ماذنبي بكل ماحصل

البارت 12

#ماذنبي بكل ماحصل

#بقلمي anoo
احلى بارت لعيونكم وتفاعلكم لتنسون النحمه😂🌺
______________

رونق : مرت 4 اشهر واني ببيت عيالي ، وهشام مثل المحبس بايدي اكلة اعدل يعدل اكلة موت يموت ،وطبعا كلة بمساعدة هداوي ما انكر هلشي ، وعمتي وعمي نفس الشي مدللينة مو شلون مجان ،وبكيفنة شوكت منكعد نشتغل نكعد، ميضايقونة بشي ابدد وما الهم دخل بينة ، وكل سبوع نطلع زيارات اني وهشام وهداوي وطارق ونفتر ونتونس ، بديت احس بدوخة ولعبان نفس وشكيت بنفسي حامل ، اخذت هداوي ورحت للجدة القريبة علينة وطلعت صدك حامل ، وعمي وعمتي وهشام فرحوو ، وحتى هداوي فرحتلي ،بس جان تحذرني ماصير مثل نورة ، وصراحة اني اخاف منهه لان شيطانة ميصعب عليهه شي ، وعلى طول فترة حملي كلماا اسولف اكلهه ابني الج ما اعزة عليج ،وجان تكلي لا عود على حباله الثانية اطيني الطفل ، وصراحة اني هم ما الي خلك جهال وهوسة ورنة ولعبان نفس ومدارات ،
فكلت عادي انطي الهة ، ومرت فترة حبالتي على خير وطبيت بشهر 9 وطول هلمدة اني لا اوصل اهلي ولا ادري بيهم ولا ادري باخبارهم وولا همة ،

هيله : اجة فترة التقديم ع الاعدادية والمعاهد ، فقررت اقدم اعدادية وماما شجعتني بهلشي ، وكرومي صار صف ثاني ابتدائي ، وسيف صار عمرة سنة وبدة يزحف ويفتهم ، وعلى طول هلمدة بابا كام لا يجينا ولا يوصلنا ابد ولا يدري باخبارنا ، وماما شايلة ايجار البيت والمسواك ، واني هم جنت اساعدهه بشغل الخياط لو اخذ الجهال عنهه ، وطول هلمدة اروح بين فترة وفترة اتمشى اني واكرم يم الحديقة القريبة على مدرستي، وجنت اشوف مسلم هناك ، جان دائما يكعد على رصيف المدرسة ويرسم ، وطبعا رسمة يجسد الشخصيات بشكل مضبوط ، واكو عالم يجونة حتى يرسمهم ومايقبل ياخذ منهم اجور ، جنت من اروح هناك اسلم علي وابقة اباوع علي وهوة يرسم وكرومي يتعلم منة وطبعا ماما تدري بية وكلشي اسولف الهه عنة وكلش تنقهر علي ، وحتى فد مرة انطاني رسمة مال منضر طبيعي وشوفتهه لماما وتعجبت بيهه ،
رونق : اجة يوم ولادتي وكمت اطلگ الساعه 10 بليل واخذوني عمي وعمتي وهداوي وهشام للجدة ، والحمد لله بشرتهم وجبت توم ولد ، وطبعا قبل الولادة لاماخذة سونار ولا شي عايفيهه على الله ، وشفت الفرحة بعيون العائلة كلهه ، ماعداي طبعا لان ماجنت فرحانة وولا ببالي اخلف بهيج عمر بس كلت امري لالله ، واول ماصحيت وكعدت كتلهم واحد من الجهال لهدى وطارق واني واعدتهم ، شفت الفرحة بوجه طارق وهدى ما تنوصف ، والجدة جيكت الجهال وصحتهم كلش زينة ، رجعنة للبيت الصبح ، وعمي وعمتي قررو يسمون ابننة مصطفى وابن طارق وهدى مرتضى
، ونورة ورة يومين اجتنة صايرة جنهه حال مجدي ورة موتة ابنهه ، وبنفس اليوم عمي وعمتي وهداوي وهشام اخذو الجهال يسوولهم بيان ، ونورة تخبلت من سجلو مرتضى باسم هدى ، عوزهه بس تبجي من الحرگة ، وهداوي ماقصرت تمشي وتحرگ بكلبهه وهية ميتة ،

هيله: بدة دوام المدارس واليوم اول سنة اليه بلرابع اعدادي ، وديت كرومي لمدرستة واجيت اتمشى على كيف يم الحديقة والشارع هادئ ، شفت مسلم كاعد بنفس مكانة يم ركن المدرسة وبيدة الدفتر مالتة ، ولابس قبعه سودة ، وتشيرت اصفر وبنطرون كابوي ، وصافن ع الشارع والسيارات والعالم ، وكمية الهدوء والاطمئنان بكعدتة مو طبيعي ، قربت منة
هيله :صباح الخير
من شافني فز وابتسم واشر بيدة سلم
هيله :شو صافن من الصبح شكو
دنك كتب بورقة زغيرة (ارد ارسم شي حلو وماجاي الكة )
هيله :مممم ما اعرف شكلك بس كلشي هنا انت راسمة ماعايف شي هههه
كتب بلورقة (لا اكو شي بس من تطلعين من المدرسة اشوفج الرسمة روحي لا تتاخرين )
هيله :زين غششني خل اعرف يلا اروح
طبك حواجبة وباوعلي واشر على المدرسة عوود روحي
هيله :هههه اوك اوك بلحلة اجي اشوف
ابتسم وهز راسة ،
ورة ماخلص الدوام وجان يوم تسليم كتب يعني بعدنا مدارسين شي ، طلعت مالكيت مسلم بقيت امشي وتلفت ماكو ، اكيد راح لبيتهم ، رحت لمدرسة كرومي حتة اخذة ،لكيت مسلم كاعد يم كرومي ويضحكون ، ابتسمت واجيتهم ،
هيله :هلووو ، هاي شنو صايرة لقاءات من وراي
رأسا مسلم انطاني ورقة بايدي وهوة مبتسم كاتب بيهه (عيب اوكف هناك بعد خاف البنات يحجن عليج شي ، بعد غيرت مكاني هنا راح استقر )
هيله : لحد الان محد حاجي وماسامعه شي من احد
ابتسم وكتب بلورقة (للاحتياط )
ابتسمت وماحجيت شي اخذت كرومي من ايدة
هيله :يلا اترخص اروح للبيت بعد ،
اشرلي عود انتضري
هيله :ها شنو؟
مد ايدة بلسجل وانطاني ورقة مطبكة واشر بيدة وراح بسرعه
بقيت لازمة الورقة مستغربة ،
اكرم :شنو بلورقة خل اشوف
فتحت الورقة لكيتة راسمني بلمضبوط واني لابسة شال وصاية ، ملابسي الدائما اطلع بيهن العصر.
تفاجئت شلون موهبة وامكانية عندة بلرسم ،وشلون حفظ شكلي وابسط التفاصيل راسمهن ، بقيت متفاجئة ،
هيله : كرومي شووف مسلم شلون راسمني
اكرم ; الله شكد حلو رسمة ليش مايرسمني هم
هيله : اني باجر اكلة يرسمك ، بس شوف لا تكل لماما على هاي الرسمة خاف تكول مسلم موخوش ولد ويباوع عليج
اكرم :لالا ما اكول الهه بس من يرسمني اشوفهه لماما
هيله : اي عفية حبيبي باجر اخلي يرسمك رسمة تخبل ،
طبكت الورقة وشفت بيهه كتابة ليورة كلت من اوصل للبيت اقراهة ما اقراهه هسة ، واخذت اكرم ورجعنة للبيت ،
لكيت شيمائو يم ماما كاعدات يسولفن ، رغم بابا عافنة بس شيمائو تعامل ماما كأنما صديقتهه ما كطعت منهه ، فتت سلمت عليهم وباركتلي لان صرت بل اعدادية وكعدنة نتغدا ويسألوني على يومي واسولفلهم التفاصيل ، ورة ماكملت وعزلت البيت عفتهم وفتت للغرفة انام ،طبعا ورة ما طلعو بابا ورونق من البيت بدينة كلنة ننام سوة بغررفة امي ، عفت كرومي يلعب وفتت للغرفة ،فتحت جنطتي طلعت الورقة مال مسلم ،
صافنة ع الرسمة شلون سبحان الله ابدااع ، وكلبت الورقة حتة اقرة الكتابة لكيتة كاتب ( من كتلج ماكو شي حلو ارسمة جنت غلطان ، ومن كتلج كلشي حلو بهلمكان رسمتة جنت غلطان ، الشي الحلو الوحيد المارسمتة انتي ،واليوم قررت ارسمة ، ان شاء الله عجبتج الرسمة ، تحياتي مسلم )
بقيت صافنة ع الكلام الكاتبة وتلقائيا ابتسمت ، بعدين قررت اضم الورقة لا انوب احد يشوفهه ، ضميتهه وخليت راسي عل مخدة حتى انام شوية ،بس ما اجاني نوم من التفكير كلما اغمض ابدي اتذكر شغلات وتجي ببالي مواقف ، عفت المخدة كلت هسة هية مو مال نوم خل اكوم يمهم بلهول احسللي ،
اكرم : ماما خل نروح العصر اني وهيلة يم الحديقة ،اريد مسلم يرسمني رسمة حلو
الام : ماما عيب جا يومية تروحون يمة الناس شتكول على اختك
اكرم :ماما محد يكول شي اصلا هوة الرجال اليم الحديقة يكول علي خوش ولد وحباب ، فدوة خل نروح
الام : روح كل لهيل خل تاخذك وياهه وروحو بس مو تطولون ،
اني جنت انتضر ماما بس تكول اي حتة اروح ، واخيرا خلت القرار بيدي
هيله : اي بس خل يجي العصر ونروح ،
صار العصر بدلت ولبست شال وصاية فوك ملابسي واخذت اكرم وطلعت اتمشى وصلت قريب من المدرسة مال اكرم عبالي حتى العصر حيوكف هنا ومالكيتة ، رحت يم مدرستي شفتة كاعد بلحديقة يحفر بلگاع ويزرع بذور ، قربت منة ،
هيله :هلوو
من شافني انتهض وكف على حيلة ونفض ايدة من التراب وهوة مبتسم ، اشرلي بيدة وراح كعد عل رصيف ، اجينة كعدنة يمة اني واكرم ، كتب بلورقة ( شلونج )
هيله :زينة الحمد لله ، وهذا اكرم كتل نفسة يريدك ترسمة
هز راسة بمعنى اي ، واشر لاكرم كعد كدامة على طابوكة وبدة يخطط ويرسم واكرم فرحان ،
هيله : شكرا ع الرسمة كلش عجبتني
ماحجة شي بس ابتسم وهز راسة ودنك ، بقة مركز عل ورقة ويرسم واني صافنة علي ، واباوع على تحركاتة وحركة عيونة وحركة ايدة وكلشي بي ، واكول سبحان الله بكلشي اله حكمة ، رغم كل البي بس فنان مبدع ،
رفع راسة انتبه اني صافنة علي ، عقد حواجبة وضحك ، اني خجلت دنكت وقربت منة سويت نفسي ارد اشوف الرسمة ، هوة قدملي الورقة ودنكت اباوع وهوة يباوع علية ومبتسم ،
بقينة يمة تقريب ساعه وكمل الرسمة مال اكرم وطلعت تجنن عبالك تصوير مو رسم ،واكرم فرح بيهه وضل يبوس ويشبك بي وهوة كلش فرح ، من ردنا نروح ترخصت منة وتشكرتة ، شلع وردة بيضة من الحديقة المقابيل المدرسة وهوة دائما يداريهن ويخليلهن المي ، اشرلي بيدة حتى انتضر ، بقيت واكفة واكرم بعدة فرحان بلرسمة ، وهوة كعد يكتب بلورقة وشلعهه بسرعه واطانياهه هية والوردة واشرلي عود روحي ،
ضميت الورقة بجيب التراك ونزلت الصاية وبقيت لازمة الوردة ورجعنة للبيت وكرومي يشوف بلرسمة لماما وماما تعجبت بلرسم وضلت تمدح بي واني هم كاعدة وشوفتهه الوردة وبقينة كاعدين ونسولف ،