استاذي ....
زينب علي .....
______________
كوثر :
مرات تحس انو القدر يلعب دوره بلحياة وشي مكتوب عليه لابد انو اشوفه كدام عيني ....
دخل عليه حرب وهو يباوعلي كأنو اب وحاس بلمسؤليه : احمم انتي تدرين ظاهر يريدج لو لا ؟
كوثر : من زمان يريدني مو من هسه . ..
حرب : اي ما شاء الله دامج تعرفين بعد ليش ؟ وافقي وسكتي ...
كوثر : انت موافق ؟؟؟؟
حرب : اني شعليه اني راح اعيش لو انتي هلشي انتي تقررين مصيره ؟ هاي حياتج وهلشي من حقج ...
كوثر : اني الي تكوله انت اني موافقه عليه ترفض من يمك وتقبل من يمك ...
حرب : كوثر اني حرب اخويه . ويزن اخويه وعدي وقصي . ذوله اخوتي واحبهم واكيد مراح ارفض يوم من الايام واني اشوفج انتي بأمان ....
كوثر : مو كتلك تقبل اني اقبل ترفض اني ارفض ....
حرب : ظاهر راح يبلغ ابوج . بهلموضوع ....
كوثر : هاهيه ....
.
.
مرت الايام واني كل يوم ازداد رعب وخوف وقلق وجيه ظاهر هو وزوجته واولاده بدون سابق انذار . خلاني بموقف صعب . انو شراح يصير اذا عرفت . وهلشي قلقني وهستر اعصابي .....
ضليت اسولف وي امي وهيه تكلي : شمدريني كوثر شمدريني ماما . ان شاء الله متسوي شي . لتخافين وذبي امرج وره ربج الي خلقج هو تكفل بيج ...
اسبوع همه جايين ومستقرين ابيتهم . واتصل بحرب ظاهر يريد يجي ويحجي ويانه ...
حرب : يوووم تره ظاهر يريد يجي ؟ حظرو رواحكم ....
بدت امي تطبخ الاكل الي يحبه ظاهر وهو طلبه من اول ميجي : سولنه تمن احمر ..
الاكل الي مستعد حتى يتريك بي . حظرنه الغراض وكملنه وانتظرنا . واني اكو الف حجايه براسي . واحس الكلام الي بدماغي مسوي هوسه . بحيث حتى الي يحاجيني ما اسمع شيكول وشيحجي ....
سويعات جان ظاهر موجود يم بابنه وهو يسلم بحراره على حرب .
وحرب فرحاااان بي وطاير من الفرح .
دخل للبيت طلعت امي سلمت عليه : هاااا تمن احمر علويه
ليلى : اييي ابسط عيني ....
مر هذا اليوم بين ضحكه وسالفه وغده عائلي وكرزات ونمنمات واني كاعده اريد اسمع شنو قراره وشنو مصيري شراح يصير واني محلي من الاعراب شنو . لحد ما نطق : علويه اني اجيت افتح وياج موضوع زواجي بكوثر ....
ليلى : ادري بي . واعرفه بس اني اسال ؟ كوثر وين راح تعيش ...
ظاهر : من بعد اذنج ام حرب . تسمحيلي يكون الحجي كدامها هيه .
