_ورد!
= مبحبهوش
_ شوكليت!
= مبرتحلهاش
_ رواية !
= كرهتهم
_ أنا مضطر ألجأ لجلسات الكهربا يا علياء لأن مفيش استجابة منك لأي شيء و رافضة تحكي سبب وصولك لهنا !
= اللي يريحك، طفي النور واقفل الباب وراك يا دكتور
أوقات كتير بنرتاح للحزن لأنه أفضل مليون مره من سعاده مزيفة أو فرحه مبنيه على كسرة قلب مجهول، الحزن بيتمكن مننا مره مع مره في كل مره قولنا إنها آخر مره كانت مجرد بداية جديدة لحزن جديد، الموضوع تعود مش أكتر! إنك تتعايش مع حزنك ويكون رفيق ليك أفضل من إنك تحاربه وتحاول تخرج منه ووقتها هتكون الخسارة ليك لأن مفيش حاجة اسمها محاولة، إما إنك تكون واخد القرار ومفيش فيه احتمالات وإما لا !
_ علياء مامتك برا وعاوزه تشوفك
_ علياء مامتك بقالها شهرين بتيجي كل إسبوع تشوفك وأنتِ بترفضي
_ علياء
= دخلها
بطبعي مبحبش الزن ولا الكلام الكتير ودكتور سالم أكتر شخص زنان قابلته في حياتي !
دخلت وفضلت تتكلم كتير عن حاجات محطتهاش في بالي ولا كنت حابه أسمعها بس انتبهت لما قالت خطوبة أختك على محمد بعد يومين ابتسمت بهدوء ولفيت الغطا على جسمي وضغط بيه على قلبي وخبيت وشي بعيد عنها وضغط زر استدعاء الدكتور عشان يخرجها، قلبي في اللحظة دي كان بيوجعني كنت حاسه بروحي بتتسحب مني والكل واقف يبتسم على وجعي وقلة حيلتي، سندت ضهري للسرير وضمت ركبتي لقلبي وضغط بعنف عليه، كنت عاوزه أوقف الوجع اللي جوايا دا، هي جاية عشان تشمت فيا!!
_ علياء في دكتور جديد جاي مخصوص لحالتك بتوصية من والدتك أتمنى حالتك تستجيب ليه
خرج وسابني زي كل مره مبردش عليه فيها بس المرة دي أنا مكنتش عارفه أرد، من يوم ما عرفت بخطوبتهم وأنا فقدت النطق وكل محاولات الدكاترة معايا فشلت واتشخصت اكتئاب حاد وكل يوم دكتور سالم يجبلي دكتور جديد على أمل إن حالتي تستجيب معاه، حبيبت اهتمام دكتور سالم اللي ملقتوش في والدي، هو صحيح سنه كبير بس شكله لسه شباب وضحكته مش بتفارق وشه، كنت بشوف فرحته لما كنت برد عليه قبل كدا وكأنه حد من أهلي مش دكتور والحاله بتاعته، هو الوحيد اللي كان جنبي ولو بشيء بسيط!!
_ صباح الخير
_ اه نسيت أعرفك بنفسي: بلال
_ متستغربيش أنا مش بحب الألقاب وخصوصًا من الناس القمر اللي شبهك كدا، علفكرا في نظرية بتقول إن لو بدأت يومك بابتسامه حتى لو عندك هموم كتير هتتحل هي نظرية ليا مش أكتر علفكرا
_ في عندنا حاجه اسمها الأحبال الصوتية ربنا خلقها عشان صوتنا يعبر عن ردود أفعالنا بس واضح إن أحبالك بعافية شوي
خدت الورقة والقلم اللي جنبي واللي طلبتهم من دكتور سالم وحطيتهم قدامه وكتبت ليه يطلع برا
_ احم أنا أصلًا كنت خارج بس مش لأجلك لا لأجل عيونك السود دول يا قمر
كنت بضحك لما بسمع جملة أكتر مرضى نفسين هم نفسهم الدكاترة النفسين بس دلوقت متأكده تمامًا منها لأن الشخص اللي خرج دا واضح أنه أبله أكتر من كونه طبيب نفسي !!
