باللون الأحمر

الجزء 70

ما تنسوا التصويت على الحلقات

ماجد اخد دوش ومشي الغرفه يتفقد جود ... لقاها نايمه ... غطاها ...وقبل جبينا في حنان ... حست بيه ... فتحت عيونا ... رفعت راسا ... مالك حبيبي فيك شي ؟

- لا انا كويس جيت اشوفك متغطيه كويس ولا لأ ؟

* حبيبي 😍 ربنا ما يحرمني منك ان شاء الله ..

- ولا منك يارب ... اسمعيني كملي نومك حبيبي ولما الفجر يأذن ح اصحيك نصلي جماعه وننوم طيب ؟

* انت ح تمشي وين ؟ 😔

- جمبك ... ح امشي اصلي في الهول عشان ما ازعجك ...

* لا حبيبي صلي جمبي عشان اكون مطمنه 😊

- حاااضر

فرش المصلايه في الغرفه وبدأ يصلي ركعتين ويستغفر ويدعي وتاني يصلي ركعتين لحدي صلاه الفجر ... بعدها صحي جود وصلو سوا وبعدها ناموا...

💙💙💙💙

ايهاب شال بطانيتو وطلع ينوم في الهول ... مديحه لحقتو بره وكوركت في وشو : انت لو متضايق مني للدرجه دي ... رجعتني لييي ؟ عشان تعذبني يعني ؟

ايهاب في ضيق : عشان قسمه الفي بطنك ده ... واقصري الشر يا مديحه خليني انوم عندي عمليه بدري ...

مديحه وهي حاقبه يدينا : شغلك ده ما اتذكرتو لما كنت في النادي مالك ؟

كلمه منها وكلمه منو لحدي ما جات ام ايهاب كوركت فيهم : انتو ما بتخجلو ؟ كل يوم مسمعين الجيران ؟ فضحتونا في الحي امرق اخلي ليكم البيت ده يعني ؟

ياخ لا بتراعو لي ولدكم الجايي ده ولا كيف ح يتربي مع مشاكلكم دي ...

ايهاب باس راس امه بس هي قالت ليهو : انا عايزاكم تعيشوا زي الناس عايشه البيوت اسرار وياما في ناس صابره علي المر ... انت شغلك اتصلح الحمد لله ورجعت مرتك ليي ما تحاولو تكونو سعداء مع بعض ? وانتي يا مديحه صاح الحمل بخلي المره عصبيه شويه بس كمان انتي زودتيها شويه ... حافظي علي بيتك وراجلك وطولي بالك واكسبيه ...

مديحه : شوفي حتي ما انتظر تتمي كلامك هو ما بحبني يا امي 😭

ام ايهاب : حببي فيك... يا بتي اهتمي بي نفسك انتي ما شينه ... وحسسيهو انك بتحبي ...

💜💜💜💜

ماجد قعد جنب جود وهمس في حنان : ملاكي... قومي يا روحي... اشتقت ليك ياخ ... كفاياك نوم حبيبي ❤

جود غمغمت في نعاس : مااجد خليني انوم تعبانه انا 😔

ماجد : عارفه الساعه كم 12 ظ لازم تفطري عشان تاخدي حبوبك حبيبي 😅

فضل يمر يده علي شعرها في حنان : بعدين نسيتي السفر ؟ منتظرانا تجهيزات وكده ...

جود قامت في كسل وبعد اخدت دوش مشت المطبخ لقت ماجد مجهز الفطور فول وبيض وطعميه وجبنه وعسل ...