#انا_وسلفتي_وضرتي
الفصل الخامس
غالية بفرحة .. جد يا محمد
محمد.. اه يا امي نا من شهور هك فاتن عطيت علم لاريام يا ينعدل حالها يا بنتزوج عليها
عبدالله .. وشنو انعدل حالها
محمد بهزة راس .. كما الاسوء يا باتي تمن المشاكل كل يوم وعلى اتفه الامور تسحابني نحكي بس ماتسحابش اني نا قد تهديدي
غالية .. ومفكر في وحدة معينة
محمد.. لا مافيش في بالي وحدة والحق يا امي قبل نبي نحكي معاك انتي ادوريلي نا اخترت بروحي واختياري شفت شكله ومانيش مرتاح يا امي
غالية .. والعروس قاعدة
عبدالله ومحمد مع بعض .. من
غالية .. ليلى
محمد باستغراب .. ليلى من
غالية .. ليلى ارملة خالد
محمد صبا بعصبية .. شنو يا امي تقولي انتي
غالية .. اهدا بس واسمعني
محمد.. نسمع شنو يا يام
عبدالله .. اهدا وقمعز واسمع امك شنو تحكي
غالية .. كان ماتعلم ليلى من لما فكت رباطها وهيا كل شوي جايها عريس شكل وكل مرة اطلع في عيب بيش هلها يقتنعو لكن لامتى بتقدر عليهم وانت عارف هلها والحق نا ماني راضية بنتنا يربيها راجل غريب ليلى حيجها وقت وتتزوج وطالما انت بتتزوج ليش ماتكونش ليلى وبنتنا تكبر بينا وهك وهك انت متعلق بشهد واجد
محمد بتنهيدة .. مش عارف يا يام خليني تو نشوف روحي قبل
عبدالله .. كلام امك زين العقل وبعدين ليلى نعرفوها ونعرفو معدنها كويس وكبرت بينا
محمد صبا .. ساهل تو نفكر ونقوللكم
وطلع محمد لمصطفى صاحبه وحكاله كل شئ
مصطفى .. اسمع يا محمد كلام امك صح راه
محمد .. تعرف كان نقولك حاجة
مصطفى .. شنو
محمد بمكر .. الاسبوع اللي فات لما مشيت ناخذ في شهد ليلى طلعتلي توصي فيا عليها زي العادة ورغم انها مش حاطة حاجة على وجهها لكن اشتهيتها يا راجل
مصطفى بضحكة .. شنو
محمد.. اه تمنيت نملكها حتى ليلة بس وبعدها يصير اللي يصير
مصطفى .. يعني بتوافق
محمد..تبي الحق مش متخيل روحي نكمل حياتي معاها لان ذكريات خالد بتكون بينا لكن خاطري فيها
مصطفى .. مافهمتش يعني بتتزوجها والله لا لان نوع ليلى مستحيل حتسلم نفسها ليك لو صبيت على راسك الا كان بالغصب مندري
محمد.. اكيد لا شنو بالغصب لكن كان بنتزوجها نحول شهوتي منها بس وبعدها بنسيبها وهيا تقعد على ذمتي ونتزوج وحدة تكمل معاي
مصطفى .. خزيه على تفكيرك المسخ
محمد.. الحق ليلى ديمة كنت متمنيها وليالي واجد تخيلت اريام هيا
مصطفى .. بس مافهمتش المانع شنو اللي يخليك ماتكملش معاها
محمد.. خالد حيكون بينا صدقني لكن نا نتزوجها ونملكها ونفرغ شهوتي وتقعد على ذمتي وفي شقتها وتبقى شهودة تحت عيني ديمة نين نسلمها لي راجلها ونا ندور ولية ثانية نكمل حياتي معاها
مصطفى .. واريام
محمد .. براحتها بتقعد عادي بتمشي عادي معاش تمت تفرق عندي يا صاحبي
وعدن ايام ومرت سنوية خالد ومشت ليلى لحوش عربها وباتت هضاك اليوم عندهم واريام رغم انها ليا سنة ماشافتهاش لكن تعاملت معاها ببرود بكل وكان حصلت فرصة راه دارت عركة معاها لكن ليلى زي العادة كبرت عقلها
ومرن شهرين اخرات بعد السنوية
ومحمد قال لامه انه موافق وغالية ماصدقت مشت ثاني يوم لهل ليلى
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
