ماذنبي بكل ماحصل

البارت 7 هديه

#ماذنبي بكل ماحصل

#بقلمي anoo
_____________❤️مساء العافيه_________

هيله :
فجأه اجة ببالي كرومي، كرومي شاهد ويدري بكلشي وشاف كلشي ، كمت طلعت من الغرفة اصييح
هيله:كرومي كروومي
اكرم : هااا
هيله : تعال بسررعه
امي ورونق صافنات ، كرومي شنو دخلة بلموضوع !
هيله :كرومي بيووم بابا بلمستشفى تتذكر عمو الجان بلغررفة ؟
كرومي: اي عمو اجة يسوي الكهرباء
هيله :منو الجان يمة بلغرفة ؟واني ويين جنت ?
كرومي:هوة جان يم رونق بلغرفة يسوي كهرباء وانتي اجيتي جنتي يم بابا
هيله : كرومي روح يم سيف هسة اجيك
طلع كرومي ورحت سدديت الباب ورا ورجعت يم ماما دنكت يمهه
هيله : ماما والله العظيم هذا كرومي شااهد ، واني الماردتة يعررف من سألني منو هذا الويه رونق كتلة اجة يسوي الكهرباء لان خربتهه رونق ،

رونق احجي بحضج وبختج مو وكفتلج ليش تتهميني باطل ؟
رونق : ماما جذاابة وحيالة ، شجابرني احلف بلقران جذب لو مسوية شي مااخاف اكول سوويت بس والله مضلوومة ،
امي ماحجت شي بقت صافنة بوجوهنة ووجهها اصفر ، عافتنة وطلعت برة ،
التفتت على رونق
هيله: رونق لييييش سويتي هيج ؟ولج بشنوو قصرت وياج اني
رونق :شترديني اتحملهة وحدي ؟ مو انتي اختي ؟ خلاص طلعيني من هاي المشكلة يلا !
هيله : لججج وكفتي وياج وسترتي الج نسيتيهه وضاعت قطرة ببحر ! شوكفلج بعد فهميني ! ولج متخافين الله تحلفين جذب ! متخافين من الحوووبة رحمة لالله !
رونق :كاااافي عوفيني وطلعي براااا يلا
عفتهه وطلعت رحت لماما ، دنكت عليهه
هيله: ماما سمعيني ، ماما والله رونق تجذب ، يايوم شفتي هلية شي موزين ، يايوم خنتج وكسرت ثقتج بيه!

الام :كافي يمة كافي ، ولج تعبت وربيت وكبرت وسهرت وتحملت ذل صباح وعيشة العوز لخاطرجن ، شفتيهه شلون صخمت وجهي ؟ شفتيهه شلون تحلف بكتاب الله الصادكين يخافون يحلفون بي وهية تحلف جذب ! ولج شعبالج اني مادري ! كلششي توقعت منهه وكل مكسرة توقعتهه منهة بس هاي ماضنيتهه تسويهه ، فهميني منو الياخذهة بعد ؟ وين اطي وجهي بيهة ؟ ولج هلمرة العريس اجة من طرفي واكدر ارفضه اذا ابوهه جابلهه عريس ورفضت شكلة ؟ يذبحهه بمكانهه والله ! هيلة لا تحسبيني امج ولج حسبيني بتج واطيني حل شسوي بروحي هسة اني وين اطي وجهي بيجن ؟
هيله :يمة حليش الاطيج ؟والله عقلي واكف
حجيت هيج ودنكت غطيت وجهي بادية وبجيت كل حيلي ،
جرتني امي لحضنهه وبجت ،
ثاني يوم الصبح امي لبست عبايتهة وراحت لام كاظم ، ردتلهه خبر كلتلهه كليلهم البنية زغيرة وماتريد تزوج هسة ،وان شاء الله يلكون بت الحلال لابنهم التسعدة ،
رجعت امي للبيت بس وجهة بي فاتحة ، وصار يوم ونص مامخلية الاكل بحلكهه  وحالتهة حالة ،
الام :روووونق
رونق جانت كاعدة بلترك وسمعت صوت امي واجت ،
رونق :ها يمة
الام :وغمة الغمتج وغمت امج ، تعاي وراي للغرفة بسرعه گبل لايجي ابووج
طبت للغرفة ولحكتهه رونق ، كمشتهه امي من ايدهه
الام : تعااالي ولج ، شعبالج صدكت فعاليتج مال البارحة وحلفانج الجذب وتهمتج لاختج ؟ ولجج الله شمخلي بيج وتحلفين بكتابه جذب من انشلت ايدج انشاء الله ،
تعااالي كعدي سولفيلي منو هاذ الصخمتي وجهج ويااا ؟
رونق : طوول عمرج مبرية هيله وتاهمتني صدك وجذب تاهمتني
الام :اكلي تبن وهاي اختج تشررفج ياعاار ، ياكحبه. ولج صخمتي وجهي ووجه ابوج الله يصخم وجهج دنيا واخرة ، كعدي سولفيلي لا انفطج واحركج والله العظيم ،
رونق :شصخمت من وجهج ؟ لا تحسسيني كأنما احنة فد عائلة دينية محافضة ! ترا احنة رسنة هيج !
امي كامتلهه وعصرت حلگهه ، ولججج يارس التحجين علي ؟
رونق : علة بيبيتي طالعة يا امي !
امي جرتهه من شعرهه ،
الام: اشك حلكج اذا عدتي هذا الموضوع ، ولج عار فوك شينة گوات عينة ،ولججج حاجيني منو هذا خل اشوفلي حل الله ينتقم منج ان شاء الله ،
رونق بدت تحجيلهة عن ياسر ودلتهه ببيتهم ، امي حفظت العنوان وعافتهه على باجر من يروح ابويا لشيمائو ، تروح عليهم هية ،
اجة ابويا المغرب كلعادة بس تعشة وصعد كابل الطيور ويغني وصوتة ازعاج بازعااج ،
وامي كاعدة وحاطة سيوفي بحضنهه وحتة ماتخيط صارلهه يومين بس تتصفن وحايرة بزمانهه ، واني ورونق بلهوول
اباوع لرونق ولا جنهه وولا مهتمة كاعدة بكل بروود ،واني اكل بروحي بدلي اكوم اذبحهة هسة واشفي كلبي
ثاني يوم الصبح ماعدي دوام لان انطونة عطلة مراجعه قبل امتحانات الوزاري كعدت الصبح كملت شغلي واشوف ماما تفتر جنهه كاعدة على نار
هيله:ماما شبيج ؟
الام:يمة شيجيب العصر يايمة
هيله:شعدج ؟
الام :ارد اروح لبيت هذا المفجوع الاختج صخمت راسي ويااا 😒
هيله :وشتكليلهم ؟
الام :الوي شاربة ويجي ياخذهه غصبا علي !
هيله :والله مادري يمة بلكي تفض بستر بلا مشاكل
الام :الله كررريم
صارت الساعه 4 العصر ، ماما عافت سيوفي يمي واخذت اكرم وراحت لبيت ياسر واندلت بيتهم حسب الوصف بلشارع الورانة ..
دكت الباب عليهم ، طلعت ام ياسر فتحتلهه الباب
الام :السلام عليكم
ام ياسر:وعليكم السلام تفضلي عيوني
الام :خية هذا بيت ام ياسر
ام ياسر :اي عيني منو حضرتج ؟
الام : خية جايتج بمطلب اكدر اطب جوة نحجي
ام ياسر :سالفه خير ، اي خية تفضلي
فاتت امي جوة وكعدت يم ام ياسر وحجت الموضوع وسولفتلهه الصار ، وام ياسر لطمت وصاحت على ابنهه وصاحتة وكعدتة حتة تفهم شنو الصاير ، وياسر هم ماقصر خرط الاول والتالي وطلع سوالف رونق كلهة ،
الام : اذا ما تقدمت للبنيه وسترت عليهه ،احول السالفه عشاير ومنك لابوهه ولكرايبهه،
ياسر : وعلى يا اساس اتكعد للعشاير ؟ اوراق بتج ورسايلهه بخطهه وعدي والحجي كلة موجود بيهن ! وهية الافترت علية وهية الطببتني للبيت بذاك اليوم وهية الطلبت مني اسوي وياهه ذيج الشغلة ،
وزواج من البداية كايللهه ما اتزوجج وهية استمرت وياي ، وبلفعل ما اتزوجهه وولا مفكر اخذ هيج وحدة

وبلنسبة للبيهه خل تحير بروحهه محد غصبهة على شي ،وتفضلي برة بلا مطرود !
امي من سمعت الحجي هيج وكام ياسر وجابلهه الرسائل وقرتهن طلعت من البيت وهية مدنطة راسهه وتجر بروحهه جر ، طبت للبيت وتلكيتهه ردت افهم شي منهه ماحاجتني كبل فاتت للغرفة ،
اجة الليل وصاحتني يمهه وسولفتلي كل الصار
هيله : يمة شراح تسوين ؟
الام : ما ادري يمة ، لو عدي زلم جا ذبحوهه وذبحو بسس ماعدي احد بضهري يطلعلي ربع حق ، يمة اني تالي عمري هيج اتصخم ؟
دنكت وسكتت ماحجيت شي لان ماعدي ولا نص كلمة اكدر اواسيهه بيهه ، ضليت اردد بكلبي (حسبي الله ونعم الوكيل بيج يارونق )
عفت امي حتة تنام وترتاح واخذت سيوفي انومة يمي ، ورونق كاعدة بلهول ولاجنهه
رونق :ها شصار ؟
هيله :والج عين وتسألين ؟
رونق :بلا هلفعاليات البية كافيني جاوبي شصار ؟

سولفتلهه كل الصار ، واباوع عليهه ما اهتمت دارت وجهه وسكتت ، اني هم من شفتهه مامهتمة كلت طبهه مرض عسى ما تنذبح هية جابتهه لروحهه ، وخصوصا ورة ما اختلفت علية حيل حقدت عليهه وضجت منهه ، وماكاسر كلبي بس امي والموقف الانحطت بي حيل اذاني هلشي  ،

فرشت فراشي ونمت ونومت كرومي وسيف يمي ، واني ما ادري شمنتضرنة ،
مرت الايام بسرعه وطول هليام مالت المراجعه اني نفسيتي صفر مالزمت الكتاب ولاقريت ، وحتة ماما مامهتمة ذاك الاهتمام بقرايتي ، وكرومي كمل امتحاناتة واستلم نتيجتة من زمان وناجح لان شطور دائما جنت ادرسة اول باول ومهتمة بي ، ورونق طول هلفترة هادئة وماما ماحجي وياهه وولا تباوع بوجهه اصلا ،
رونق :
خلصت الحلول الكدامي ، وتعبت كدما احرك بنفسي بلتفكير ،وطول هلمدة بابا ميدري بلصار كلة ، وبديت ادور على حلول ، بحيث عقلي يوكف من التفكير واتعب وانام يومية بليل على هل حالة ،
فد مرة عصرية اباوع من الباب وشفت ابن جوارينة بيتهم مقابيل بيتنة ، وما اعرف شنو اسمة بلضبط ، وعينة صدت علية ، اني راسا سديت الباب فتت جوة ،
اجت ببالي فكرة جهنمية بسس يراد احد يساعدني بيهة حتة اخلص من الاني بي ، وما اكدر اطلب مساعدة هيله لان من ذاك اليوم لهليوم هية متجنبتني وعلى كد السلام وياي ، وماما نفس الشي ،
بديت افكر بهل خطة واتخيلهه وارتبهه ببالي ، واكثر من اسبوع ببالي هلفكرة ، اخر شي قررت انفذهه ، ماعدي شي اخسرة
بديت ادني واهس لهلولد الشفتة بلباب ، وحسيتة تفاعل وياية ، بديت اتعمد افتح الباب كل شوي ،وهوة مبين بعدة مراهق ومندفع ومشايف الحب شنو ، يوم عن يوم بديت اتمادة بحركاتي واسويلة اغرائات في سبيل اجيبة للدرب ، وحسيت بلنجاح بهلشي ، اخذت كرومي بيوم ضهرية وطلعت على اساس اشتريلة وطبعا محد حاس بلجاي اسوي بهلفترة ، وشفتة واكف بلباب فتت امشي قريب منة واتدلع ،
ومشيت بطريقي ، حسيتة يمشي وراية الى ان وصلت للمحل الجان عبور الشارع يعني مكان شبه منعززل ، سمعت صوتة
: من رخصتج
رونق :نعم تفضل
: اني هشام ابن جيرانكم ام طارق ، حبيت اتعرف عليج
رونق :اهلا وسهلا ،
هشام :شسمج ؟
رونق :اسمي رونق
هشام :انتي بنت ام ارونق الجبيرة صح ؟
رونق : ايي ، ما اكدر احجي وياك هنا ليشوفني احد يلا باي

هشام : بس خل اگلج شغلة وروحي
رونق :كول
هشام :اني معجب بيج
رونق ابتسمت وعفتة وطبيت للمحل اشتريت وطلعت وهوة يباوعلي وماكلني اكل بعيونة ، رجعت للبيت واحسة يمشي وراية ،
هشام :رونق شوكت اكدر احجي وياج ؟
رونق :بعدين اني اكلك روح هسة لا احد يشوفك ،
طبعا احجي وياا واخلي كرومي يمشي كدامي حتى ليسمع شي من الحجي ،
وصلنة للبيت واني احس بخطتني بدت تنجح شوي شوي
بسس شلون ياربي احتاج مساعدة مادبرهه وحدي...

#يتبع👈
قراءه ممتعه حبايبي 💚