- متفضلش تدوق من كل حاجه كدا
- ياروحي انا بتأكد من طعم الاكل افرضي كان عادب
- تتاكد من طعم الاكل برضو ولا تاكل نصه
- اي دا انتي اخدتي بالك
- من بدري وعامله عبيطه
جه وقف قدام وباس ايدي وراسي - انا واثق انهم هينبهروا بأكلك
ابتسمت وداريت وشي عنه، علشان ميلاحظش كسرتي - وهو اول مره يدوقوا اكلي يا احمد
- انا متجوزك ليا 5 سنين وكل مره باكل من ايدك بحسها اول مره
- انت بس علشان بتحبني
- ومين يعرفك ياقمر انت وميحبكش
- طب ساعدني
- هاتي اعملك السلطه
سبته يعمل السلطه وانا كنت بقطع في الفراخ وكل تفكيري رايح اتجاه موضوع واحد ومرعوبه حد منهم يفتحوا معايا، حسيت بأيده الحنينه وهي بتحضني ووشه اللي بيلمس وشي بكل حب
- الجميل سرحان في اي
بصتله وانا مبتسمه - محدش واخد عقلي غيرك
- يابختي ياهنايا، ما تفكك من العزومه والأكل وتعالي نعمل شهر عسل جديد
- خف دلع
- انتي امي واختي وحبيبتي ومراتي لو مكنتش ادلع عليكي ادلع علي مين
- ادلع عليا انا طبعا طلع عيني انا راضيه
ضحك بصوت عالي واخدني في حضنه - متخافيش حتي لو حسيت انك مش قابله دلعي هش هروح ادور علي اللي تدلعني
- اشمعني؟
- اللي بيدور دا ييقى مش بيحب، وانا بحبك اوي اكتر من نفسي عندي اصبر عمري كله عليكي ولا اني اقعد ثانيه في حضن غيرك
لقيت نفسي بضربه علي كتفه - وتقدر تعيش في حضن غيري
- حتي لو طلبتيها انتي بنفسك مش هعملها
لقيت نفسي بترمي جوا حضنه وخايفه يجي عليا وقت والاقيه جوا حضن واحده غيري، الموت اهون من اللحظه دي بالنسبالي
- ها خلصتي
- اه، انت رتبت البيت احسن مني
- ايوا ياروحي امال، وراكي رجاله
- عاش
- عاوزك تتشيكي كدا وتبقي عروسه جديده
- اتشيك اي دا باباك ومامتك واخوك ومراته اللي جاين
- واي يعني يانشوى انا عاوزك تبقي زي القمر، وتغيظي وفاء مرات محمد
ضحكت وبصتله بخبث - علي كدا انت ملاحظ
- يابنتي انا من ساعه ما اخويا اتجوزها وسكن معانا في البيت وانا ملاحظ انها بتغير من الهوا اللي هي بتتنفسه، واصلا حاولت كتير تبعدني عنك
- كنت باخد بالي بس احسن حاجه عملتها انك خلتني اسكن بعيد
قام وقف قدامي ومسك ايدي براحه - ممكن اطلب منك طلب يانشوى
بصتله بخوف وانا عارفه هو هيقول اي - اكيد ياحبيبي
- ماما ووفاء حاولي تطنشي كلامهم علي قد ما تقدري علشان خاطري
حسيت بخنقه وكأن وداني لسه سامعه كلامهم السخيف من دقيقه، وعنيا بدأت تدمع وحدها - نشوى اهدي بس، انا اختارتك انتي انا محدش يلزمني غيرك حرفيا مكتفي بيكي عن الدنيا كلها، متخليش حياتنا تتعكنن علشان خاطر اي حد وانا اهو اللي بقولك، زيارتنا ليهم او زيارتهم لينا دا صله رحم ياروحي وانا مش عاوز اخد ذنوب واتحاسب، والله لولا كدا انا كنت بعدت عن الكل علشانك
مسحت دموعي ومسكت ايده وابتسمتله، اللي تعيش مع واحد زيه لازم تبتسم مجرد ما تسمع صوته، حبه ليا بيبان حتي في طريق نفسه يمكن ببالغ بس دا اللي عايشه فيه وشيفاه - وانا عمري ما هخليك تبعد عن اهلك علشاني
- عارفك اصيله، تعالي بقي انقيلك طقم حلو كدا تقابليهم بيه
اختارلي فستان ابيض وفي ورد اصفر بسيط، لفيت طرحه صغره لونها ابيض، كان احمد بيفتحلهم الباب انا مش بكرهم بس هما عمرهم ما حاولوا يحبوني شايفين احمد اجرم انه حبني وصمم يتجوزني وانا اقل منه في مستوى التعليم، لانه دكتور جراحه وانا مجرد واحده خرجت من المدرسه وهي في ثانوى بسبب قله الفلوس وروحت اشتغل في العياده بتاعته بالصدفه، وساعتها حبينا بعض، خايفه يجي عليه وقت يزهق من الحرب اللي دخلها بسببي طول ما الحرب مستمره وهو معهوش سلاح يدافع بيه اكيد هيخسر او يستسلم، والاسوء من كل دا اني مش قادره اساعده
الباب كان بيخبط - اتفضل
فتحت الباب ولقيتها مبتسمه ابتسامه كره انا اتعودت عليها - لقيتك مش مع جوزك برا قولت اجي اسلم عليكي هنا
حاولت اتمالك اعصابي لان لسه العزومه ف اولها - لا ابدا اصل خلصت اكل متأخر ولسه كنت بلف الطرحه
- اه ما انا قولت كدا
كان جاي طاير عليا وحضني جامد، يمكن هو الحسنه الوحيده اللي بتهون عليا وجودهم المستفز - وحشتني اوي
- وانتي كمان ياطنط نشوى وحشيني اوي اوي فين اللعب بتاعتي
- انت عارف بتلاقهم فين
قرب مني ووشوشني في ودني - انا بحبك اكتر من ماما بس مينفعش اقول قدامها
ابتسمت لبرائته الجميله وادتله بوسه علي خده وسابني ودخل اوضه الاطفال يلعب - كان نفسي تجيبي بنت واجوزها لانس
- ان شاء الله
- امتي بقي دا هو عنده 7 سنين يعني فرق السن هيبقي كبير
كان جوزها بينده عليها ف خرجت، هو ليه الناس مش مدركه ان كلامهم المؤذي بينزل علينا زي النار بالظبط، بيحرق وبيسيب اثر عمر الايام ما بداويه، كان احمد ايده معايا اول بأول وكنت ملاحظه وفاء وهي وبطلع نار من ودانها، وكانت بتحاول تمنع احمد انه يساعدني بالعافيه
- معلش هاتي ياوفاء انتي ضيفه اقعدي وانا هساعد نشوى
- لا ابدا مش هيحصل انا اللي هساعدها دا بيتي
- معلش روحي انتي لانس وماما بتحتاج حد يتكلم معاها انتي عرفاها
بصتله بصه استحقار، اللي اي واحده تفهمها اني انا ممشياه وانه مالوش كلمه، محدش بيفهم ان احمد خدوم وبيحب بيته ومراته
- قالتلك اي
كنت بحط الاكل في الأطباق وكلمته خلتني اقف - ابدا ياحبيبي مش حاجه مهمه
- قالتلك اي بقول
اتنهدت وحكتله الموقف،اخد الاطباق ورتبهم علي السفره
- ماشاء الله يانشوى يابنتي اكلك احلي من حماتك وسلفتك
- ربنا يخليك ياعمي الف هنا
- عارف يابابا انا مش نفسي اخلف ليه
- ليه يابني ؟!
- خايف اجيب بنت وانس يقع في حبها والايام تجبرني اخلي وفاء تبقي حماة بنتي
ضحك بابا احمد بصوت عالي - هتعيش بنتك مع عقربه
- قصدكم اي
فضلوا يضحكوا حتي محمد كان بيضحك، انا كان نفسي يبقالي اخت لكن هي عمرها ما حبتني وشايفه انها احسن مني
- علي فكرا يا احمد انا فتحت كلام مع ام هناء اول امبارح انك هتخطب هناء وحددت معاها معاد الاسبوع الجاي علشان تتقدم رسمي
احمد بصلي بذهول - انتي بتقولي اي ياماما
- بقول الصح ياولدي انت لازم يبقالك حته عيل قله الخلفة دي ليها مليون حل بس انا ساكته بمزاجي
- بس انا مش عاوز اتجوز
- وانا عاوزا اشوف عيالك قبل ما اموت
- انتي مقولتليش ليه انك كلمتي ام هناء
- اهو قولت ليكم كلكم وهتيجي انت وولادك الاتنين نخطبها
كنت متوقعه منها تعمل كدا، حاولت كتير معاه علشان يطلقني ومكنش في اسباب دلوقتي هترمي الكوره في ملعبي وتخليني اطلب منه الطلاق، دخلت المطبخ وحطيت ميه اغليها علشان الشاي كنت سامعه الحوار اللي بينهم ونظرات وفاء اللي كلها فرح، كان في سؤال بيدور في بالي ومش لاقيه اي اجابه " ازاي الناس تكره شخص من غير ما تتعامل معاه وتشوفه كويس ولا وحش في حين ممكن يقتلوا نفسهم علشان شخص تاني وعارفين انه وحش وبيستغلهم" مخرجتش تاني لحد ما مشيوا، كنت واقفه قدام المرايا وبقلع طرحتي لقيته جاي عليا وحضني زي الطفل اللي رجع لبيته وامانه، زعق كتير واتخانق اكتر ومشاهم من البيت
- متسكتيش اتكلمي
- معاهم حق
بصلي بحزن - عوزاني اتجوز غيرك
- عاوزا يبقالك اولاد وتبقي احلي بابا
- انا باباكي انتي
- معلش اسمع كلامهم
- نشوى ارجوكي بلاش الكلام دا وبعدين الدكاتره كلهم قالوا مافيش مشكله عندنا هي مسأله وقت
احيانا العياط بيبقي مصدر قوه مش ضعف مصدر تمسك مش استسلام - متعيطيش
اخدني في حضنه - اوعي تسبني هتكسر بجد يا احمد
- بطلي هبل هما براحتهم يعملوا اللي يعملوه عمري ما هسيبك
شالني لحد السرير ونام وانا جوا حضنه، احساس الامان معاه ميتوصفش، بس الاحلي انه هو بيستمد امانه بوجودي وبحضني، الاحلي من اي شعور حلو انه يبقى متبادل
- تمام ماشي انا هتصرف
كنت بحط الفطار ولاحظت ملامح وشه اتغيرت - في اي ؟
- اترفدت من الشغل
- نعم!!!!
- عادي يانشوى مش لازمني اوي شغل المستشفي واكيد امي اللي طلبت من المدير يرفدني
- انا اسفه
قام وباس علي راسي وحط شنطته علي كتفه - بطلي هبل ما في العياده ولا انتي نسيتي
حاولت اطمن بس قلبي مكنش مرتاح، بعد ساعتين بالظبط لقيته رجع - اخدت الشقه صح ؟
- اه لقيت عليها قفل
بدات اخاف - هنعمل اي يا احمد
لقيته بيشغل التلفزيون بكل هدوء وبيغمزلي - ما تجيبي بوسه
- وقته دا
- لا دي في اي وقت
- بتكلم بجد
- هاتي بوسه وانا اقولك هعمل اي
روحت قعت جمبه وادتله بوسه - هو انتي اختي انا عاوزاها في بؤي
- طب قولي الاول
- اتصلت بواحد صاحبي معاه مستشفي جديده ومحتاج دكاتره جراحين واول ما عرف رحب بيا جدا
- طب حلو اوي
- بس في مشكله
- اي هي؟!
- هبدأ شغل من اول الشهر
- وهنكمل باقي الشهر دا ازاي
- ما تجيبي البوسه بقي
- خف يا احمد ومتخرجش كتير لحد ما الشهر دا يخلص
- طب بقولك
بصتله وانا داخله المطبخ - اي
- هنروح مشوار انا وانتي بالليل
- مشوار اي
- بالليل بقي وهاتي الاكل جعان
مش هنكر ان احمد عنده برود اعصاب رهيب، بس عقله دايما شغال ودايما بيعرف يخرج من اي مشكله تواجهه ودا اللي مخليني مطمنه اني اخترت راجل
- وااااو هتتعاكسي مني كدا
- محدش يقدر يبصلي وانت معايا
- دا اللي يبص اخلع عينيه من مكانهم
حطيت ايدي في ايده واتمشينا في الشارع - هنروح فين
- قولت اخرجك شويه اكيد نفسيتك محتاجه اي تغير علشان اللي حصل دا
- احمد مش معانا فلوس وانت عارف دا هنمشي نفسنا بالعافيه لحد ما تستلم الشغل الجديد
- صدقيني لو جنيه واحد اللي معايا طالما قادر اسعدك بيه اكيد مش هتأخر
- طب يالا نروح
- ابدا مش هيحصل
وقفنا قدام مطعم كبير وشكله غالي - لا مش هينفع شكله غالي
- اشششششششش ادخلي
قعدني وقعد قدامي، وطلبلنا اكل - فاكره زمان اول ما حبينا بعض كنتي تقوليلي بقي الخدامه تحب البيه
ضحكت بصوت بسيط - والبيه حب الخدامه
- عمري ما شفتك غير ست البنات كلها
- انا كنت بمنع نفسي احبك
- تمنعي اي انا من اول ما شوفتك وقولت البت دي لازم تتباس مني
ضربته علي ايده - الناس تسمعك
- ما يسمعوا دا انتي حب سنتين واربع سنين معافره وسبحان الله كنت بتمسك بيكي اكتر مع الايام
مسكت ايده - انا لقيت نفسي جواك
جه الاكل وفضلنا ناكل، وكل واحد فينا يأكل التاني زي اي اتنين حبيبه جديد، وافتكرنا كل مواقف الحب اللي بينا، شربنا الشاي وطلب الحساب واخد الباقي، مسك ايدي وحطها جوا ايده
- مكنش في داعي للمكان الغالي دا
- الغالي ميدخل غير المكان الغالي اللي زيه
- الباقي كام يا احمد
- سبعه جنيه هشتري بيهم لب واحنا ماشين نتسلي
- انا بحبك
- دا انا بعشقك
قطع كلامنا الفون اللي جاله وهو طاير من الفرحه، وهيستلم وظيفه في مستشفي خاصه كان نفسه يشتغل فيها من زمان
- عمري ما شلت هم حاجه عارف ربنا بيعوضني
اخدني في حضنه وسط الناس كلها - احمد
- نعم
- انا حامل
