قصص حكايتنا

الفصل الثالث

#قلبي_معي

الفصل الثالث

انا بدموع .. طمني يا عمي
عمتي .. تكلم يا زيدان ولدي شنو صار فيه
عمي .. اهدو مانندري على شئ قاعد في العمليات لتو ماطلع حد
انا قمعزت على الوطى خلاص معاش قادرة جاني خوي صباني وقمعزني على كرسي وجابلي امية وشوي جاء باتي وامي ووصل سفيان وسلمى وسهى وراجلها وايمان وراجلها وروان مازالت مسافرة وقعدنا نستنو على نار حد يطلع يطمنا وبعد قريب ساعتين طلع الدكتور

عمي .. طمنا يا دكتور
الدكتور.. الحمدلله صحة ولدك كويسة قدرنا نوقفو النزيف لانه محصل ضربة على راسه قوية سببت في نزيف داخلي غير كسر في واحد من اضلع القفص الصدري سبب تمزق في الرئة وهذا اللي اخرنا في العمليات اما الباقي رضوض وتشفى مع الوقت وحالته تو مستقرة
انا وقفزت من مكاني .. نقدر انشوفه يا دكتور
الدكتور .. اليوم لا لكن بكرة باذن الله حيفيق وتقدرو تشوفوه لانه تو تحت تاثير البنج وفي دار العناية

وبعد اصرار من عمي روحنا كلنا وقعد سفيان ومعاه ايهاب
ومشت عليا الليلة اطول الليالي اللي مريت بيها ونا نصلي وندعي وبس ونقرا في قرآن مع ان كلام الدكتور مطمن الا قلبي مش مرتاح حاسة بحاجة مش عارفة شنو هيا
لعند ماضوى الصبح ونا مافارقت صلايتي ولا مصحفي واول مازرقت الشمس غيرت دبشي ونزلت لقيت عمتي وعمي وصبياتي كلهم واعيين صبحت عليهم وقلت لعمي هيا ومشينا كلنا ولقيت حتى باتي قدامي

عمي .. ها يا سفيان شنو اخبار خوك
سفيان .. لتو مافيش جديد كل ما نسئل يقولولي مازال تحت تأثير المسكنات
ايهاب .. طمنو بالكم وماتنسوش ان عمليته تعتبر كبيرة راه النزيف الداخلي مش حاجة ساهلة
وعدى النهار هك وبعد طول محايلة خلوني نا وعمتي نشوفوه من وراء القزاز كيف منظره رايح توبو في فمه وصدره ملفوف بشاش كبير وجيهة قلبه حاطين لصقات طالع منهن خيوط وفي صبعه جهاز وراسه ملفوف بشاش قعدت ندعيله بدموع ونا متمنية يطلع ويشفى بسرعة مش طايقة الدنيا وهو مش فيها
وعدى يوم اخرى وجر معاه يوم اخر ونا مايخش في جوفي كان المية وبالغصب كان شربت طاسة عصير وعمتي احرف مني وحتى لشقتي معاش ركبت من كثر اني مش طايقتها وعلاء مش فيها نركب ليها نغير دبشي بس
والمشكلة اللي مخوفتنا ان الدكتور قال انه ثاني يوم يوعى واهو خش في الرابع وما وعاش واخرى الدكتور اكد انه مش في غيبوبة

وخامس يوم مشينا للمستشفى لكن فيا دوخة معاش قدرت نقاومها وفطنت بيا عمتي خششتني على الاسعاف قبل حتى  ما نطمن على علاء وتحت اصرارها وافقت وعلى طول الدكتورة اول ماشافتني دارتلي تغذية وعمتي قالتلي انها بتعدي تطمن على علاء وتجيني
ولما التغذية قريب تكمل وعمتي ماجاتش ونرن عليها ماتردش عليا قلبي شخشبني وفكيت التغذية وحسيت روحي كويسة شوي رغم ان الدكتورة قالت على الاقل نبي خمس تغذيات عندي ضعف عام اكيد بيكون عندي ونا ما كليت شئ بكل
وركبت للدور الثاني وما لقيت حد في الممر وهذا وين عقلي قعد ياخذ ويجيب وقعدت ندور على حد نسئله نين لقيت ممرضة وسئلتها على علاء قالتلي انه طلع من العناية وهو تو في حجرة عادية في الدور الاول ومن فرحتي نزلت الدروج جري وقعدت ندور بين الديار نين بانت عليا سلفتي خشيت للدار بفرحة ولانهم قاعدين كلهم ماقدرتش ناخذه في حضني من فرحتي باني نشوف فيه واعي حتى لو بيطول بيش يرد زي ما كان المهم واعي ومن فرحتي ماركزتش على وجووهم وجيت بحذا علاء ومسكت ايده