ماذنبي بكل ماحصل

البارت 10

#ماذنبي بكل ماحصل

#بقلمي anoo
____________ مساء الفل ❤️🌺________

هيله : اليوم النتائج وكلش خايفة لان ماقريت زين ومجاوبت عدل بل امتحانات ، وماما كاعدة وتدعيلي بلكي انجح واخلص من الثالث وافرحهه ، صارت الساعه ب9 الصبح بدلت واخذت كرومي وياي ورحت للمدرسة اخذ نتيجتي ، والحمد لله طلعت ناجحة بمعدل 60 ، هم خير من الله ، رجعت بشرت ماما وفرحتلي وحضنتني وبوستني ، واخيرا ماخاب ضنهه بية ،
كلش ارتاحيت ورة ما استلمت نتيجتي وبالي استقر ، بديت اساعد ماما بشغلات الخياط البسيطة خطية لان تتعب هواي ، لو اخذ سيوفي منهه واخليهه تشتغل على راحتهه ،
وشيماء هم جان تجينة بين فترة وفترة ، طبعا هية صح وكحة ومو ادمية وكحبه  بس كلبهه فارغ ، وبسرعه تذب ميانة وي الواحد ، بحيث من تجينة عبالك بيتهه تكوم وتشتغل وتكعد يمنة...
ومتستنكف من شي ع الرغم هية من عائلة غنية وراقية وبغدادية ، وماما هم ما محسستهة كأنما ضرتهة ، تسولف وياهه وتشاقة وتاخذ وتطي بلحجي ، ابد ما يتمشكلن بيناتهن ،

رونق :مرت الايام وكدرت اكسب ثقة هداوي وكام تثق بية بكلشي ، وتسولفلي كلشي ومتضم علية وما اضم عليهة شي ، وهشام جانت عندة اخت متزوجة ببغداد اسمهة نورة تجيهم كل شهر مرة تبقة يومين وتروح ، وهلنورة شايفة روحهه وحلوة ومايعه ورجلهه مهندس بذاك الوكت وعدهه طفل منة وعازلة بيت وحدهه من عيالهه ، جنت احس هداوي تغار منهه او تضوج منهه وهيج شي ، وبيوم السمعت نورة اليوم تجي كلبت وجهها فقررت اسئلهه عن السبب ،...
رونق :شبيج كلبتي وجهج من سمعتي نورة راح تجي؟
هدى :يمعودة وجودهة مغثة ، 24 ساعه تخلصهه تتنعوص وتتعاير وزوجي وابني وعمتي وطلعت وطبيت وجبت واشتريت وصرفت ووووو..
رونق :اي عادي خل تسولف بلخير العدهه ليش لا
هدى:بعدج متعرفين دماراتهه شنو، تسوي هيج حتى تحرني (تخليني اغار) لاغير، وهسة تجي وشوفيهه حتى تبطلين تلوميني ،
رونق :تجي ونشوف شنو سالفة هلنورة هاي

صارت الساعه 1 العصر اجة طارق كال لامة اجت نورة ورجلهه هادي ، وطبعا عمتي جانت محضرة الاكل وطبخ ونفخ وكذا ،وطلعو استقبلوهه ، اني وهداوي بقينة واكفات بباب الهوول ، فاتت نورة لابسة بنطرون وقميص  وبدون عباية ، ومكياج وشايلة ابنهه ورجلهه يمشي وراهة ، وطبعا شكلهه حلو نازك والعيون خضر وبيضه ثلج ، صدك حلوة
نورة : هلو شلونكم بنات شخباركم
وقربت باوست هدى واجت باوستني
نورة :انتي العروسة الجديدة موو
رونق : اييي زوجة هشام 🙂
نورة : هااا اهلا وسهلا بيج
حجت هلجملة وهية معاجبهه الوضع فاتت جوة كعدت ،
راحت هداوي للمطبخ تجيب المي والعصير ورحت وراهة
رونق:شنو شو هاي معاجبهه وتحجي عاقجة وجهه
هدى:اي جا شكال البهلول ، هية هاي نورة تشوف العالم كلهه اقل منهه ، بس مطيتهه جنص ويجيهه الدور
رونق :جنصيش ؟ لعد غلطانة وياج قبل هية
هدى :مو شغلة غلطانة بس تتعمد تغثني واني اليغثني يقرة على روحة السلام ، وربج راحمهه وخلاهه بعيدة علية ، بس راح تبقة فد يومين تلاثة هنا ونتفاهم
رونق :على شنو تتفاهمون ؟
هدى:الج الصافي خية ههههه
رونق : بسلا راح تطكطكيلهه ؟
هدى : بلضبط يعيوني بس صبريلي وخلي ايدج بايدي ،
رونق :وياج خية وياج ههههه
هدى :كفوو
هيلة : ماما لازم اليوم اروح للمدرسة اودي باقي الكتب ،
الام :اي يمة اخذي اكرم وروحي
هيلة ماشي يمة خل اخذ سيوفي وياي خطية مخنوك بلبيت
الام : علوا طلعي وياج خل يتنفس،
بدلت لسيوفي وشلتة وخليت كتبي بعلاكة وشالهن الي اكرم وطلعنه نتمشى ضهرية ، شفت ولد يطلع عمرة بحدود ال 25 سنة اكثر ، يرسم على حايط مدرستنا ومبين هستوة بادي يرسم ، راسم بس اطار خارطة العراق، وبقيت واكفة اباوع على رسمات بدون ما ينتبهلي ،
اكرم : الله شكد حلو رسمة
هيله : اي والله شلون جايبهه بلمضبووط
بقينة واكفين نباوع وهوة ما منتبه النة ، بعدين حسيت على روحي
هيله: كرومي خل اطب اسلم الكتب واطلع ليسدون المدرسة
اكرم :ومن نطلع نباوع على الرسم مو
هيله : لا نرجع للبيت وباجر نرجع نشوف الرسم لا ماما يضل بالهه علينة،
اكرم :مااااا معلية ارد ابقة هنا والعصر نرجع للبيت
هيله :كرومي كافي عيب منا ناس كتلك باجر ارجعك هنا بس خاف ماما يضل بالهه علينة هسسسة ،
اكرم عوفيني هنا وروحي كلي لماما ورجعيلي
هيله : اهوووو اكرم كافي يلا كووم نروح
اكرم جر روحة ويتمرغل بلكاع ويبجي يريد يضل ، انتبه علينة الولد ذب الفرجة مال الصبغ من ايدة وقرب من يمنة اشر بيدة عود (شكو؟)
هيله: ميقبل نرجع للبيت يريد يبقة هناا يباوع عليك وانتة ترسم
اشرلي بايدة عود (عوفي )
هيله:ماكدر خاف امي يضل بالهه علينة ،
انتبهت للولد حجية كلة بل اشارة ، معقولة ميحجي ؟
هيله: عمو انتة ليش متحجي ؟
ضحك واشر بايدة فوك عود من الله
بيني وبين نفسي انقهرت علي شلون شاب حلو ومرتب وشاطر مبين من الرسم ماشاء الله ،
هيله: زين انتة تسمعني شاحجي ؟
اشر بايدة بمعنى (مو كلش) ، بديت احجي ويا وااشر بادية حتى يفهمني اكثر ،
هيله : ليش جاي ترسم على لحايط ؟
اشر على راسة عود (بكيفي او بمزاجي)
ضحكت وكتلة براحتك ، اخذت اكرم وكتلة باجر اجي اشوفك الرسم وقنعتة ورجعت للبيت ،وعلى طول الطريق مقهورة اكول شكد خطية شلون عايش ويتفاهم وي الناس وهوة ميكدر يحجي ، شلون باجر عكبة يتزوج ويتفاهم وي زوجتة واطفالة ، ضلينة نتمشة لحدما وصلنة للبيت العصر وكعدت اسولف لماما عل شفنا وسئلتهه ليش الواحد يصير مايكدر يحجي ، كالت اكو من الولادة هيج ، بس مادامة يكدر يسمع ، اكيد مريض مو من الولادة ،
رونق:  مر يوم على وجودة نويرة بلبيت وصدگ تنام عل گلب وما تنهضم ، هواي تتعاير بروسنة وتتعمد تحرگ گلب هداوي ، وكلساع تسألهه ها ماحبلتي ، عود تحرجهه ، فگاعدين نسولف سوالف عادية
نورة: والله لو ماما تنطيني شوي صلاحيية جان من صبح باجر زوجت طارق وخليتهه تخلفلة عشر جهال ، شنو لهسة لاحس ولانفس من مرتة ،
ام طارق: استهدي بلرحمان يايمة كلشي رزق بيد ربج ،وهاي يوم يومين واسمعي بهداوي حامل ان شاء الله
هدى ماحجت شي تباوع صفح واني اباوع على هدى
نورة: اي يمة هاي صار جم سنة على هاي حجايتج ، بدل هلحجي جان هسة جهالة بطولة ، ولا انوب هاي الاخ هم ماتخلف ويخلة البيت عليج
ام طارق :لا رونق بحيل الله تمليلي البيت عيال بس بعدهه عروسة هسة
هدى :اكول عيني نورة اذا الله رازقج مو معناهه بينة تقصير احنة ،وخلي نفسج بمكاننة وماتخلفين تقبلين احد يسمعج هيج كلام
نورة: عيني ماحجيت الة الصحيح شبيج عصبتي ؟ هم حقنة نريد نفرح باخونة وبزرتة ،
هدى :فرحي اهلج ببزرتج وعوفي غيرج والرزق بيد الله
رونق :حجي هدى صحيح الرزق بيد الله مو بيدهه حتى تكعدين تعيريهه لو تلوميهه !
نورة :اسم الله خية شحرگ حمامج من وحدج، شو من هسة صايرات حزب وحدجن ؟الله يعينج ياماما
هدى :لاحزب ولاشي بس تحجي الحق ، موو !
رونق :اكيد حياتي اكيد
نورة محجت شي بس رفعت حاجبهه ودارت وجهه فارت فور من يمنة ، وهدى تباوع علية بس احسهه ضايجة ،
كامت للمطبخ ورحت وراهة
هدى: شفتي بعينج موو !
رونق : مليانة سم كششش
هدى : اعرف شلون اتوبهه هييين ينورة
رونق :ايدج الج والله
هيله :كاعدين اني وماما صبحية وكرومي يفتر علينة
اكرم: ماما كولي لهيله خل تاخذني اشوف الرسمات مال الولد  الاخرس هسة الكا كملهن
الام :ماما العصر واخليهه تاخذك تشوفهن هسة الدنيا ضهر  وجو حار
هيله :ماما ميخالف اخذة هسة
الام : يلا اخذي بس هوة لا تاخذين سيوفي لان جو حار
هيله :ماشي ماما
رحت بدلت لكرومي واني هم لبست صايتي وشمرت شال على راسي وطلعنه نتمشى وكرومي فرحان لان كلش يحب الرسم ، وصلنة يمة المدرسة بقينة نباوع على لحايط راسم علي خارطة العراق واسد ورسوم ساحة التحرير وشغلات كلش حلوة بس بعدة ماملونهه ، بقيت واكفة اباوع واوصف لكرومي ويباوع وياية ، واكو رجال جبير بلعمر عدة دكان قريب من المدرسة كاعد على لكرسي ويباوع ويبتسم ،
قرب من عدنا الرجال
:ها عمو شلونكم
هيله: هلو عمو
: شنو عليمن تباوعون صار عدي فضول
هيله :على ذني الرسمات ،اخويا الزغير شاف الرسام يرسم بيهن البارحة وراد اليوم يجي يشوفهن ورة ما كملن
: اي بعدة ما مكملهن قبل شوية راح يمكن يشتري اصباغ ويرجع هنا ،
هيله :الله يوفقة والله مبدع وفنان بس خطية هوة ليش ميحجي
: والله ياعمو ما ادري بس سمعت من العالم باحداث الخطف والتهجير مال 2003 مكصوص لسانة وصايرة عدة صدمة من ذاك الوكت ، ومتهجرين للحلة انوب هسة حطو بواسط كبل شهرين تلاثة ، ناس من اهل الله
هيله :والله خطية الله لايوفق لهيج يسوون بلعالم ويهجروهم من بيوتهم
:اي والله ياعمو الله لا يوفق كلمن جان السبب ،يلا عمو الدكان تايه اني اعوفكم بعد ،في امان الله
هيله: الله وياك عمو
بعدة هستوة راح الرجال ولاگا الولد جاي وجايب سطل صبغ بايدة وابتسم بوجه الرجال ورفع ايدة سلم
الرجال : وعليكم السلام والرحمة ،
التفت علينة الرجال ،وهذا اجة فنانكم ضلو باوعو علي وهوة يرسم ، اني باوعت علي وابتسمت وكرومي هم فررح ، هوة خطية شفت الفرحة بعيونة من حسنة مهتمين بهلشي ، لزم الفرجة وبدة يخطط واحنة نباوع علي ، جر طابوكة من الكاع قربهة علية واشرلي عود كعدي ، اني جريتهه وكعدت كرومي عليهه ، باوعلي وابتسم وجاب وحدة لاخ كعدت عليهه بقينة نباوع علي ،
كرومي :اكلج هيل هوة اذا مايعرف يحجي ليش مايكتب كتابه..

هيله:ما اعرف يجوز مايعرف يكتب لو ماداخل مدرسة ،بلا خل اسئلة
كمت قربت من عندة ، واشرتلة وحجيت
هيله: انتة تعرف تقرة وتكتب لو لاا ؟
اشري براسة بمعنى اي ، واشر بيدة عندج ورقة وقلم
هيله : لا ما عندي ، بس هسة اجيبلك من المحل عادي
اشر بيدة عود على باجر جيبي وياج وابتسم ، ابتسمت بوجهه وكتلة ماشي باجر هم اجي ،
هيله:راح اروح هسة ماما ماتقبل اتاخر
اشرلي براسة بمعنى تمام ، رحت واشرتلة من بعيد بيدي واشرلي ،
خطية شكد حسيت بي مكسور ، وابسط شي يزرع الفرحة بنضرتة ، وشكد كمية برائة بنضرتة ، وصلت لفرعنة العصر واشوف الناس ملتمة بباب بيت ابو هشام وعياط رحت ركض.....

#يتبع 👈🌺
قراءه ممتعه حبايبي 😻لتنسون نجمه