#مطلقة_ولكن
الفصل الخامس
انا.. شنو تبي رد لعروستك اللي تزوجتها عشان خلاص فرصتي في الحمل ضاعت وانت كنت سبب ضياعها يا عادل
عادل .. اسمعــــ.....
انا.. خلاص ياعادل الكلام بينا انتهى لعلمك وكان تذكر شنو قايلة ليك من لما عرفتك وارتبطت بيك اي حاجة يا عادل اديرها نسمع منك رد فعلي مش حتكون زي مانسمعها من غيرك
وردت فعلي للاسف مش حنقدر انديرها نين نولد وبعدها يا عادل كل حد في طريقه وهي سلام ورد لعروستك بطلعتك وراي خليتها مضحكة ومحمد يستنى فيا هي سلام
ونزلت غطاء وجهي عليا وطلعت وخليته في صدمته وهك حسيت ناري بردت وارتاح خاطري لكن بمجرد ماركبت السيارة ونا دموعي نزلن وقعدت نبكي بعبرتي واحسن حاجة محمد وبشرى خلوني براحتي ماسكتونيش
عمتي مفيدة .. خش يا عادل لعروستك الصبايا استغربو طلعتك بالشكل هضا
عادل بعصبية ومسك كتوف امه .. اي صبايا واي عروس تفكري فيها تو ارتحتي تو يا امي تهنى بالك بعد ماخربتي بيتي وضيعتي مني رفيقتي ارتحتي
عمتي مفيدة .. نا مانبي شئ الا يكون ليك ضنوة
عادل مازال بعصبيته وصوته علي .. ضنوة ماهو نا كنت السبب ماهو كانت المشكلة عندي ليش كنتي ساكتة قبل بلاش مانبيش نسمع ردك (وبتنهيدة ) عارفة شوشو يا امي حامل
حامل بجنين عمري ماتمنيته الا منها حامل بولدي والله بنتي
عمتي مفيدة رغم صدمتها .. عادي وكان حامل حتى هذي تو تحمل وتعبي حوشك بالعيال وتنسى الاولى وولدها
عادل .. انتي شنو تقولي فعلا ماعندي منين بنجيبها قلت الاصل (ويخبط على صدره ) نا قليل اصل واهلي قلالات اصل وتزوجت على بنت الاصل وحدة كيفي قليلة اصل ماهو نحن ملة راكبة على بعضها
هنية .. احترم نفسك بنتي مش قليلة اصل
عادل بضحكة هزوة .. فعلا بنت اصل اللي تجي على ولية صبرت وضاقت المر مع راجلها فعلا بنت اصل اللي ماتفكرش ليش الراجل هذا تزوج على رفيقته اللي صبرت سنين بدون ماتسمع كلمة امي عشان هيا بنت اصل
بنتك مش بنت اصل لانها فكرت في نفسها بس وماقالتش بينها وبين روحها طالما الراجل هضا طلع قليل اصل مع رفيقة عمره ليش مايطلعش قليل اصل معاي لكن لانها قليلة اصل زيي مابتش تشغل دماغها
عمتي مفيدة .. اهدا يا عادل مش وقته الكلام هضا
عادل وهو يحاول يهدي روحه .. لا وقته ووقته بالمزبوط وعشان مازال ماصار شئ لازم تفهمو وتعرفو حاجة كويسة (ووجه الكلام لهنية ) اذا بنتك عابية انها بتسكن في الحوش الكبير اللي بنيته بتعب وجهد مرتي والله بتركب السيارة العالية فنحب نقولك بيش تقوليللها هو حوش الايجار اللي واخذه تو ماساكنة غيره وحوشي وسيارتي ملك لشوشو بيش ترتاحو
عمتي مفيدة .. فيش تقول انت
عادل .. اه صح هو مكتوب بالنص بيني وبينها لكن والله العظيم لدني بكرة متنازل على حصتي ليها حتى لو قعدت مصرة انها معاش ترجعلي وتو الكورة في ملعبك يا عمتي هنية نا قاعد هنا ومعاش خاش جوا وعدي لبنتك لو تحب تكمل وتتحمل معاي زي ماتحملت الاولى تطلع نا نستنى فيها وكنهدا مازال بدري تقدر تقمعز في قاعتها ونا نطلع وورقتها وكل حقوقها يكونن عندها شوفي روحك
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
