ما تنسوا التصويت على الحلقات
في لحظه قرر يسيب كل شي ويشيل قروشه ويهرب لي ابعد مكان وسيطرت عليه الفكره ومشي بسرعه علي التربيزه عشان يشيل شنطه القروش بس سمع صوت عالي وضجه شديده ... اتلفت عشان يشوف الحاصل لقي عربيه الشرطه 999 هاجمه علي المحل وحصلت فوضي كبيره في المطعم والناس بقت تجري شمال ويمين والعساكر انتشرو في كل مكان وبدو التفتيش.... يظهر في بلاغ عن حاجه غير مشروعه في المطعم ....وبعد شويه جا كم عسكري شايلين لحوم من جوه ومعاهم دكتور بيطري ... وسط ده كله آسر كان تائه بعاين في ذهول وكمان اشرف والمحامي و بعد لحظات الاحوال هدت شويه وتم القبض علي صاحب المطعم ....
فجأه آسر انتبه وعاين للمكان الموجوده فيه التربيره وما لقاها اصلا لانها كانت مرميه زيها وزي باقي الترابيز والكراسي في المطعم ... فقد الشنطه وبقي يرفع في التربيزه ويكورك : القروش 😨 وين الشنطه ؟ كان في شنطه هنا ... دقيقه ي جنابو انا فقدت شنطه قروش م تخلو زول يغادر المحل .....
اشرف بقي يعاين ليه في توتر ويقول : كيف م لقيت الشنطه؟ نحن م وقعنا العقد لسه ... وبعدين تلت ارباع الناس خافت وهربت لما شافت العساكر منتشرين ... واذا شنطتك اتسرقت فعلا اكيد الحرامي ما بالغباء اليخليهو ينتظر لمن تمسكو!!!!
المحامي حني راسه وهو بضرب في يدينو مع بعض في حسره ويقول : لا حول ولا قوه الا بالله ربنا يعوضك ان شاء الله ...
آسر بقي يكورك بصوت عالي : ي جنابو اقبض علي كل الناس الهنا دي انا بتهم كل الموجودين واولهم اشرف لانو هو الجابنا هنا ...
اشرف في غضب : ي زول انت مجنون ولا شنو ؟ عايز تلبسني جريمه ساي؟ اسي انا اتحركت خطوه من جنبك ؟ ده آخر المعروف .... ي جنابو المحامي والزول التاني ده شاهدين انو انا م اتحركت شبر من هنا الزول ده يظهر فقد عقله😡
بعد مجادله طويله كلهم مشو القسم ...
❤🖤❤🖤
مرت اكتر من اربعه ساعات ومافي خبر من آسر ولا من اشرف وتلفوناتهم مقفوله الاتنين ... جود حست بالقلق وكان عندها رقم صاحب المطعم وعلي طول اتصلت بيهو عشان تعرف الحاصل شنو ؟ وطبعا اتصدمت لما عرفت آسر متهم أشرف وبعد تردد اضطرت تكلم جهاد عشان يمشي معاها القسم يشوف الحاصل شنو ....
شهاب جا طالع من الصالون وسأل جهاد بعد شافو مزعج وباين في ملامحه ... جهاد اتردد وبعدها جاوب : آسر متهم اشرف زميل جود انو سرق قروشه واسي انا ماشي اشوف الحاصل شنو ....
شهاب : واللما اشرف علي آسر شنوو ؟ اوعا يكون لي جود دخل في الموضوع ؟
جهاد سكت وبعدها : لا ي حاج ....وجود دخلها شنو بالموضوع ؟ انا بمشي اشوف الحاصل شنو واطمنك بالتلفون !!"!
