Secret Love

20 (U)

ယနေ့သည် မြို့ပြအင်ဂျင်နီယာဌာန၏ မောင်မယ်သစ်လွင်ကြိုဆိုပွဲနေ့ဖြစ်သည်။ ရန်နောင်နှင့် ချမ်းငြိမ်းသာမက မေဂျာတစ်ခုလုံးက ကျောင်းသူ၊ ကျောင်းသားအားလုံး တက်ကြွစွာ ပြုံးပျော်နေကြသည်။ အစီအစဉ်အရ ရန်နောင်နှင့် ချမ်းငြိမ်းက King selection တွေဖြစ်၍ show လျှောက်ကြရဦးမည်ဖြစ်သည်။ ကျောင်းသို့ရောက်ရောက်ချင်း အဝတ်လဲခန်း၌ အဝတ်လဲကာ ပြင်ဆင်ရသည်။ ပြီးမှ ခန်းမသို့ ထွက်လာကာ စီစဉ်သူတွေ နေရာချပေးသောနေရာမှာ ခဏထိုင်နေရုံသာဖြစ်သည်။ အစီအစဉ်အရ သူတို့ လျှောက်ရမည့် အချိန်က လိုသေးသည်။

“ချမ်း… ဒီနှစ် ဘယ်သူ King ရမယ်ထင်လဲ…”

ချမ်းငြိမ်း ပြုံးလိုက်သည်။ အတိအကျ ရန်နောင်ပဲ ရမယ်ဆိုတာ အစကတည်းက နာမည်ထွက်ပြီးသားပဲကို…။

“ငါရမှာလေ…”

နှုတ်ခမ်းလေးရွဲ့ကာ ချမ်းငြိမ်းပြောတော့ ရန်နောင် သဘောကျရပြန်သည်။ ချမ်းက အခုလိုလည်း ပြောတတ်သေးတာပဲလား…။

“ဟား ဟား… ဟုတ်ပါပြီ ချမ်းရာ… ငါလည်း မင်းကိုပဲ ရစေချင်တာ။ အကောင်းဆုံးဆိုတဲ့ အရာတွေကို မင်းကိုပဲ ပေးချင်နေတယ် ချမ်း…”

ရန်နောင့်စကားကြောင့် ချမ်းငြိမ်း ရင်ခုန်ရလွန်း၍ လူအုပ်ကြားထဲမှ ထွက်ပြေးချင်စိတ်ပင် ဖြစ်မိသည်။

“မောင်လေးတို့နဲ့ ဓာတ်ပုံတွဲရိုက်လို့ ရလား…”

အစ်မသုံးယောက်လောက်က ကျွန်တော်တို့ အရှေ့မှ လာမေးသည်မို့ ရန်နောင်နှင့် ချမ်းငြိမ်း နည်းနည်းတော့ ကြောင်သွားသည်။ သူတို့က နာမည်ကြီးတွေလည်း မဟုတ်ပါဘဲနှင့်…။

“ဪ… ဟုတ်… ရပါတယ်ဗျ… ဘယ်သူနဲ့ အရင်ရိုက်မလဲဗျ…”

“မဟုတ်ဘူး… နှစ်ယောက်လုံးနဲ့ တွဲရိုက်ချင်တာ…။ အစ်မတို့က မောင်လေးတို့ နှစ်ယောက်ကို တွဲမြင်နေရတာ ကြိုက်ကြသူတွေလေ…”

“ဟဲ့ နင်ကလည်း ကလေးတွေ နားရှုတ်အောင်… မောင်လေးတို့ နှစ်ယောက်ကို Ship တယ်ဆို ship တယ်ပေါ့ဟယ်…။”

သော်တာတို့၊ ကျော်စွာတို့ ပြောနေကျမို့ “Ship” ဟူသည့် စကားလုံး၏ အဓိပ္ပါယ်ကို ရန်နောင်နှင့် ချမ်းငြိမ်း ကောင်းကောင်းသိပါသည်။ ရန်နောင်က ရှက်နေခြင်းအား ဂုတ်သားလေးပွတ်ကာ ပြုံးနေခြင်းဖြင့် ဖုံးဖိထားနိုင်သော်လည်း ချမ်းငြိမ်းမှာတော့ မျက်နှာလေး နီရဲနေပြီဖြစ်သည်။ အဖြူရောင် suit လေးထဲက ယုန်နီလေးတစ်ကောင်နှင့်ပင် တူသည်။