فضلت جود جاريه ورا الدكاتره وهم شايلين المريضه وداخلين علي العنايه ... وصلت الباب بس الممرضه قفلتو وهي بتقول ليها ممنوع ي استاذه اتخيل لي بتعرفي تقري !!!
جود فضلت واقفه بره تمشي وتجي والدموع ماليه عيونا... محتاره م عارفه تعمل شنو ؟يارب انت الشافي .....يارب عفوك ورحمتك ......يارب م عايزه اعيش فقدان الاخت تاني ........ ارحمني ياارحم الراحمين ..... اشفيها وعافيها يارب ......
فجأه حست بي حركه رجلين وراها اتلفتت وكانت ممرضه.. قربت منها وسألتا في خوف : ساره الكانت في الغسيل قبل شويه مالا ؟ فجـأه دخلوها ICU حصل ليها شنو اثناء الغسيل ؟
الممرضه : كانت كويسه بس فجأه خشت في كومه ...... مضاعفات بتحصل احيانا لمريض الفشل الكلوي ......
جود : ح تعيش ؟ 😭
الممرضه : الاعمار بيد الله .... في ناس عادي بتتجاوز الحاجه دي وتفوق من الغيبوبه علي حسب المناعه ....
جود ذادت في البكي وما عرفت تعمل شنو؟ في النهايه اتصلت علي ابوها وامها وكلمتهم ....
💟💟💟💟
فضلت ساره في غيبوبه يومين والكل كان منهار وخايف عليها ......جود م فارقتا لحظت كل ما تلقي فرصه تدخل تتكلم معاها وتبكي وتترجاها تفوق وما تمشي وتتركا .....والممرضه تجي تطلعا بالقوه ..... وفي اليوم التالت من الصباح جا ساجد المستشفي ولميس جرت عليه وصرخت في وشو : جايي لي شنو ؟ عايز تقضي عليها مره وحده ولا شنو ؟ كله بي سببك انتكست وحصلت ليها مضاعفات اثناء الغسيل والاطباء لحدي اللحظه دي مستغربين م عارفين السبب شنو ؟ عارف حصل ليها شنو ؟ اتقهرت منك وقلبها الضعيف ما قدر يتحمل 😭😭
سكتت حبه وواصلت في وعيد والدموع في عيونا : الله في سماه ...لو لا قدر الله حصل ليها شي الا اخليك تشتهي الموت 😡
ساجد انتظر خلصت كلاما ومشي علي شهاب سلم وكفر ليه وقرب من جود وامها وقال ليهم في حزن : انا م قصدت حاجه الموضوع كان مفآجأة بالنسبه لي ..و خوفي كان موش من انها مريضه..... انا خفت علي الزوله الحبيتا واختارها قلبي .......الدنيا كانت سوداء قدام عيوني ... كلكم واولكم هي ..... اعتبرتو اني اتخليت عنها ..... لا مستحيل انا كرهت نفسي كيف ما حسيت بيها وهي بتتألم؟ كيف ما لاحظت كل سبت وتلاتا بتكون قافله تلفونا لمده اربعه ساعات .... انا فعلا م بستحقها ....
جود طبطبت عليه في حزن وقالت : ادعي ربنا يشفيها ويقوما لينا بالسلامه ...
ساجد : ممكن اشوفا ؟؟
جود : ايوه بس م تطول !!
ساجد فرح ومشي علي الباب وهو بقول : شكرا .
الدكتور جا طالع من الغرفه ولقي ساجد واقف واستأذن منو بس هو رفض وقال : ي جماعه كده م كويس علي صحه المريضه..... بعدين دي عنايه ما عنبر!!
