اتلفتت جود عشان تشوف صاحب الصوت وكان شاب ثلاثيني ...انيق... اسمراني
* عفوا
- موش انتي شيرين صاحبه Style ؟
* انا شغاله هنا ....
الشاب عاين ليها من فوق لي تحت في دهشه وحس انو محرج ومشي ولسان حاله بقول بتستظرف ولا شنو دي كمان؟
وئام عاينت للصوره وعاينت لي جود : انا في ذهول البت دي بتشبهك فعلا ... اتخيلي لي لحظه افتكرتك انتي ... م تلومي الشاب بصراحه الشبه خيالي ... لازم تجيبي زيت البت دي... امكن تكون اختك في الرضاعه ولا حاجه 🤣
* وئام انا م ناقصاك اصلا متوتره وكمان الشبه البيني وبين شيرين دي محيرني ....
مكاوي كان واقف مع مجموعه من الناس وبعدها جا علي جود : مبروك جود شفتي المحل فخم كيف ... دي الحاجه البتناسبك اصلا! صح نحن في الصاله ناسنا كمان محترمين بس هنا افضل ليك بكتير
* شكرا سيد مكاوي الفضل لي ربنا سبحانه وتعالي ثم ليك انت 🙂
-موفقه جود 😍
جات مدام سهير عشان تقص الشريط وتفتتح المحل وسط جمهور من رجال الاعمال وسيدات المجتمع وعدد كبير من الصحفيين ...بعدها ضج المكان بالتصفيق والتبريكات لمدام سهير وسيد مأمون ....
جود كانت مرتبكه شديد وواقفه جنب زميلتها ووئام بس بعد شويه جات موظفه وقالت ليها مدام سهير طالباكم .....
اتقدمت جود بخطي متردده ووقفت قريب من سهير منتظره تخلص كلاما مع مجموعه سيدات وبعد دقايق اتلفتت سهير عشان تتكلم مع جود بس فجأه اتسمرت في محلها ومسكت راسا وفقدت توازنها وكانت ح تقع علي الارض بس جود جرت بسرعه ومسكتا وهي بتصرخ : حاسبي مدام 😰 خير ... انتي كويسه ؟
سهير م ردت بس فضلت تعاين في جود في صمت ودموعا جاريه بغزاره وده خلي جود تقول في حيره وخوف : انتي كويسه ؟ طيب يلا الاستراحه ارتاحي شويه
سهير من خلال دموعا: انا كويسه ي بتي اطمني.....
جود : طيب ممكن اساعدك بي شنو ؟
سهير : نادي لي مأمون بس ... لو م فيها ازعاج
جود :العفو مدام...طيب حاضر 🙂
جود جابت للمدام كاسه مويه وطلعت بسرعه تسأل عن مأمون وفي اقل من دقايق جا مأمون ونفس حاله الذهول انتقلت ليه وقال ليها في خوف : انتي منو ؟
جود : انا جود شغاله في بيت الازياء تبع مدام سهير
مأمون في حزن وشرود : اسي بس عرفت سهير اختارتك ليي؟
جود : عفوا سيد مأمون قلت حاجه ؟
مأمون : لا لا ي بتي شكرا ....بعرف طريق المدام ممكن تتفضلي انتي وتشوفي شغلك ...
