ماذنبي بكل ماحصل

بارت24

#ماذنبي بكل ماحصل

#بقلمي anoo

فزيت من النوم وكمت بسرعه بسرعه البس واغسل ،
قحطان :على كيفج شجاج
ماجاوبتة كملت شغلاتي ولبست عبايتي وهوة هم بدل بلا ريوگ ، نزلنة نمشي عل درج لاگتنة امة
ام قحطان : خير ياطير شو كبل الريوگ مبدلين وين رايحين
قحطان : متحلمة حلم موزين وما نامت طول الليل ارد اخذهه تشوف اهلهه
ام قحطان : وهاي كلما تتحلم تاخذهه لاهلهة انشالله ؟
قحطان : ترة من تزوجت لحد الان مراحت لاهلهه ! مالة داعي هلحجي يووم ،
ماجاوبت عمتي شي لان دائما قحطان يتكفل بلحجي ، صعدنة بلسيارة ، وصلنة لفرع بيت اهلي اول ماطبينة واني عيوني تفتر منا ومنا واباوع على حيطان المدرسة واتذكر ذيج الايام شكد جنت مرتاحة بيهن والكاع ما تشيلني من الونسة وشكد جان اكبر هم عدي اقنع امي حتى اروح للحديقة اشوف مسلم ، اباوع من الجامات وجريت حسرة
قحطان : خيرج
هيله :ماكو شي
طبگ السيارة بباب بيت اهلي ومانزل بقة كبال السيارة واكف
قحطان :فوتي سلمي عليهم واني منتضرج هنا
هيله :ماراح تفوت !
قحطان :بصراحة ماريد اشوف امج
هيله : ولا اني ارد اشوفهة ،
حجيت ودنكت وبرطمت ردت ابجي ،
هيله :فوت وياي قحطان ماريد افوت وحدي
قحطان : ماشي لخاطرج..

دكينة الباب طلع سيف فتح الباب ، كبران وصاير بلمدرسة ، رأسا شبگتة وابووس بي بدون وعي ، طلع اكرم من باب الهول ، اجاني ركض وحضنني وبقيت ابوس بيهم وابجي وكاعدة علة ركبي بلكااع ، طلعت امي
الام : يااهلا حي الله من زاارنا شلوونج بتي
باوعت بوجه امي واني احس ذاك الشريط كلة نعاد كدامي ، مواقفهة السوتهه بية كلهة انعرضت كبال عيني ،

هيله :بخير
الام :تفضلو فوتو جووة
هيله :ماكو داعي جيت اشوف اكرم مشتاقتلة وارجع
الام :هاااا مشتاقة لاكرم ، عاد بلجذب كولي جيت اشوف امي الصار سنتين ماجيتهه ولاشايفتهه شرايدة شمحتاجة بس ماعليج عتب ، اربي ويضيع رباي ،
هيله : ماراح اجاوبج اطمئني ،
حجيت هيج وحضنت اكرم وبستة ، وقحطان واكف ابد ماحجة حررف

اكرم : هيل ليش هيج كطعتي بية
هيله:اكرم ما اكدر اجي لهلبيت حباب عليج الله كل فترة تعاللي خل اشوفك حتلو اني اودي قحطان يجيبك الي
اكرم : اني اجي وحدي مايحتاج تودين هذا
هيل ه: ليش تكرهة !
اكرم : لان اخذج من عدنا

هيله : ماعلي هوة اذا تريد تكره بشر اكره امك
الام : هيييل احترمي نفسج وصيري محضر خير عاد كافي مصختيهة شنو تحرضين بلولد علية ،
هيله : ماحجيت شي باطل ! كال اكره قحطان لان اخذج منة كتله اذا تريد تكره احد اكره امك هية السبب،
الام : خليني ساكتة هيله ، رجلج منااا وماريد احجي ازيد

هيله : التردين تحجينة احجي ماعاد اخاف من شي ، كلشي ونعالي صار ،
الام : قحطان ادب مرتك مردودهه عليك ترة ،
قحطان : حجت شي غلط !؟
الام : تتجاوز على امهه كدامك وتحرض باخوتهة وتكول سوت شي غلطت ،
اكرم : هيل امي شدخلهة شقصدج اكره امك!؟
هيله :كافي اكرم ،اترخص منكم ودير بالك على نفسك
اكرم : متروحين منا
الام : اكرم خليهة تروح عسى روحة بلا ردة ، لو ضاله ببيت عيالج ومنجبة ومكملة هلسنتين عشر سنين هواي احسن من جيتج ،