ماذنبي بكل ماحصل

البارت13

#ماذنبي بكل ماحصل

#بقلمي anoo
________🙊♥️يـہ أغار هـوايه منهـن
أنت عشكي مو عشكهـن
__________________

بقيت اباوع على رونق بس هية ما منتبهه لوجودي ! واستغربت شعجب طالعه وحدهه ضهرية ! بقيت واكفة يم القمرية مالت المحل واباوعلهه وصلت لنهاية الفرع واكو ولد منتضرهه هناك ، استغربت ،معقولة رجعت لسوالفهه المكسرة هاي ، بقيت واكفة ارراقب وهية واكفه ويا بس ماكدرت اتاخر خاف ماما تبقى تحجي علية ،رجعت ركض للبيت وطول الطريق افكر ،ياربي هاي شناوية انوب ، خرررب والله خطية هشام ،
طبيت للبيت فحطانة ،سلمت على امي وكتلهه رحت ادور على دفتر ومالكيت عد ابو الدكان ورحت للاسواق ومعزلين ، ماحجت شي كالت باجر اجيبلج من السوك ،
كعدت اكلت شوية ورحت للغرفة فتحت كتبي اكلب بيهن وافكر بلحجي الحجا الرجال عن حياة مسلم ، واتخيل شلون عايش شلون مدبر امورة بدون ام وبدون احد يداري ، ومن باب لاخ افكر بلوضع الشفت بي رونق ،.
رونق : قوت علاقتنة اني وهداوي كلش وخصوصا ورة ما انطيتهه مرتضى وبدت تحجيلي كلشي واحجيلهه كلشي ، ووحدة تساعد الاخ وياويلة اليندك بينا ، بيوم من الايام كاعدين ،
هدى : اكول رونق
رونق :كولي
هدى :هم جان عندج حب قديم قبل لا تزوجين
رونق : اي هيج فترة شهر وعافني الكواد
هدى :وليش عافج
رونق :مادري لكالة وحدة احلى مني
هدى :وشسويتي
رونق :ماسويت خية مابيدي شي علي عفتة بحالة
هدى: يا امداج اني حبيبي من عافني خليتة لهسة محمض بلا زواج
رونق :شلون
هدى : خية استدرجتة وطكطكتلة وصار مو رجال ، تزوج ومن ليلتهه تطلكت منة وانفضح بلعشيرة
رونق :خية انتي امكانية وتكدرين لكلشي ،اني وين.
هدى :بس انخيني وشوفي ، احزم هلي العرس يخية واذا تردين اخبلة هم اخبلة الج ههههه
رونق :والله وكفو من ام مرتضى ، والله امنيتي اشوف بي انكس يوم
هدى : خليهه علية ومعليج كل العليج تجيبي للدرب يوم واحد ، يشرب المقسوم وكلشي يهون وراهه
رونق :ووين اجيبة يدادة وعيالج تارسين البيت
هدى : العيال علية ماعليج انتي بس اطي خبر

رونق :ماكلت باطل من هداوي طرحت علية هلشي ،تذكرت شلون عافني بهلمصيبة وعاش مرتاح وشلون تخلى عني ولزمني برسائلي ، لبست عباتي ضهرية بحجة اروح للحفافة ورحت يم محل صاحبة خليتة صاحة الي ، من شافني استغررب ،
ياسر :رونق شسوين هنا وشعدج مو تزوجتي!
رونق :اي تزوجت بس ارد احجي وياك
ياسر :شتحجين وياي لا يشوفج احد
رونق :انعل ابو الاحد ،محد من عيالي يوصل لهنا والشارع فارغ اصلا ،
ياسر :احجي شتردين
رونق :مشتاقتلك وارد اشوفك بليل ورة 12
ياسر :ببيت عيالج ؟
رونق :اي
ياسر :ورجلج ؟
رونق معليك كلشي متدبر بس من تصير 12 ضل افتر بشارعنا واني اطلع اصيحك ، والله مشتاقتلك وطاك كلبي عليك وماحبيت رجلي ومرتاحيت ويا بكدك ، فدوا لتردني
ياسر : واذا انكشفنا !
رونق :مننكشف معليك ، وبعدين معقولة ماحنيت
وغمزتلة وفتحت عبايتي الة ، ادري بي يموت ويسيح علهيج سوالف
ياسر : ولج وشلون مامشتاق واني ذاك اليوم لهسة يدك ببالي اوووف
رونق : حجيتهه بدلع ، لعد تعال اليوم عفية
ياسر : جايج جايج بس روحي لبيتكم هسة وبليل اجي ،
عفتة ورجعت للبيت سولفت لهداوي وبدينة نتفق ،
هداوي عدهه عشبة مال منوم جان يطوهه لأمهه من جانت بيهه حالة نفسية تخلي الواحد يغفة ومايحس شكو ماكو ، جان تستخدمهه وي عمي وعمتي من تريد ترشرش البيت ومتريدهم يحسون ، بليل دكتلهم منهه بلعصير مال الرمان واطتة الهم ورة شوية صارت ال10 الجماعه كلهه طفت ، عمي وعمتي راحو نامو بغرفتهم ، وطارق اليوم اصلا معزوم بلبصرة طلع من الصبح ويومين يلا يرجع وهشام سنح بغرفتة ونام وصفالنة الجو اني وهدى ، طلعت ب12 لابسة سيت نوم اسود وفوكة روب ومكياج لكيت ياسر واكف ويباوع على بيبان ، اشرتله بيدي اجة فوتتة للطرمة وهدى جوة تراقبلي ، بقينة نحجي اني ويا وكتلة كلهم نايمين تعال فوت للمطبخ ، وهدى وكفت بلصالة تراقب خاف احد يكعد ، وجانت محضرة عصير حاطة بي الحبشكلات ومخليتة بلثلاجة ، فات ياسر للمطبخ وبديت اتدلع كدامة هوة مات على هلسوالف راد يتقرب ،
رونق : اووكف شبيك مستعجل دبرد كلبك شوف نفسك شلون فحطان
طلعت العصير من الثلاجة وانطيتة الة شرربة ووراهة قرب مني وبدينة بوس واحضان تقريبا 10 دقايق ، وراهة خليتة يروح ،
هدى: عاشت ايدج والله
رونق :بزوودج شيخة ههههه
هدى : ها رتاحيتي على بوساتة الضاهر هههه
رونق : اي خية مهموش مال بوس هاذ مايمل ولا يملل
هدى :خية همزين متعتي يجوز اخر يوم الة هذا هههه
رونق : صدك ولج عود شنو فايدة هلشغلات الخليتيهن
هدى : يحرمن علي الزواج يصير مو رجال وانتي افتهمي
رونق : هههه يندم عل ساعه السودة العرفني بيهه
هدى : ماريد شي يضل بنفسج ،تلميذتي الوفية انتي
رونق : لوما انتي اضيع
هذى :عد عيناج
رونق : خل نروح لغرفنة ليكعد احد انوب ،
طشينة كلمن راحت لغرفتهه وخليت راسي عل مخدة واني مرتاحة ،ياسر يستاهل اكثر من هيج ، يستاهل ينذبح وينشمر للجلاب ،صح اني الغلطانة ،بس كرهتة ويستاهل.
هيله : مر اليوم بطولة واني افكر بمسلم ، شلون صار جدة؟ وخطية شلون ممشي امورة ؟ ومنتضرة الصبح على نار بلكي اروح للمدرسة واشوفة هناك ،
اجة الصبح وكعدت كرومي غسلنا وتريكنا وبدلنة ، طلعنة واني على طول الطريق ادعي بلكي اشووفة ، وصلت يم مدرسة كرومي مالكيتة وحسيت شي بية اتحطم ، رجعت يم مدرستي الافت هم ماكو ، ياربي وين راح ، رحت ركض عل محل مال الرجال لكيتة معزل وهاي اول مرة يعزل المحل ، بالي تشوش وبديت ما اجمع افكار ، فتت عل مدرسة وبالي متخربط ، ومنتضرة يخلص الدوام على خير واطلع واشوفة ،
صار الضهر وطلعت ركض من المدرسة الافت وماكو ورحت على محل الرجال هم بعدة معزل كلت بلكي الكا يم مدرسة اكرم،
ركضت على مدرسة اكرم امشي سريع وصلت هم مالكيتة ،
بذيج الساعه صدك عوزي بس اكعد بلكاع وابجي ،
رجعنة للبيت وماكدرت اسأل اكرم علي لان هواي لحيت ويا خاف يشك بشي لو يكل لامي ،
طبينة للبيت غسلت وبدلت كعدنة نتغدة وماما يمنة تخيط.
الام : شيماء جانت يمي مساع ، خطية جد هذا الولد الاخرس متوفي الصبح
وگعت الخاشوكة من ايدي وفتحت عيوني
هيله :هاااا منو كلج
الام : هوة بعد شارعين من شيماء وخطية شايفة الهوسة ب10 الصبح وكايليلهه جدة مات ،
هيله : الى رحمة الله ، والله مايستاهل
الام : امر الله هذا يايمة كلنة على هطريق
هيله : يمة تدرين بي هوة عايش بس هوة وجدة ماعدهم احد بلبيت ، خطية شلون واحد يكدر يعيش وحدة وشلون يدبر امورة
الام : الله يدبر امور البشر ويعيشهم يوم بيومة ، الله يكون بعونة ويصبرة على هاي المصيبة وانشالله ولد الحلاال مايقصرون ويا،
حسيت غصة بداخلي من سمعت بلخبر حتى ما كملت اكل نفضت ايدي وكمت عزلت البيت وفتت للغرفة ، خليت راسي عل مخدة واحس راسي ثكيل علية ، افكر خطية شلون واجه هلمشكلة وهلصدمة ، شلون يكدر يعيش وهوة ماعدة بس جدة ، بقيت لحد المغرب واني منايمة ،كعدت اسوي عشة وملامحي مكلوبة حتى امي لاحضت ،
تدري بية انقهر على هيج مواقف فعاذرتني ، مر اسبوع واني اروح وارجع من المدرسة وما شايفتة احس كلشي باهت ، حسيت كلبي طاك علي ، تمنيت اشوفة ،
يوم الخميس طلعت من المدرسة واني كلشي بية باهت وايست ماشوفة ، امشي بطريقي وما التفت على احد رايحة اجيب اكرم وصلت يم مدرستة ،لكيت الحارس كللي اليوم طلعو من وكت واكرم راح للبيت ، بقيت اتمشى على كيفي بلشارع حسيت احد يمشي بصفي ، التفت لكيتة مسلم ، ابتسمت ورجعت ليورة
هيله : مسلمممم
باوع بوجهي وابتسم ، شصاير بي عيونة ذبلانة ووجهه تعبان ، اوول ماباوعت بوجهه عيوني دمعت
صدك حسيت باحساس اول مرة احسة ، اول مرة هيج اتعود على شوفة بشر ،
بقة هوة يباوع بعيوني بعدين اشرلي عود امشي لتوكفين ،
مديت ايدي على مدمع عيني حتى ما ابجي ومشيت وهوة يمشي مسافه مني
هيله : البقية بحياتك مسلم ، سمعت من العالم وما ادري بلصار. 1
هز راسة ودنك
واني امشي والافت ارد اشوف وجهه اخر شي وكفت بلشارع وهوة وكف ، بقيت صافنة بعيونة
هيله : راح اروح للبيت ، اتمنى ما تكطع وماتسوي بية هيج بعد ،
حجيتهه واني مدمعة ، هوة بقة صافن بوجهي ، عفتة ورجعت للبيت ، واحساسي بين الفرحانة وبين المقهورة على حالة وبين الحايرة ،
شنو معقولة حبيتة ! لان اول مرة هلكد اهتم لبشر !
بس حتلو حبيتة ماعتقد هوة يفكر يحب لو يدخل بشر بحياتة وهوة هيج وضعة
وصلت للبيت واليوم احس بالي مرتاح اكثر من ذيج الايام الفاتت ، اول مافتت للغرفة فتحت جنطتي طلعت الرسمة مالتة وبقيت اباوع عليهه واقرة بلمكتوب ، وطلعت الورقة الثانية الانطانياهه وي الوردة واباوع على توقيعه وابتسم ، لحدما تعبت واخذني النعاس ضميت كلشي ونمت ،

مرت الايام بسرعه وهسة احنة بل 2007 واني صف سادس عام واكرم صار بلرابع وطول هلمدة يومية اشوف مسلم واسلم علي حتى بايام العطلة اشوفة يم الحديقة ماجان بيناتنة اي شي غير النضرات والسلام بس جنت كلش متعودة علي وبيوم الما اشوفة احس نقص ، ولحد الان محاجيتلة اي شي عني ، ماعدا بيتنا يندلة وولا اني تجرأت وسألتة عن حياتة ،دائما جننا نروح اني واكرم نشوف الورد والزرع وبعدين ناس بصف المدرسة خلو قفص مال دجاجات وبط وبدينة نروح نشوفهن وحتى سيوفي ناخذة ويانة ،
رجعت من المدرسة الضهر وقربت من مدرسة اكرم وشفت بنات ثنين واكفات يم مسلم ويكلبن بلسجل مالت الرسوم مالتة ويسولفن ، بقيت اباوع علي من بعيد ، بس احس وجهي صار حار من الضوجة ، ما احب احد يحجي ويا وبطبعي انانية بحاجاتي وصرت احسه شي من حاجاتي ، قربت منة وهوة صدت عينة علية وابتسم ، ما ابتسمت بوجهه درت وجهي وفتت لمدرسة اكرم اخذتة وطلعت ، وهوة ماكدر يعوف البنات الواكفات والضاهر جان يتفقن ويا على رسمة ، بقت عينة وراية وماهتميت ، امشي واحس نفسي صخنت من الضوجة
فتت للبيت ولكيت شيمائو كاعدة يم امي وتبجي وامي هم مكابلتهه ، انخرعت من المنضر فتت ركض
هيله : خيير شكو شصاير ؟
شيمااء : لج دادة لحكيلي ابووج اخذتة الشرطة تاهمي ببوكة ، وين اروح وين اطي وجهي
هيله : شنوو بوگتيش فهموني
شيماء : لج مادري يا ابن حرام مبلغ علي ع اساس بايكلة محل مال تليفونات ، واليوم من الصبح اخذتة الشرطة
ماما : على كيفج شيماء خل يرجع ابو فلاح جيراننة ونفتهم منة شصار وشيكولون
ماحجيت شي بقيت واكفة ومتصفصفة ، ماحسيت بأي شي لان هاي ثالث سنة وهوة لا يجينة ولا يمر علينه حتى نسيتة ، مجرد انقهرت على شيماء لان ماضل عدهه غيرة واهلهة راحو لبغداد بعد ، عفتهن وفتت جوة تغديت وغديت كرومي
اكرم : يعني بابا حرامي ؟
هيله : والله ما ادري يا حبيبي هوة ابوك كل شينة بي بقت عل حرامي
كاعدة اوكل باكرم وسيف وما الي نفس اكل ، من بابهه على سالفة ابويا ، ومن بابهه من وره ذن الواكفات وي مسلم وكاحفاتة كحف ،

للعصر واجة جوارينة من المركز وفات جوة للهول يسولف لامي وشيماء على وضع بابا ، وكايليلة ورة التحقيق يبين كلشي ،
امي بقت شيماء يمنة لحدما نعرف وضع بابا ، وعيال رونق اجونة يطمئنون بس ما اجت رونق وياهم ، عبالك مو ابوهه اصلا ،واحنة هم مانعتب عليهه لان هية علينة متسأل انوب على بابا ،
ام هشام : ام رونق ارد احجيلج شي وادري مو وكتة
ماما : تفضلي خية ....

#ستبع👈🌺
قراءه ممتعه حبايبي