محاسن قعدت تبكي بعد فشلت في اقناع ماجد يسيب السفر ... سحر قربت منها وطبطبت عليها وهي بتقول في ضيق وعيونا علي ماجد : يعني الواحد م عنده مانع يكسر قلب اقرب الناس ليه عشان خاطر بت جرحته 🤔
ماجد في حزن : انا قررت السفر عشان حاجات كتيره وجود م عندها دخل بي قراري ولو سمحتي م تصعبي الموضوع علي اكتر من كده ...
محاسن مسحت دموعا وفي رجاء : طيب يا روحي انتطر اخوك يجي وسافر اسي نقعد انا واختك برانا والبلد دي بقت ما آمنة ...
ماجد قرب منها وقبل راسا ورد في اسي :بكون متواصل معاكم طوالي،،، وبعدين عايز لي بس شهر شهرين اتلمي علي نفسي وبرجع معقوله انا اقدر استغني عنكم يا ست الكل ؟ انا عندي منو غيركم انتي وسحر وساجد ...
سحر في حزن : بس لو تورينا الحصل شنو بينك وبين جود ... من يوم الخطوبه والامور ملخبطه انت مخبي وهي كمان مخبيه
اخدت نفس عميق وبعدها : علي العموم ربنا يوفقك وما تغيب عننا عارف م عندنا غيرك انت سندنا ...
ماجد ضماها عليه وباس شعرها ودخل علي غرفته ...
🖤🖤🖤🖤
مشي آسر عشان يفتح الباب واندهش لما لقي ماجد واقف قدامه ومعاه شنطه صغيره !! بعد سلم وقعد في الهول مد الشنطه لي آسر : الامانه دي بتخصك ورغم انو الاعتذار ما بغير حاجه بس بعتذر وبشده عن كل الحصل ليك وبتمني انك تتجاوز الحصل وتبدأ من جديد وتنسي كل الفات واكيد انا عند وعدي ليك اذا احتجت اي شي بخصوص المشروع حقك... رقبتي سداده وحتي اذا بقيت بره البلد دي ممكن بي تلفون اعمل ليك كل البقدر عليه ...
آسر ابتسم في امتنان وطبطب علي كتفه ورد : عارف انك قدرها والله وشكرا جزيلا ...
سكت حبه وبعدها : بس ما قلت لي ح تسافر انت؟
ماجد في استياء : ان شاء الله
آسر : صدقني ما بتقدر تنساها ...
ماجد في ارتباك : منو ؟ شنو ؟ قصدك منو؟
آسر : انت فاهم قصدي وياريت تفكر تاني من جديد والمسامح كريم ،،،،
ماجد في حزن : كل ما اشوف طيبه قلبك وتعاملك الراقي احتقر جود اكتر واندم اني كنت عايز ارتبط بيها وتكون ام لاولادي 😥
آسر : جود طيبه وكل العملته انا عذرتها والدافع قوي وبتمني انت كمان تقدر تسامحا وتغفر ليها،،،،
ماجد وقف واتجه نحو الباب ومد يده : بتمني اسمع عنك كل خير 🙂
آسر : شكرا ليك وربنا يوفقك مع الف سلامه...
🖤🖤🖤🖤
جود فتحت الرساله وقرت (ماجد مسافر بي طياره 8 صباحا ) خفق قلبها بقوه وارتفعت درجه حرارتا .... لميس لاحظت ده عليها وسألت في قلق : خير جود 🤔 الرساله فيها شنو ؟ ومن منو ؟
