس احيانا تلقى روحك تبي تحكي لحد مايعرفك  عشان غريب مايعرفش شئ عليك آسفة ما قدرتش انسيطر على روحي
احمد.. عادي ولايهمك بس انتي تباني انك اقوى من هكي
انا ومازالت مش مركزة وشعور براحة غريب ليه .. كل انسان قوي من داخله صدقني ضعيف نا نعرف ندافع على روحي لكن الكذب مانعرفش نواجه
احمد.. حصل خير وان شاءالله تكون الدموع هذي آخر دموع تنزل عليه
انا بهزة راس .. نا مانبكيش عليه رغم ان ليا تو قريب نسكر سنة منفصلة لكن ربي ولله الحمد برد قلبي عليه لدرجة حتى لما علمت بزيجته رد فعلي كانت عادية لكن نا بكيت من الكذب من ان ليش الناس ماتخليش الناس في حالها كل واحد ليه مشاكله وهمومه
احمد.. في هذي صدقتي انا ديمة نقول الواحد ان شاءالله يقدر يلحق على روحه لابال يشقى بهم غيره
انا وباستغراب .. معليش من انت ومعاها مقمعز على كرسي المدير انا ماشفتكش هنا واذا انت استاذ راه المدير واعر وعصبي مرات يهزبك راه
احمد بضحكة .. كيف عرفتي انه واعر وانتي ماشفتيشي بكل
انا وماركزتش .. صح ماشفتاش لكن يحكو عليه هيا نطلعو من هنا عشان مانكونش في سبب لاحراجك (صبيت) وشكرا مرة ثانية انك سمعتني
احمد.. العفو نا مادرتش شئ والابلة اللي حكت عليك خلاص معاش تشوفيها وحتكون درس لكل ابلة تحكي على غيرها بدون احترام لاي خصوصية
انا هنا وضربتني الصدمة .. لزيتها يعني انت (وسكتت من احراجي معاش عرفت نكمل )
احمد بهدوء.. اه نا المدير العصبي الواعر
انا باحراج .. آسفة والله يحكو عليك وحتى مرة مرة نسمع في صوتك العالي
احمد بضحكة تسلب العقل .. ولايهمك عادي اصلا ماقلتيش حاجة غلط
انا.. معليش ممكن نقدر ناخذ اجازة اليوم
احمد.. عادي اليوم بس مفهوم وماتخليش كلام الناس يهزك وماتهربيش حتى لو سئلنك جاوبي بثقة لان هروبك يثبت كلامهم
انا .. حاضر