#قلبي_معي
الفصل العاشر
وانقرت الفاتحة ولبست قفطان قصير طبقات على بعض مخليته منفوخ شوي لونه سكري عليه تطريز ذهبي وبصدر نازل للكتوف وطلقت شعري عاد دايرتله بروتين رايح ناعم امية وشديت شعري من الجنب باكسسوار ذهبي وعديت مكيجت عند كوافيرة وجبت حناية حنتني هندي ماعرفتش احمد يحبها او لا لاني تحشمت نسئله
ورهف معاي في كل خطوة وفرحانة ليها واجد بالذات انها تقدمت واجد في علاجها
وشوي جت اخت احمد ومعاها ولية اخرى عرفت انها سلفتي وبعد الترحيب بيهن وخذن واجبهن كلمني ايهاب وقالي جهزي روحك احمد يستنى برا وقعدت نجهز في روحي بعد ما سلمت على هلي وضيوفنا اللي كانو العيلة بس عمامي وخوالي
وطلعت نا واخت احمد وسلفتي هنا طلعن على طول لما لقاني اسامة وايهاب ومعاهم احمد مصبي وجاني اسامة بسرعة عشان منزلة خمار الكاب بسبب ضنا عمي وخوالي برا وسلم عليا وساعدني لعند وصلني لايهاب سلم عليا وحضني بكل حب وحط ايدي بايد احمد ووصاه عليا
وركبني احمد السيارة ولما ركب في مكان السواق
احمد.. الف مبارك لينا وربي يهنينا ويسعدنا
انا..امين يارب الله يبارك فيك
احمد.. معليش ماعرفتش نسلم عليك خوتك وشباب عيلتكم مركزين معانا
انا وماركزتش اصلا انه ماسلمش عليا .. ولايهمك نا بروحي ماقدرتش نمشي من ارتباكي قدامهم لاني مش متعودة عليهم
احمد باستغراب .. هذوم ضنا عمك عظم رقبتك وضنا خوالك خوت امك
انا .. احمد قبل ما نجاوبك بنسئل سؤال عشان نعرف كيف نتعامل معاك
احمد.. تفضلي
انا.. مش حيضايقك لو ذكرت علاء بين ووقت واخر
احمد بهدوء.. وشنو لزمت السؤال هذا
انا.. زي سؤالك تو الاجابة عليه مرتبطة بعلاء هذا ليش سئلت
احمد.. اه اذا هك لا عادي اكيد مايضايقنيش لانهن 11 سنة مش شوية عشان يلتغين بسهولة
انا .. علاء كان مانعني على اي ذكر من محيط عيلتنا حتى ضنا عمي نعرفهم بالاسماء لكن بالاشكال مانقدرش نميزهم احمد باستغراب واضح .. بس انتم عيلة وحدة وكنتو تجتمعو مع بعض كيف كنتي تتجنبي فيهم
انا.. كان زردنا طالما في حوش او دار او حتى خيمة في الزردة مانطلعش منها وغير نحسبت عليا زردة وخلاص وبعدها فهمو اني نتحشم ومانحبش الاختلاط وتعودو عليا واهلي قعدو مرات مايرفعوش حتى فيا ويكلمو في بنت جيرانا تجي تونسني
احمد.. اه فهمت بس نبيك تعرفي نا صح مانحبش الاختلاط الزايد عن حده زي البصارة اللي من غير حدود والضحك الواجد لكن السلام وكيف الحال هذي مافيها عيب
انا .. ان شاءالله
وقعدنا نحكو بهدوء ونسيت توتري وخوفي من الخطوة اللي خطيتها ووصلنا لحوش اهل احمد واول ماخشت السيارة جوا السور لاقاني راجل واضح عليه الكبر لكن من نوعية الرجالة اللي مهتمة بصحتها من شكله وفيه شبه من احمد وتقريبا باته واثنين شباب مصبين احذاه وشكلهم خوته وفي شباب اخرين بس بعاد شوي علينا وساعدني احمد على النزول ورفعت خماري
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
