طاح الليل و عم الهدوء و الناس راقدة غير السماء يلي اعلنت على حزنها و صوت الرعد يلي يبرهن غضبها و صوت المطر ليضرب بالقاوي فيلا رحماني يلي من عام معرفتش الهدوء ديما صوت العياط يوصل للبرا و اليوم حكاية جديدة و كذبة جديدة .....
سناء:كيفاش تسمحي لروحك تحطي يدك على ماما جميلة يا *#*#*
ضحكت ضحكة استهزاء:هههه جات شكاتلك افف اصلا واش يجي من وحدة مقطوعة من الشجرة (و شافت فجميلة) و وحدة من تربيتها ههههخ
سناء شعلت فيها النار بدون سابق انذار رفعت يدها و ضربتها بكف بكل قوتها طيحتها عالارض قربت لعندها و تهز فصبعها عليها
جميلة:خلاص بنتي محبيتش نحكيلك علبالي تتهوري ...
سناء:يا ماريا يلي للدرك لقبها منعرفوهش نقول كلمتين حطيهم مليح فراسك كلش كلش غير ماما جميلة فهمتي و انت هنا حابة آسر يكون ليك مالا حطيها فراسك انا وياه غير الموت لتفرقنا .....
قص عليهم صوت رجولي من وراهم
آسر:سناء
تلفتو ليه و ماريا بدات تبكي و تمثل
ماريا:😭😭😭آسر حمدالله كي جيت ها شفت تحامو عليا و تهددني و تقولي بعدي على اسر واش ذنبي انا علاش ديرولي هكا
آسر عينيه ولاو حمورا اكره حاجة عندو الظلم (و هو معلبالوش بلي راح يولي اكبر ظالم التسرع واش يدير)
جبدها من يدها و دزها بعيد
اسر:نقولك و نعاودهلك ماشي #*#* كيما انت تجي تهدد مرتي فهمتي و انت يا يما جميلة يلي رباتني على الحق و ديما تقوليلي ربي ميحبش الظلم وين راهي صحة كلامك درك
جميلة:اسر ولدي
سناء:ماما خليني نهدر انا ناضت و قربت لعندو و عينيها يقدحو خلاص فاض الكاس و ساح تحملت بزاف اليوم تفريها معاه
سناء:ولدي عمي العزيز و حبيبي سابقا كامل علبالنا علاش تزوجت بيها و انت متعرفهاش منين هي و لا اي حاجة عليها جبتها للدار و خلاص و درك وحدة كيما هذي تحط يدها ...قطع عليها
آسر:مدخليش روحك بيني و بين مرتي منعرف عليها والو صح بصح طلعت اشرف من شي ناس لغدروني و شكونها هذي ماماك الخدامة هذي
جميلة عينيها تغرغرو و حبت تبكي
سناء شافت فيه زمان و طلعت لبيتها من غير كلمة زايدة ....
مد يدو نوضها و هي تدلل عليها زعما تبكي ...حط يديه على خدودها يمسحلها الدموع و رفع راسو على صوت الطالون من فوق ...
هابطة فيدها فاليزتها و معاها جميلة ....
ناض من الفوتاي و قرب لعندها
اسر؛وين هبلتي وقيلا
سناء:ولد عمي تقدر تبعدلي نروح
اسر شدها من يدها و زير عليها:مكانش روحة تبقاي هنا فسجني متنسياش راكي مرتي.
ضحكت ضحكة انكسار:ههه مرتك ههه عاودها مسمعتكش مليح بعد خليني نروح تقبل #*## كيما انا تكون مرتك لا مالا بعد و نطرت يدو و راحت تجر فاليزتها ....
اسر:تقدمي خطوة تندمي
سناء و هي تمشي:عندي شحال ملي ندمت بصح نظن درك جات دالتك باش تندم و باش يظهر الحق و مراحش تلقاني قدامك يا سي اسر يلي نكر كلشي حتى المرا لرباتو امشي ماما جميلة ....
فتحت الباب خرجت و ضرباتو بالقاوي .....
حس بقلبو تزير و احساس يقولو خسرتها يا اسر خسرتها .... دور عينيه عالدار الكل حتى للدرك استوعب واش هدر كبس على يدو و طلع للبيرو تاعو.........
فجيهو خلاف فالعالم المظلم فعالم الشر و الظلم ....
فبيت مظلمة غير ضوء الشموع و.طاولة مدورة فالوسط قاعدين ربع رجال و كل واحد شد وحدة فحضنو بيناتهم بطلنا المجهول و فحضنو حبيبتو و لا نقول عشيقتو.خير شادها بيد و اليد الاخر على الطابلة و يضحك ضحكة انتصار
...:مبروك عليك يا سي مجهول
السيد مجهول :اممم كملت السهرة غدوة على ساعة سبعة دراهمي يلحقو
كبس على يدو ...:ايه
ناض و حملها بين يدها و هي دروت يديها عليه و راسها فرقبت. تشم فريحتو لتعشقها و تموت عليها ....
السيد مجهول:اممم نظن اليوم مش كيما الليلات لفاتو مراحش تحرميني من حضنك الدافي و دخل راسو فرقبتها ....
غمضت عينيها تستوعب فواش راهي دير عقلها يقوللها ريان فيقي واش راكي ديري راكي مخطوبة لولد صاحب باباك و انت في مهمة كيفاش تخوني خدمتك هكا و قلبها ريان اليوم راح تربحيه و يكون ليك متخميش فحاجة واحد اخرى اغتنمي الفرصة مع الشخص لتحبيه راهو جاييك برجليه فرصة ما تتعوضش ...... بعد صراع كبير وصلو لبيت حطها عالفراش و شاف فيها ...
السيد مجهول:ريان ... نسنى جوابك
غمضت عينيها :ريان ليك و ديما ليك ...
و استسلمت لمشاعرها ......
