ماذنبي بكل ماحصل

بارت20

#ماذنبي بكل ماحصل

#بقلمي anoo

اعتذر عن تاخر البارت اليوم لان صارتلي طلعه مفاجئه

بارت طويل لعيونكم❤️
_______________

حال مسلم يگول :-
گبع واخذ كالولة ذاك ابن القوط
وتخوصرولي تخوصر بمشيتهة
گالولي عوف اخلاقك ،فلوسك وين ؟
واني بكسر ضهري جبت حلقتهة
يردوني اطلع ذهب من بيت الطين
وشرطو علي بيت احلئ من رگبتهة
وجبتلهم وغطيت وجهي من الدين
وگالولي ابن الدين مو زلمتهة
وماصارت وزفوهة للمو عريس
بصبعهة حط عيوني مو حلقتهة
الماتاخذ احبيبهة لو تاخذ شيخ
لليل ونهار تشتم بقسمتهة
والتاخذ احبيبهة لو شكلة تراب
من تگعد اتمشط علي كذلتهة
شيصير لو ماخذهة تنشك الكاع؟
ييسويهة حظي يجوز وي زفتهة
هوة اليصل للحلقة وجفوفة تموت
تريدة سالم يوصل لشبكتهة 💔!!
_________________________

مسلم :
اصعب شي من تحس نفسك مربط بحبل ماتكدر تتحرك ولا تتقدم خطوة ،مجرد تباوع بعيونك على حلالك وهوة ينوخذ گبالك ،
والاصعب من هذا ماعدك حجة تتدافع بيهة عن حقك ،كلشي اقوة منك ،
والاصعب منهن المقابل ينتضرك تحارب علمودة وباني كل امالة عليك ، شايفك المنقذ الة ، بس بلحقيقة انتة ولا شي بيدك ،
كل العليك تستسلم للأمر الواقع وتكيف گلبك ومشاعرك وي الجاي يصير ،
هاي نتيجة اليمد روحة اكثر من غطاه ويتمادة بتخيلاتة ومشاعرة ،
هيج يكون حالة من يصحة عل واقع ،
هيله : من الصبح اجونة ام هشام وهدى ورونق ، وشيماء هم امي خابرتهه من المحطة عزمتهه واجتنة ،
صارت الساعه ب 9 اخذتني شيماء للصالون وامي والنسوان ضلن بلبيت يسون التجهيزات ويودن غراضي لبيت ام قحطان ، كملت الساعه ب1 الضهر ، طلعنة اجرنة سيارة ورجعنة للبيت ، تلاگونة النسوان بلهلاهل والركص والهوسات ،
جانت البدلة لونهه وردي فاتح وفوكاهة شال خفيف مغطي اديهه ، وشعري جان قصير ما ترهمله تسريحة بس لمتة اليه ليورة ولبستني شال والبرگع لونة ابيض شفاف ، ومكياج خفيف ،
دخلوني للهول كعدت ع كرسي وهنة يغنن ويركصن وامي عازمة نسوان من المنطقة ،
كاعدة وصافنة بابتسامة باهتة مرسومة علة شفتي واحس جسمي كلة خدران ،
احس 3 سنوات من عمري تطشرن كدام عيني باسبوع واحد ،
اجة اكرم يدور على امي بنص النسوان..
الام : ها شتريد
اكرم : ماما هذا جوارينة ابو سلام يريد يحجي وياج واكف بلشارع
الام :خير ياستار
لبست عبايتهه وطلعت للباب
ابو سلام: السلام عليكم خوية ام رونق
الام : هلة خوية الف هلا
ابو سلام :ولو الوكت مو مناسب على جيتي وفرحانين وهلاهلكم واصلة لاخر الشارع بس خوية جايج بطلب قبل فوات الاوان ،
الام : خير خوية
ابو سلام :خوية احنة كلنة بشر وماكو احد احسن من احد ، وكلنة ورانة موت وحساب وتاليتنة بحفرة شبرين ونص ،
الام :شنو مناسبة هذا الحجي ?
ابو سلام : خوية الغي العرس وتعوذي من الشيطان والمهر التردينة للبنية ينحط جوة رجلج بس اطيهه لمسلم ،
الام : ابو سلام خوية هاي ما مرجية منك ، البنيه بعد ساعه وتروح لبيت زلمتهه شنو الغي العرس لعب هية
ابو سلام : خوية كبل اسبوعين اجيتج كلتي البنيه ماتريد تتزوج وورة سبوع سمعنه بيهه راضية بابن ام قحطان ، خوية ترة القاط والفلوس والبيت الجبير ما يفرقن الله وكيلج اهم شي المعشر الطيب لا تضلمين بختج ،..
الام :خوية الزواج قناعه وقسمة ونصيب وهية قنعت بابن ام قحطان وتوكلنة على الله بعد مالة داعي الحجي هذا وراح وكتة
ابو سلام: خوية لا تقنعيني البت هية الرفضت مسلم ، انة ابن ولاية وكلشي ادري ، والولد من اجانة ونخانة نجيكم مشية عليهه جان رايدهه ورايدتة ،
الام : عززة بعيني ، كاعد يشهر ببتي مسيلم ؟
ابو سلام :خوية لايشهرهه ولا من شيمتة هلسالفه بس كتلج الولد رايدهه ورايدتة لا تضلمين بختج وبخت الراح ياخذهه وتضل ركبتهه مكسورة العمر كلة ،
الام : خوية شوف ، اني اعزك واحترمك مثل اخوي الجبير ، منا بوجهك تروح على مسلم تكله ماعدنة نسوان للزواج والبنيه نززفت وراحت لبيت رجلهه ، وخل يسد حلكة ترة اذا جاب طاري البنيه بلموزينة اروحلة لبيته افرج امة محمد كلهه علي ،
ابو سلام : خوية تعوذي من الشيطان ولا تضلمين البت
الام : خوية اني اعرف بمصلحة بتي ، واترخص منك ،
ابو سلام : في امان الله
الام :الله وياك.
طبت امي بس مبينة معصبة قربت مني كرصتني من جتفي
الام : هاي دواليبج ومصايبج ،روحي شوفي الكواد العشگتي شلون يشهر بيج بلمنطقة ويكلهم عدي علاقة بيهة ،
شاغت روحي من كرصتني دفعت ايدهه مني
هيله :منوو كلج منين سمعتي
الام :هسة عيني ابو سلام جايني يكلي الغي العرس واطيهه اله ، خايبة لو تطلع نخلة براسة ،
عافتني وراحت يم النسووان ، حسيت الدنيا ضاكت بية بدي اعيط وابجي ، بدي اكلهم مااااريد العرس ، بس وراهه شيصير ،
لا اراديا بجيت وكوة اقوي بروحي ماريد الدمعة تنزل ، انتبهت علية شيماء قربت مني
شيماء : ها دادة شجاج تبجين
ما جاوبتهه لان بس احجي ابجي
شيماء : دحجي شبيج ولج شصار ؟
عصرت ايد شيماء حيل وحجيت بصوت ناصي
هيل : ماااااااريدة
شيماء :عزة بعينج منوو بسلا قحطان
هيل : اييييي
شيماء :ولج شما تردينة بعد شوية وتجي الزفه شنو هية لعب جهال ، ترة كلنة بزواجنة هيج خفنة شغلة عادية ،
هيله : احب مسلم ماااريدة شيماء
فتحت عيونهه وباوعت بوجهي مصدومة
شيماء :يامسلم ؟
دنكت راسي ماريد احد ينتبه على عيوني
هيله: الاخرس
شيماء :تحجين صدك انتيييي ؟؟
بهل اثناأء اجت ام هشام ،
ام هشام: راح تجي الزفة خية مو وكت سوالف طبن لبسنهه البدلة البيضه ،
اجت امي ورونق وهدى كوموني واني عيني وي شيماء وهية عينهه علية ،
طبيت للغرفة لبست البدلة البيضه ورتب البرگع وطلعوني كعدوني نفس مكاني ، واجت شيماء قربت حلكهه يم اذني
شيماء :فهميني ولج شنو وشلون ولييش ؟
هيل ه: فات الوكت بعد شحجيلج
شيماء : دحجي خرب ابووج
هيله : 3 سنوات علاقة ويا وودة زلم المنطقة على امي رادني وما اطتني اله وبنفس الشهر اطتني لقحطان ولحد مساع ودة علية ابو سلام وامي طردتة
حجيت هيج ودنكت ابجي بعد ما كدرت اسيطر
شيماء :تحجين صدددك انتي ¿ هاي امج شبيهه
انتهضت مني وراحت بسرعتهه على امي صاحتهه من نص النسواان ،
واني بقيت امسح دموعي على كيف حتى لا يخرب المكياج.
شيماء : هدية انتي شلون تسوين هيج ما تخافين من الله ؟
الام :خير شكوو
شيماء :شلون مطية البنيه وهية ماتريدة ؟
الام: ومنو كلج متريدة ؟ اصلا بقناعتهه وافقت شلجن بهلسوالف انتن
شيماء : هدية تررة رجليج مدندلة بلكبر لا تضلمين بخت احد ، انتي ما تخافين من الله كاسرة شوكة البنيه وغاصبتهه على زواج ، مو تدرين بيهه تحب مسلم ليش ما انطيتيهه الة ؟مخلية البنيه بزفتهه ودموعهه عشرة عشرة  هاي شراح تدعي عليج عد ربهه شراح تطلع بيج من حووبة !
الام : شيماء اني اعرف بمصلحة بتي ، وكبرتهه وتعبت عليهه وصارفة عليهه دم ركبتي ، ومامستعدة اضحي بيهه لواحد اخرس وفگر ونگر يادوب يجيب لگمتة وتكضي ويا باقي عمرهه
شيماء : وبتج لا زغيرة ولا مراهقه وتدري بكل وضعه من حبتة اطيهه اله وابري ذمتي وطبهه طووب وراهه هية تتحمل نتائج خيارهه ، ولا تكليلي فكر ونكر ترة كلنه فقرة عد رب العالمين وكلنة مارة ايام علينة نتغدة ما نتعشة ، شراح تكولين لربج باجر عكبة ، حوبتة حوبتهه التطلع بيج مافكرتي بيهن !
شيماء تحجي وي امي واحسهة شلوون منفعلة وعيني عليهه وطبن النسوان كالن اجت الزفة ، هنا حسيت الكاع افترت بية وضاع الوكت كلة ، اباوع على شيماء أتمنى منهة ولو نضرة وحدة تحسسني بل امل مااكو ، شوية وطب قحطان وامة والزلم واكفة بلشارع وبلطرمة ، والنسوان هلاهل وركص ، لحدما ضاعت شيماء علية وعيوني تدور عليهه بنص النسووان ،
ماحسيت الة واحد لازم ايددي ، فزيت التفتت لكيتة قحطاان ، باوع علية ،
قحطان :الف مبروك
هيله :يبارك بيك ،
بقينة كاعدين شوية واني حسيت نار تطلع من جسمي ، وشوي وكام وكف على حيلة وكومني ، جابن عباية بيضه لبسنياهه فوك بدلتي وطلعنة ، وي كل خطوة احس روحي تطلع من مكانهه علة ساعه ينغمي علية من كدما الدنيا تفتر بية ،
وامي كدام النسوان سوت نفسهه تبجي علية وقرربت تبوس بيه وتحضن بية ، سحبت نفسي منهه وباوعت بوجهه
هيله : صح امي واحبج والجنة جوة رجليج ، بس انشالله حوبتي ما تتخطاج ولا حوبة مسلم تتخطاج ،
ابتعدت منهه واجت شيماء حضنتني ، واول مرة بحياتي اشوفهه تبجي
شيماء : لج وراس ابويااا ووداعه امي لو كايلتلي من وكت مازفج لغير مسلم ، لوو بس عدي علم ااااااخ
باوعت بوجهه ولزمت ايدهه
هيله : فات وك..
عفتهه وسلمت عل باقي ورحت امشي واجة قحطان لزم ايدي ، طلعنة بلشارع والبركع منزلي على وجهي وماشوف بس شي قليل ، وعيوني تلافت بكل ركن بلشارع وكلبي يحس مسلم موجود بس ماجاي اشووفة ،
صعدوني بلسيارة وامي الافت من الجامات اكول بلكي الله اشوفة حتلو خطفة بس ماااكو ، مشت السيارة وصلت لراس الشارع صدت عيني عل محل البراس الشارع ، شفتةةة
واكف على طولة والجو جان هستوة بارد ، لابس بدي ردن اسود وبنطرون اسود وقبعه سودة ومخلي ادي ورة ضهرة ،
عيوني ماكدرت انزلهن من عندة ، يباوع على جامه السيارة لحدماا لمح وجهي رفع ايدة تحية سلام ، وراهة دنك راسة عبررت السيارة واني عيوني تفتر هنا وهنا ارد اشووفة بس اختفة ، نززلت راسي وغمضت عيوني ودموعي عشرة عشرة تنزل ، المكياج مابقة بي شي ،
قحطان : هيل شبيج خير
مارديت علي ما اكدر انطق حررف واحد وامة جانت صاعدة بصدر السيارة ،
قحطان :ليش هلبجي ياعيني ما يصلح بعدج عروس
هيل : شتريد اسوي ?اضحك !
حجيتهه وباوعت بعيونة شاف عيوني صايرة دم من الحمار
باوع علية متفاجئ.
قحطان :هيل شجاج ليش هيج تحاجيني ؟
بعدني ما مجاوبتة واسمع صووت دراجة وي الزفة واصد عيني عليهة والگا مسلم ! بقت عيني وراا وقحطان يحاجيني
قحطان : هيل حاجيني بيج شي !
هيل : مابية ! بسس باوع من الجامة
قحطان : شكو بلجامة !
هيل : دبااوع
باوع من الجامة اليمي ، اشرت باصبعي على مسلم
هيله : تشوفف ابو الاسود ؟
قحطان : شبي منو هذا ؟
هيل : هذا حلمي الما تحقق
حجيت هيج ومخلية عيوني بعيونة وگبل طاحن دموعي ،
قحطان : حبيبج ؟
هزيت راسي واختنكت ماكدرت احجي اي حررف لاخ ،
بقة مصدووم وجر حسسرة ، ارتاك على كشن مال السيارة وصافن من الجامة عل دراجة البيهه مسلم ، رغم اني ماكدرت ارفع عيني على مسلم بعد ، لان حسيت روحي خلاص مابية طاقة بعد ،
قحطان مد ايدة ونزل البركع علة وجهي
قحطان : امي منا لا تبجيين....
جريت البركع والعباية نزلتهن على وجهي ومسح بعيوني شوي شوي ، مد ايدة اطاني كلنس ، مسحت عيوني ،
وصلت الزفة لباب بيتهم ، وطبكن السيارات والدراجات الجانن وياهة  ، فتحولنة الباب مال السيارة واشتغلت الهلاهل والرمي ، لزم ايدي ونزلني من السيارة ، رفعت وجهي من ردنة نصعد رصيف الباب ، وصدت عيني على مسلم واكف نفس الوكفة مخلي ادي ورة ضهرة وعيونة على ايد قحطان من لازم ايدي ، ماخلى عينة بعيني ابد ،
وصلنة للباب ودخلني قحطان للبيت وذبحو الذبيحة وبعد صار بضهري ما اكدر التفت اشوفة ،
دخلنة للبيت واشتغلت الهلاهل والركص والناس مخبوصة بلطبخ والمعازيم جانو هواي ،
قحطان راح يم الزلم واني خلوني كاعدة باستقبالهة والنسوان يمي ، وامي وشيماء وبيت ام هشام اجن وياي ،
اباوع بوجوههم شلون فرحانين ويضحكون ، اتمنى احس بولع هلفرح البيهم ،
حسيت كل افكاري مخربطة ونضراتة متروح من بالي ابد ،
رونق :
عزمونة لعرس هيله ومن شفت النسوان شلون فرحانات بيهة وام قحطان تجيب وتحط تذكرت عرسي شلون صار اقساط هههه ،
مستحيل اخلي كلشي يمر بسلام عليهة لو بعد الف سنة ، مشكلتي حقدت على ذاك البيت والبي وما اتمنى اشوف احد منهم مرتاح ،
ومستحيل اخليهة تتهنى بزواجهة ..

هيله : شوية وصاحت وحدة من النسوان : يلا صعدن العروس لغرفتهه جا بعد شوكت تزفنهم ،
اشتغلت الهلاهل والصفكات والركص واني كدما ضغطي هابط ما اكدر اكوم واتعثر من امشي ، اجن امي وام قحطان كومني من ايدي وصعدني للغرفة ،
جانت الغرفة مرتبة وراقية ومعطرة ،كعدوني ع الجرباية وراد يطلعن وصحت على امي
هيله :تعالي يمة
الام : ها كولي ...

#يتبع👈