#انا_وسلفتي_وضرتي
الفصل الثامن
اريام بحمق .. كنك يا خرا شنو تبي فيا سيبتها لك تحت مخضرة جاية في جرتي ليش
شهد بغصة .. انا والله مانلحق فيك لكن حنينة قالتلي نكلمك على العشاء
اريام دفتها بقوة وشهد توازنها اختل الا محمد كان وراها مسكها قبل ماتجي عرم من عالدروج حضنها زين
محمد بعصبية وصوت حاول يكون واطي عشان مايخوفش شهد .. نا من قبل قلت لك شهد خط احمر لعند هنا واستوب ننزل نتعشى لوطى نركب نلقاك لامة دبشك معاش نبي نشوف خلقتك (بصوت عالي ) سامعة
ونزل وهو مازال حاضن شهد ويتخيل لو ماركبش وراها شنو كان يصير فيها
واستغربو تحت ليش حاضن شهد هك لكن مباش حد يعلق لدرجة انه تعشى وهي في حجره مباش يخليها تعدي من احذاه وبعد وقت خذاته امه بروحه لكن ليلى سمعت الكلام
غالية .. كنك يا محمد ركبت بحال نزلت بحال
محمد بتنهيدة .. ينعلي يا امي لو ما ركبت كنت ممكن رحت فيها لو صارت حاجة لشهد
غالية بخوف .. شنو صار
حكى محمد ليها اللي شافه وسمعه من اريام وشنو قاللها وانه تو بيركب بيعزقها عند هلها لكن ليلى جتهم
ليلى .. معليش يا عمتي ومحمد سامحوني اني سمعت كلامكم لكن حتى نا شخشبني محمد وهو حاضن شهد بالشكل هذا
محمد بتنهيدة .. عادي يا ليلى
ليلى .. محمد ممكن تسمعني
محمد .. شنو
ليلى .. يا محمد ماتلومش اريام زمان لما كانت سلفتي شعرت بالنقص لما ربي رزقني بشهد وهيا لا وحقدها ماعرفتش شنو اديرله حطاته في شهد وتو هيا ضرتي ماتلومش عليها بالذات بعد ما جبت عبودي كثر الحكي عليها ان العيب منها هي وهذي حاجة واعرة عالولية راه
وتو رد فعلها طبيعي ان شهد هيا اللي تكون شريكة ليك مش عبودي وانها تشوف في رزقك يمشي لعيال ليلى وهي لا
محمد .. عيال ليلى ماهم عيالي
ليلى .. تعرف لو كان شريكك عبودي ممكن رد فعلها كان عادي لانه ولدك لكن شهد اريام ماتحبهاش من قبل لابال تو ونا مرت راجلها ضرتها
غالية .. كلام ليلى عين العقل عاقبها باي حاجة ثانية لكن مش حوش هلها
ليلى .. ماتعلمش نا مرات لو كنت مكانها ممكن اندير زيها العجز واعر راه
محمد .. عمرك ماكنتي زيها يا ليلى
ليلى
محمد لما قال الكلمة هذي حاجة هزت قلبي مش عارفة شنو من لما جبت ومحمد فيه حاجات واجد ة اختلفت حتى شقته اللي فوق كملها ونتوقع فيه في اي وقت يقولي بنتزوج لكن مرة سئلته قالي تقعد لعبودي
ركب محمد لي اريام بعد ما اقتنع بكلام ليلى ولما خش لقى اريام تبكي وحذاها شنطة دبش صغيرة ولما فطنت بيه مسحت دموعها
اريام .. هي واتية
محمد بهدوء .. اريام نا ديمة نقولك شهد خط احمر تعرفي لو اللي صار مع عبودي كنت ممكن مانعدلش عليك لكن الا شهد بس هالمرة حنفوتها لك لكن مرة اخرى فكري كويس قبل اي كلمة تطلع منك لشهد لكن عقاب ليك الشهر هذا كله بنقعد عند ليلى وكان مش عاجبك كلامي شنطتك واتية
أنت تقرأ
قصص حكايتنا
Short Storyهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
