اسكريبتات

اسكريبت 43

- " ياليتني متُ قَبل هذا وكُنت نسياً منسيا ● فَناداها من تَحتِها ألا تحزني قد جعل رَبُكِ تحتكِ سريا ● وهُزي إليكِ بِجِذعِ النخلةِ تُساقط عليكِ رُطباً جَنيا ● فكُلي وإشربي وقَري عينًا فإما تَرين من الَبشرِ أحداً فقُولي إني نذرت للرحمن صوماً فلن أُكلمَ اليومَ إنسياً " صدق الله العظيم
- ما شاء الله يا غفران تسميعك جميل وصوتك أجمل ، بس حاولى توطيه شوية
- بحاول والله يا ميس بس مش عارفه ، هو صوتي كدا
- يلا مش مهم ، ان شاء الله تسمعي بكره للآية 58
- ماشي يا ميس ، همشي دلوقتي
- في رعاية الله يا حبيبتي

طلعت من الدار
ورجعت البيت ، صليت وخلصت مذاكرة وبعدين لقيت ماما داخله وفتحت نفس الحوار

- ماما من قبل ما تقولى أي حاجه أنا مش هوافق على كريم لو انطبقت السما على الأرض
- طيب فهميني ليه ؟
- قولتلك مليون مرة وهقولك للمرة المليون وواحد ، أنا حاطه في دماغي مواصفات للشخص اللى هتجوزه ومش موجودة في كريم
اللى هتجوزه لازم يبقا عارف ربنا ويكون بيصلي وطبعاً مش زي أستاذ كريم اللى مقضيها 24 ساعه على فونه
- ابقي غيريه بعد الجواز يابنتي
- ماما بقولك ايه .. أنا سامعه بابا بينادى عليكي روحي شوفيه بسرعه
- بس أنا مش سامعه حاجه
- بس أنا سامعه ، يلا بقا

ماما خرجت وانا هموت من أم الموضوع اللى كل شوية يتفتح ده
أعمل ايه في ماما يا جماعه ؟
في يوم من الايام هتجنني أنا متأكدة
المهم نمت وتاني يوم روحت الكلية وبعدين وأنا راجعه روحت الدار

- تسميعك وحش ليه النهاردة ؟
- معلش يا ميس عزة ، امبارح كنت متدايقه ومعرفتش أحفظ كويس ، بس ان شاء الله بكرة أسمعهم كويس مع الجزء الجديد
- لا مفيش جديد ، انتى هتجبيلي السورة من أولها تاني
- خلاص ماشي يا ميس ، يلا سلام عليكم
- لا استني متمشيش ، عاوزاكي في موضوع
- موضوع ايه
- هخلص تسميع للبنات وهنتكلم

قعدت مستنياها نص ساعه لما خلصت ومبقاش حد موجود في الحلقة غيري أنا وهي

- في عريس كلمني عنك يا غفران وحابب يتقدملك
- عريس !
- أيوا وشخص كويس جداً وهيراعي ربنا فيكي
- طيب هو شافني فين
- الصراحه معرفش ممكن يكون شافك هنا بس هو كلم ميس رحمة وهي قالتلى أكلمك
- طيب أنا اعرفه
- ممكن تكوني شوفتيه بردوا ، هو اسمه الشيخ أدهم وهو صاحب دار التحفيظ دي
- ايه !
- ايه مالك اتخضيتي كدا ليه ؟
- لا مفيش ، انا مبتجوزش ، مع السلامه

قولتلها كدا وجريت ع البيت
وانا بفكر وبقول لنفسي : بقا على آخر الزمن أتجوز واحد متجوز أربعة ؟
ليه ؟ عبيطة ولا عبيطة ؟
وكمان البجح باعتلي ومفكرني هوافق
وأصلاً هيتجوزني ازاى وهو على ذمته أربعة
أكيد طلق واحده ابن المفترية
لو أشوفه بس ؟ هشرحه

- مالك يابنتي ؟ بتكلمي نفسك كدا ليه ؟
- اقعدي بس يا ماما دلوقتي
- انتى اتجننتي ؟
- أنا داخله أوضتي أنام شوية