لدواعي عشقية... الجزء الثاني من ماضي للكاتبة/ فاطمة علي محمد (مكتملة) .

الفصل الحادي عشر

الفصل الحادي عشر.

#لدواعي_عشقية.
#فاطمة_علي_محمد.
#الجزء_الثاني_من_ماضي.

يوم جديد بزغت شمسه  لتنثر ضيائها، ودفئها بالقلوب، قلوب غمرها العشق، وأخرى غمرها الشوق، وأخرى كسرها الخذلان.

****
مديرية الأمن... تحديدًا مكتب  المقدم "على إبراهيم ".

إحتل مقعده بجدية وصرامة يطالع بعض التحريات الجديدة التي أتته عن هؤلاء الأوغاد عديمي الرحمة، والنخوة، لتدوي تلك الطرقات الهادئة التي حفظها على ظهر قلب. رفع أنظاره عن تلك الأوراق، ووجهها صوب ذلك الباب، هاتفًا  بحزم، وصرامة :
  - إدخل.
 
فُتح الباب، ودلف إلى المكتب "إسلام"حاملًا ملف ورقي يحمل بين طياته ماتوصل إليه  من بداية الخيط لحل لغز تلك القضايا المختلفة، والمتشابهة أيضًا، ليردد بإبتسامة عملية :
  - صباح الخير يافندم.

أشار "علي" إلى المقعد المقابل له، هاتفًا بحماسة، وفضول شديد :
  - صباح الخير يا سيدي.... إقعد ... ها وصلت لإيه؟..

جلس "إسلام" بالمقعد الأمامي لمكتب على، واضعًا ذلك الملف أعلى سطحه، ليدفعه نحو "علي" مرددًا بإنتصار :
  - إتفضل يا فندم.... كل التفاصيل في الفايل ده.

تناول "علي" الملف، وفتحه طاويًا أوراقه بنظرة عامة، وشاملة، هاتفًا :
  - أنا هستني لما أقرى كل ده!!.... قوللي وصلت لإيه؟

تنهد "إسلام" تنهيدة قوية بث بها العزيمة لروحه، مرددًا بجدية :
  -   كان عندك حق يافندم....  القضايا  متشابهة، وفيه روابط بينهم... بس مش الثلت  (٣) قضايا   دول بس... لا ده الموضوع كبير قوي... بقاله سنتين تقريبًا.....  في السنتين إتقبض على خمستاشر واحد، أو بالأدق مجرم، ودايمًا  أوراق القضية  كاملة ، ومتظبطة، وبيتمسك تلبس كمان.

إستند "علي"  بمرفقه على سطح المكتب ساندًا ذقنه بسبابته وإبهامه، وعلامات الإنصات، والإهتمام شكلت قسمات وجهه، ليردد بتحفير :
  - كمل... وبعدين.

إستقام "إسلام" بجلسته، وإستدار جزئيًا حتى صار مواجهًا لـ "علي" مكملًا بجدية أكثر :
  -  في الظاهر القضايا مختلفة، مابين مخدرات، ونصب، ودعارة... وكمان تهرب ضريبي.... لا دي كمان بعضها في محافظات  وأقسام مختلفة.... بس الغريب بقا  في القضايا دي إنها ماشية بمتتالية حسابية.... بالظبط ٤٩ يوم فرق بين كل حالة والتانية.

تراجع" علي" بمقعده مسترخيًا، ولازال يستند بذقنه على أنامله، مضيقًا عيناه بتركيز عميق، ليكمل "إسلام" موضحًا :
  - الأغرب بقا في الموضوع إن كل المجرمين دول  عندهم أكونتات على الفيس بوك، وكلهم حصلهم تهكير...  من إيميلات مختلفة عن بعض، وكمان من أماكن مختلفة عن بعض، فيه منهم اللي في سنغافورة،  في تايلاند، في جوا.... كيب تاون.. بودابيست.... وغيرهم كتير..... بس اللي أنا متأكد منه  إن الهاكر ده في مكان واحد، ولعبها  كده عشان يشتت تفكيرنا.