عندي ليكن خبر حلو بس نبي تشجيع سمح زي ما متعودة منكن
طبعا كنت متراهنة نا وزوجي ان اذا عرفتن تخمن احداث القصة اني انزل لكن القصة كلها مرة وحدة وبما اني قريت تعليقات الفصل الثاني وشفت التعليقات فخسرت الرهان وحنزل لكن القصة مرة وحدة (طبعا تعليقات الفيس)
#انا_وسلفتي_وضرتي
الفصل الثالث
وعدت ليلى وخالد للعيادة وطلب عليه الدكتور صور واجد ومن معاينة لمعاينة وتحويل لتحويل ومحمد ماسيبش خوه وليلى بكل وآخر حاجة رست انهم يسافرو بيه لمصر بعد ماطاحو في دكتور كويس حولهم لمصر لدكتور معروف غادي ورغم تخصص الدكتور خوفهم لكن بيش يطمنو لازم يدقو كل البيبان وسافرو لمصر ومحمد وحتى اريام سافرت معاه رغم ان ليلى مش راضية لكن ماتبيش تحسس سلفها بهك وشهد بنتها خلتها مع حنها وجدها وبعد ايام من وصولهم لمصر وخالد بدا يعاود في الصور من جديد باجهزة احدث ويوم عشان صورة شدوه بات ليلة ومباش يخلي ليلى معاه تبات ومحمد مايقدرش يسيب اثنين صبايا برواحهم فاطرو انهم يخلو خالد بروحه بعد ماعطو الممرضة مبلغ كويس بيش ادير بالها زيادة من خالد
اريام .. هيا ننزلو محمد نا من يوم ماجيت ماطلعت بكل
محمد.. نقولك هيا معانا ماتابيش
اريام .. شنو بنمشي معاكم للمصحات ومراكز الاشعة يا عليك دهويرة
محمد ويحاول يكون هادي بيش ليلى ماتسمعهمش .. انتي من الاول لما جيتي معانا عارفة اننا جاين مش عشان ندهورو صح ونا ما وعدتكش بحاجة
اريام وصوتها علي .. بس نا مليت والشارع اللي تحت حفظته حفظ
ليلى بعد ما سمعت اريام طلعت عليهم .. عادي اطلع يا محمد ما ادورنيش نا شوي ونرقد عندها حق هيا من لما جت ماطلعتش بكل
اريام بنرفزة .. ماحطيتكش محامية عليا وراجلي نعرف نحكي معاه
ليلى رغم ان كلامها ضايقها لكن برضو دارت باصلها .. انا مش محامية عليك لكن محمد سبب عدم طلوعه مايبيش يخليني بروحي هذي القصة كلها ونا انطمن فيه ان قعادكم مش حيأثر لاني بنرقد
وخشت وسيبتهم وسكرت دارها وبعد شوي سمعت محمد يدق على بابها وقاللها انهم طالعين
اريام .. للكرنيش يا محمد جايبني
محمد ببرود .. بالك تسحابيني صح مطلعك نا نزلت بس عشان انتي مش حتسكتي وليلى مش ناقصها وهذا اللي عندي كان عاجبك كنهدا بكرة اول طيارة نازلة ليبيا نحجزلك عليها وروحي ويلاقيك واحد من خوتك واقعدي عند هلك لعند مانروح اصلا انتي جيبتك غلط وحدة عديمة الاحساس
اريام بصدمة .. نا
محمد وبدا يتعصب .. اه لما خوي يبدا مريض ومرته دمعتها ماتكفش عليه وانتي تفكري في نفسك بس مش عارف كيف مكنتش نشوف في انانيتك
اريام .. احجزلي بكرة
محمد .. تم
وفعلا ثاني يوم حجز محمد لاريام وروحت بدون ماحتى يهتم من بيلاقيها من كثر ماهو معلول منها وروح خالد والنتيجة بتطلع على حسب في اللي يومين وفي اللي اسبوع فمازالو بيقعدو وليلى آخر اهتمام بخالد والوقت اللي راقد فيه خالد لان بدا التعب والمرض يبان عليه اكثر تقضي فيه في الصلاة وهي تدعي طول الوقت وكل ماتفضى تقرا في قران وتناجي في ربها ان يلطف بي راجلها ومع هذا كله ماقصرتش في حق محمد اللي مسيب خدمته ومرته على خاطر خوه مهتمة بماكلته وشرابه ودبشه زي ماتتعامل مع خالد حتى هو نفس الشي
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
