اماني جات راجعه من الشغل بدري ومشت محل الحلويات واشترت جاتو وحلويات متنوعه وفواكه بكل اشكالها واصنافا ورسلتا قبلها مع السواق بيت شهاب!!!
لميس استلمت الحاجات ودخلتا التلاجه ومديحه قالت ليها بالنسبه للمشروب نعمل شنو ؟
لميس : مشروبات غازيه
مديحه : عندي فكره اصلا هم م كتار نعمل عصير مشكل اربعه الوان والفواكه راااقده..
لميس : حلووو تمام 😍 متفقين ... اعملي انتي طيب 🙂
مديحه سكتت حبه وبعدها قالت في تردد : ناس ابوي اتصلو قالو بجو في الايام الجايه دي ...
لميس في ابتسام : يآنسو ويشرفو معقوله تاخدي راينا في حاجه زي دي ؟!!
مديحه : انا عارفه انكم اصيلين بس الاصول اصول...
🖤❤🖤❤
أشرف اتصل بي أشجي وما ردت ليه كالعاده وبعدها قفلت التلفون ومشت تلبس عشان الخطوبه حقت جود...
امها جات جايطه وقالت ليها : يابتي فضل ليك امتحانين كان تخلصيهم بعدين تمشي محل دايره.... غلبتيني عدييل وابوك جاري ليك قدامك وبنفذ ليك كل اوامرك ...
أشجي طبعت قبله علي خد امها وردت في احتجاج : ماما 😔
فجأه تلفون الام رن عاينت لي الرقم وهي بتقول ده رقم منو كمان!!
أشجي قالت ليها كدي لحظه ماما وعاينت للرقم... وبعدها فتحت الخط وردت : اهلين🙂
- كيفك حبيبتي مالك اتأخرتي؟
* بلبس... ربع ساعه واكون معاكم ...
قفلت ومدت التلفون لي امها بس الام قالت ليها : ماشاء الله كمان اديتيهو رقمي ؟ ورقمك مالو ان شاء الله ؟
أشجي : مقفول . .
- بت زي القمر وصغيره وغنيه دايره بي واحد عنده ولد شنو ؟ لو علي قرايه الجامعه بره ابوك قادر يقريك في إكسفورد عديل ...
* م عايزه غيره ماما😔
- انتي حره بعدين لمن تتطلقي وتجي راجعه خلي ابوك يغني معاك.. براي سويتا في نفسي😕
أشجي في زعل : فال الله ولا فالك ماما...جهاد بحبني وهو زول ناضج.. اطمني انتي بس وحاولي اقنعي بابا يوافق بالزواج بعد الامتحانات ...
الام : ما عندي شغله اقنعيه براااك وما تخافي في النهايه بنفذ ليك رغبتك ...
🖤🖤🖤🖤
طلع اشرف ومشي قريب من بيت أشجي عشان اذا طلعت يتكلم معاها بس بعد نص ساعه لاحظ انها طلعت بالعربيه حقت ابوها معاها السواق وطوالي تابعا لحدي ما وصلت بيت جود ونزلت والسواق مشي ...
