နာကျင်မှုတို့အလွန် ( နာက်င္မႈတို႔အလြန္ ) [ Completed ]

Part 10

Unicode

စားလို့သောက်လို့ပြီးသွားတော့ အစိုင်းကဘူးခွံတွေကို လွှင့်ပစ်ဖို့ ထွက်သွားလေသည်။ ကဏ္ဏတစ်ယောက်ကတော့ သစ်ပင်အောက်မှာသာကျန်နေခဲ့သည်။ ခဏနေတော့ ဗိုက်ထဲထမင်းလုံးစီရင်းနဲ့ မျက်လုံးကစင်းလာပြီး အိပ်ချင်လာသည်။ သို့သော်လည်း အစိုင်းကပြန်ရောက်လာပြီး လက်ထဲမှာလည်း လက်ဖက်ရည်ထုတ်ကပါလာသဖြင့်

" လက်ဖက်ရည်ထုတ်ကြီးကဘာလုပ်ဖို့လဲ "

" ‌ဪ လက်ဖက်ရည်ထုတ်ဝယ်လာပါတယ်ဆိုမှတော့ သောက်ဖို့ပဲပေါ့ဟ! ဘာလို့လဲ "

ကဏ္ဏခေါင်းကိုခါရမ်းပြလိုက်ရင်း

" ဘာမှမဟုတ်ပါဘူး။ ဒါနဲ့ဘယ်နားကသွားဝယ်လာတာလဲ "

" ဒီနားလေးက လက်ဖက်ရည်ဆိုင်က ဝယ်လာတာပါကွာ။ လာ မင်းအကြိုက်ပုံမှန်ဖျော်ခိုင်းထားတယ်။ ထပြီးသောက်လိုက်အုံး၊ အချို‌ေသာက်ပြီးမှ ပြန်အိပ် ဟုတ်ပြီလား "

အစိုင်းဝယ်လာတဲ့ လက်ဖက်ရည်ကို ပလက်စတစ်ခွက်နှစ်ခွက်ထဲထည့်လိုက်ပြီး အစိုင်းကိုတစ်ခွက်ကမ်းပေးလိုက်သည်။

" ငါတို့က ပျော်ပွဲစားထွက်လာတာကျနေရောပဲ "

ကဏ္ဏရဲ့ခေါင်းကို အစိုင်းအသာအယာ ပုတ်လိုက်ရင်း

" မင်းကလည်း ထမင်းစားပြီးလို့အချိုတည်းတာလေ "

စကားစကိုရပ်ထားလိုက်ပြီး အစိုင်းက သူ့ရဲ့လက်ထဲမှာရှိတဲ့ လက်ဖက်ရည်ခွက်ကို အပူသက်သာအောင် တဖူးဖူးနဲ့ မှုတ်လိုက်ပြီး အနည်းငယ်အေးသွားတော့ ကဏ္ဏကိုပေးလိုက်သည်။

" ရော့ ဒါသောက်၊ ဒါကသိပ်မပူတော့ဘူး။ သောက်ပြီးရင် ခဏမှေးလိုက်အုံး "

" အေး ကျေးဇူးပဲ "

အစိုင်းပေးလာတဲ့လက်ဖက်ရည်ကို တစ်ဂျိုက်တည်းသောက်လိုက်ပြီး

" ကောင်းလိုက်တာကွာ၊ ငါတစ်ရေးလောက်အိပ်လိုက်အုံးမယ်။ ဂေါ်ဖီကားရောက်လာရင်နှိုးအုံးနော် "

" အေးပါ၊ စိတ်ချလက်ချသာအိပ်၊ ကားရောက်တာနဲ့နှိုးပေးမယ် ဟုတ်ပြီလား "

အစိုင်းရဲ့အာမခံစကားကြောင့် ကဏ္ဏစိတ်ချလက်ချနဲ့ ပင်စည်ကိုမှီရင်း အိပ်လိုက်သည်။ အစိုင်းကတော့ လက်ကျန်လက်ဖက်ရည်ကိုမော့လိုက်ရင်း ကဏ္ဏ‌ရဲ့ဘေးနားမှာဝင်ထိုင်လိုက်သည်။