#الحلقة ٢٢
تامر قام كاتفه ونزلهم بمعنى مانعرفش : علمي علمك
محمد اشرلهم متع امشوا : بعدين نتكلموا توا امشوا
محمد بيكمل كلامه لكن شاف نفس المرا وبوه قراب على القصر ،بس في حاجة غريييبة ، بوه وقف بعيد شوية بحيث مايشوفه حد وكأنه خانب حاجة ، والمرا يلي مع بوه خشت للقصر وشكلها متعودة ديما تجي للقصر هدا ، في حاجة تاانية تواا ركزت علييها !!، علااش بووي طريقة لبسه مش زيي مانعرفه قبل ، علاش مطول شعره لعند رقبته ، علاش شعره نازل على جبهته !، هادي الالوان بوي مايلبسش فيهاا ، صح هو في الوقت هدا بيكون اصغر في السن واكيد الستايل متاعه مختلف ،بس مش لهدرجة هو توا وكأنه شخص تاني ، لو هو مش بوي ونعرفه كويس راهو معرفتش هويته بمظهره هداا ، مافي حد قالي بوك كان شعره طوييل ، كانوا ديما يقولولي بوك من يوم يومه على نفس الستايل ومايغيرش فيه، بوي شعره عادي مش بالغزارة والسواد الغاامق هداا ، باااه خيييره توااا مختتتلف هلبااا ، نعرررف نعرررف انه توااا عمره صغير واكيد طريقة لبسه وستااايله مختتلف ، بسس مش لهدررجة ، هوو توا مشش هوو بالستايل هدا ، في حاجة غلط ولازم نعرفها
يهز فيه خاالد : نكللم فييك
محمد يشوف لبوه ويتبع فيه بخطوات هادية بش مايحسش بيه ، مادورش خالد وتامر يلي من بكري يكلموا فيه ويمشوا وراه
خالد وتامر قرروا انهم بيلغوا فكرة انهم بيمشوا لرهف اليوم ، خايفين على محمد يلي قاعد يتصرف بغرااابة خيييره هكي يتصرف
يمشي ومش مدور ولاا شخص ولااا ايي حد يمششي ويتبع في خطوات بوه ويين ماشيات ، هو وبوه حاليا في نفس العمر ^^، هههه سبحاان الله من كان يقول ان شخص يقابل بوه او امه وهما في نفس العمر ، السفر عبر الزمن يخلي الحاجات المستحيلة هادي تصير ، بس ياريتها تصير واحني جونا حلو ومستمتعين بالشي الغريب هدا ياريتها تصير من غير مانعرفوا حاجات ياريتنا مانعرفوها ، في حاجات مدسوسة تتمنى انك معرفتهاش -_-
يمشي ومش مدورهم وهما ورااه ، بسس اذكر حااجة، قبلهم على طوول : واحد منكم يراقبهالي !!
خالد وتامر نخلعوا منه كيف كان هادي وفجاءة قبلهم بتوتر
خالد ملامح وجهه مخلوعة : من هي ؟؟
محمد يأشر على القصر من بعيد : هي نفسها يلي خشت مبكري
تامر : غر هدي روحك توا نمشي اني نراقبهالك حااضر
محمد بعد ماعرف ان تامر بيراقبهاله ارتاح شوية سكت ورجع يمشي بخطواته الهادية ورا بوه
مشي تامر للقصر وقعمز بعيد شوية بش ماحد يحس بيه انه يراقب ^،^
اما خالد قعد مع محمد الشارد وتاايهه خاايف على صاحبه ، يبي يفهم خيره محمد ؟؟، ومن هو الراجل هدا ؟؟ ، بس فضل انه يسكت ،لانه محمد ملامح وجهه واضحة مش ناقص حد يتكلم معاه
أنت تقرأ
سايمون Simon (رواية ليبية )
Fantasyلما تنوض من نومك وتلقى كل شي في حياتك تغير جذريا ، ولما تلقى ناس من عصور مختلفة معاك وجايين كلهم بنفس طريقتك يلي جيت بيها ، كيف بتتصرف بش ترجع لعصرك وحياتك الطبيعية ؟ !! خيال +اكشن رواية باللهجة الليبية نتمنى تعجبكم ❤ #سايمون بِقلم : wesal_elhamh...
