متوافقيش على العريس أنا هتقدملك بكرة♥️..
المسدج الغريبه دى وصلتنى من رقم غريب على الوتساب يوم الأحد الساعه ٥:٤٠ مساءً يعنى ٦ إلا تلت ، المسدج أثارت فضولى أنى أعرف مين صاحبها ، دخلت على رقم الشخص اللى بعتهالى لقيت أسمه مكتوب * "... *
حسيت بـ أنه ممكن تكون دى أشتغاله ، أو أستظراف مثلاً من حد من صحابي
سكت شويه ودخلت أعمل مج نسكافيه بلبن سمعت رنه موبايل بابا وبعدها رد ، لقيته بيقوله لسه البنت بتفكر أن شاءالله تقولنا ردها وأبلغكم و بأذن الله خير يرب العالمين♥️..
...
شربت النسكافيه ونا في بالى بسأل نفسي عن المسدج اللى وصلتنى هل هى حقيقيه ولا أشتغالة ولا أنا بيتهيألى أنه في حد بعتلى مسدج ، مسكت تليفونى اتأكد لقيت المسدج موجوده فعلاً ولقيت الرقم أونلاين..
بعتله "ميـن!؟"
رد عليا "مش مهم المهم إنك متوافقيش لو وافقتى هتبقى بتأذى نفسك واللى حواليكى ، وبتأذينى أنا شخصياً ، أرفضى "
قولتله "طيب بس أعرف أنت مين !؟ "
قالى "هتعرفي في الوقت المناسب وبعدها عملى بلوك"..
....
مسكت تليفون بابا ورنيت على الرقم لأنه معنديش رصيد ، رد عليا وقالى " كنت عارف أنك هتتصلي متحاوليش تعرفي أنا مين هتعرفي في الوقت المناسب".. وقفل السكه علطول .
فضلت أفكر طول الليل هو ده مين وياترا هيحصل ايي لو وافقت على العريس وأزاى هيأذينى ، أنا مبحبش الألغاز ، أنا بحب المغامرات وهوافق على العريس خصوصاً أنى حسيت بـ أرتياح لما أتكلمت معاه ، وخرجت من أوضتى وندهت على بابا وقولتله " بابا أنا موافقه"..
...
رن بابا على والد العريس وقاله أننا موافقين تقدرو تشرفونا في أى وقت ، قلبي بدأ يدق جامد ونا بفكر في المسدج وصاحبها..
حدد والد العريس معاد مقابلتهم لينا في البيت هيكون يوم الخميس الساعه ٧ .
...
يوم الاربع بليل جاتلى مسدج مكتوب فيها عرفت أنه خطوبتك بكرة ، يعنى مسمعتيش كلامى كده أنتى تبقي جانيه على عريسك وأهلك ، أما أنتى محدش هيلمس منك شعرة طول منا عايش وهاخدك ذوق عافيه هاخدك أنتى حقي من الدنيا ونا مش هسيب حقي لحد .
وبعدها عملى بلوك تانى ، منكرش أنى خوفت بس أنا عنيدة وقررت أكمل وروحت يوم الخميس الكوافير علشان أظبط نفسي ، ونا في طريقي للكوافير لاحظت حاجه غريبه ، غريبه جدا .
فـ وحده ماشيه ورايا من أول ماخرجت من البيت ، ودخلت نفس الكوافير ، قعدت جنبي وفضلت تبص فيا جامد ، جت البنت اللى شغالة هناك قالتلها ها ياحببتى هتعملى ايي!؟
قالتلها أنا مستنيه صحبتى هنا ، وفضلت موجودة طول منا موجودة وبعد ما خرجت من الكوافير خرجت هى كمان وفضلت ماشيه ورايا لحد البيت .
....
خوفت منها وروحت حكيت لأهلى عليها بس بابا قالى دى أكيد صدفه بس أنا متأكده أنها مش صدفه فى لغز ، الحكايه فيها لغز ..
....
رن جرس الباب بتاعنا ، فتحت الباب لقيت البنت دى معاها ورقه مكتوب فيها ..
"تليفونى فصل شحن مش عارف أبعتلك أى مسدج على الوتساب ، بس أرفضى أحسن ، أرفضى ونتى عيشتك وحياتك كلها هتتقلب جنة على الأرض ، أرفضي علشان خاطرى وخاطرك وخاطر قلبي "..
خلصت قراية الورقه وببص للبنت علشان أسألها هى مين ولا ايي حكايتها ومين ده ، بس للأسف أختفت .
...
بدأت أخاف وقررت أنى أعرف دول مين وعايزين ايي ، نزلت جرى على الشارع ، لقيت البنت مش موجودة وطلعت البيت تانى .
تانى يوم جه العريس وأهله ، وأحنا موجودين كلنا مع بعض في بيتنا ، النور طفي وسمعنا صوت حد بيصرخ ، وبعدها بعد خمس دقايق النور رجع ، العريس أختفي .
.....
فضلو أهلو يرنوا على رقمه مغلق ، وفضلنا نصرخ اللى هو أزاى حد يختفي من وسطنا ايي اللغز ده ، ساعتها جت في بالى المسدج وكمية التحذيرات اللى أتقالتلى ونا رفضت أنفذها ، أبو العريس فضل يزعق في بيتنا بابا قاله أتفضل زعق برة أنا معنديش بنات للجواز وأبنك دور عليه بمعرفتك ، البيوت ليها حرمه ، أتفضل برة .
....
دخلت أوضتى بسرعه رنيت على الرقم اللى بيجيلي منه المسدجات ، مردش رنيت تانى ، رنيت أكتر من ٤٠ مرة وسكت .
بعدها رن عليا هو وقالى " هاا ، أدبحه ولا هترفضي من سكات ويرجع لأهله ، يلا أرفضي علشان متخسريش حد من أهلك أنتى وبردو في الأخر ليا ، أنتى ليا ."
.....
جريت على بابا حكيتله على كل حاجه ، ونا بحكى لبابا الباب خبط جامد جداً كأنه بوليس ، خرج بابا وفتح الباب.
وقال "أنت عايز ايي تانى منى مش كفايه أخدت ورثى وطردتنى من بيت أبويا عايز ايي تانى "
عرفت ساعتها أنه اللى على الباب عمى اللى ظلم بابا بعد وفاة جدو وستى علشان كان بيكره ماما ورافض جوازته منها .
عمى لبابا " أبعد عن طريق أبنى وبلاش تلف عليه ، وملكش حقوق عندى ، حقك خدته زمان ومش هديك أى حاجة تانى "
بابا "أبنك مين وأنت بتتكلم عن أيي وأتفضل بره يلا ، حقي عند ربنا "..
مشي عمى وهو بيهدد بابا لو مبعدتش عن طريق أبنى هموتك هموتك فاهم .
عمى وهو نازل على السلم وقع سمعنا صوت الوقعه نزلنا كلنا نجرى ، بابا أخد عمى وداه المستشفى .
.....
بعدها عرفنا أنه مريض كانسر وأنه حياته هتنتهى في الفترة من ٥ :٧ شهور .
عمى رن على أبنه جه المستشفى وأحنا كلنا هناك ، دخل الأوضه ، سلم عليا وعلى بابا وماما ، وأتكلم مع أبوه قدامنا على أنه يرجع الميراث لأخوه ولكن عمى رفض وبابا قام أتعصب ومشي وقاله حقي عند ربنا .
....
أمى نسيت موبايلها فى الأوضه في المستشفى عند عمى قولتلها خليكى أنتى أنا هجيبهولك ، دخلت الأوضه ، لقيت عمى نام وأبنه ماسك تليفونه وفاتح الوتساب .
قولتله بعد أذنك ماما نسيت تليفونها هنا !؟
قالى أيوا منا كنت هجيبهولكم البيت ، أتفضلي ، عايزة حاجه!؟
قولتله لا شكراً ، أخدت موبايل ماما ونزلت.
....
جاتلى مسدج من نفس الرقم ونا نازلة على السلم مكتوب فيها "بحبك ♥️"
خوفت أكتر رنيت كتير على الرقم مردش عليا نهائي .
بعتلى مسدج تانى وقالى "صح أوعى تخافي من البنت اللى بتقابلك دى أنا دافعلها فلوس علشان تحميكى وتفضل جمبك "..
.....
رن عمى على بابا وقاله ملكش عندى حقوق ، أنت أخدت حقك زمان أبعد عن أبنى والغريب أنه بابا مبيكلمش أبنه فعلاً ، وأحنا تقريبا أول مرة نشوف أبنه ده كانت في المستشفى.
....
بعدها جه البوليس لبابا بتهمه "الخطف" العريس لسه مظهرش ونا مش عارفه مين اللى بيبعتلى ولا مين اللى خطفه ، رنيت على الرقم وكالعاده مردش ، بابا أتحبس يومين وبعدها حصلت حاجة غريبه جداً أهل العريس قدموا تنازل عن المحضر والعريس ظهر ، وظهرت عليهم فلوس كتير لأن هما ظروفهم مش أد كده ، والأغرب أنه العريس رن عليا قالى أنا منفعكيش ونا اللى عملت الحركه دى وخليت ناس تخطفنى علشان أخلع من جوازتك .
ساعتها اتأكدت بقا أنه في لغز ولغز كبير كمان .
....
أهل بابا في البلد منهم ٤ ولاد عم بابا جم لينا البيت ومعاهم أبن عمى جايين يخطبونى لأبن عمى.
بابا رفض وقالهم آسف طلبكم مرفوض تماماً دى بنتى الوحيدة أستحاله تتجوز من أعدائي .
حاولو كتير يقنعوا بابا وبابا رفض ، ونا كمان رافضه هو ايي ده وأزاى أنا أتجوز أبن عمى اللى ظلم بابا ، مشيوا من عندنا ، بس أبن عمى نسي موبايله .
الفضول أثارنى وفتحت الموبايل ، لقيتنى تلقائي بدخل على الارقام .
فتحتها لقيت رقم مكتوب "أغلى ماعندى" فتحت الرقم لقيته رقمي..
ونا في قمة الذهول ، دخلت بسرعه على الوتساب لقيت كل المسدجات اللى بتجيلي عنده ساعتها عرفت أنه هو اللى بيبعتلى المسدجات دى .
لقيت رقم تانى مكتوب "عمر يسري" دا العريس اللى كان متقدملى بينهم أتفاق أنه يدفعله مليون جنيه علشان يبعد عنى ويتنازل عن محضر الخطف .
...
لقيت شات بينه وبين بنت رقمها مش متسيف بتقوله أتطمن ياباشا خطيبتك فى حمايتى ، عرفت ساعتها أنها البنت اللى بتراقبنى ، وعرفت انها بتاخد منه ٥٠٠٠ في الشهر مقابل أنها تمشى ورايا في كل حته .
لقيت حاجه أغرب وأغرب لقيت رقم "علياء يسري " وصورة أخت العريس اللى كان هيخطبنى وتفاصيل عننا من ساعة ما أتقدملى ، حسيت بخوف شديد منه وأنه هو أزاى عارف كل ده ، وأزاى عنده الثبات ده ومقاليش أنه أبن عمى ، قررت أسكت وأعمل نفسي مش عارفه حاجه وأكمل في سكوتى .
....
باب الشقه خبط ، فتحت لقيته هو ، قالى لو سمحتى نسيت تليفونى هنا قولتله أتفضل قالى كنت ناسي تليفونى قاصد علشان أرجع من تانى ، أنا عايزك في الحلال والوصول ليكى صعب ، حاربي معايا الدنيا ، أوقفي جنبي أنا رايدك .
مشي ونا ساكته ومذهولة ومش عارفه أعمل ايي !؟
....
فضل أبن عمى يتقدملى كل أسبوع تقريباً ويترفض ، بابا راح لعمى البيت وقاله لازم أبنك يبعد عن بنتى وحكاله اللى حصل ، عمى بردو رفض وقاله أنا عمرى ماهوافق على بنتك دى أذا كان رافض جوازك من أمها هجوز أبنى ليها ، المشاكل بدأت تزيد بينا وبينهم لحد مافي يوم أبن عمى أختفي .
جه عريس أتقدملى قررت أوافق من غير ما حد يحس ، من غير خطوبه ولا أى حاجة وبالفعل نجحت أنى أتخطب بدون ما أى حد يحس حتى جيرانا في العمارة محسوش ، البنت اللى بتمشي ورايا أختفت فجأة ، معظم التفاصيل أختفت ، بالى مشغول هو فين ابن عمى راح فين !؟
....
لحد مافي يوم جاتلى مسدج من رقم سعودى مكتوب فيها " أنا في السعوديه طلعت عمرة مخصوص ليكى ولمست الكعبه ودعيت أنك تبقي من نصيبي ، أرجوكى متخذلنيش" ..
المسدج خطفتنى أنه هل في حد بيحب حد بالطريقة دى ، بدأت أفكر فيه فعلا .
ساعتها أفتكرت إنى مخطوبة أنه عيب أكون مخطوبه لواحد وأفكر في واحد تانى.
.....
وفي يوم كان خطيبي عندى جت مكالمه لبابا أنه عمى أتوفي ، أتوفي وهو ظالم أخوه وواكل حقه ، قالوله أنك لازم تجى توقف قدامه هو وميت تقوله مسامحك يا أخويا علشان مينفعش يقابل ربنا ظالم .
راح بابا وبالفعل عمل كده ، وقابل أبن عمى هناك فتح معاه موضوعنا تانى بابا قاله إنى أتخطبت ، وأن خلاص قربت أتجوز .
....
أبن عمى ساب واجب أبوه وجه خبط على بابنا جامد فتحت الباب قالى رنى على خطيبك دلوقتى أفسخى الخطوبه هاخدك غصب.
فضلت أزعق معاه جامد جه بابا وراه بسرعه وطلع من جيبه مسدس وضرب طلقه جت فى رجل أبن عمى مشي وهو سايح في دمه وبيقول " هاخدها ولله ما حد يلمسها غيري " .
بعدها رن عليا حكالى قالى
أنا قابلتلك صدفه في العربيه ومشيت وراكى وسألت عليكى عرفت انك بنت عمى ، مكنتش أعرفك بسبب خناقات أبويا وأبوكى وأنك أتولدتى بعيد مننا أصلاً .
*علياء يسري* دى زميلتى فـ الشغل من خلال كلامنا عرفت أنى أخوها هيخطب وحده والوحده دى أنتى ، لقيتنى ببعتلك أحذرك من الخطوبة بس أنتى عنيدة وتعبتينى معاكى كتير شهور ونا بحاول أحنن قلب أبويا عليكم وهو رافض ونتى وأبوكى رافضين تتخطبي ليا ، أنا تعبت ولله أنا حبيتك ، أنا أتغيرت علشانك ، أنا أكتر واحد كنت رافض أرجعلكم حقكم ومشجع أبويا على ده ، بس لما حبيتك عايز أرجعلكم كل حقوقكم اللى ليكم واللى مش ليكم ، أنا بموت فيكى خليكى معايا أرجوكى .
....
منكرش أنه كلامه أثر فيا وقررت أقف جمبه وجمب بابا وأرجعله ميراثه اللى راح .
رنيت على خطيبي فسخت الخطوبة رن على بابا للأسف وحكاله وجه بابا ضربنى وحدد معاد كتب الكتاب .
خد منى الفون وكل حاجه ممكن أوصل من خلالها لأبن عمى .
....
وفجأة بابا وقع مننا جرينا بيه أنا وماما على المستشفى قالنا دى جلطه في القلب وأحتمال خروجه من المستشفى قليل جدا وأنه لازم يعمل عمليه حالاً ، العمليه هتكلف أكتر من ٢٠ ألف جنيه .
رنيت على أبن عمى وحكيتله على اللى حصل جه المستشفى ومعاه أوراق كتير جدا
...
رجع لبابا حقه ودفع فلوس العمليه والعلاقات أتصلحت بينه وبين بابا
جالنا البيت وقاله ياعمى أنا طالب أيد بنتك ، وافق بابا ورن أبن عمى فوراً على المأذون وكتبنا الكتاب .
قال المأذون "بارك لكم وبارك عليكم وجمع بينكما في خير"
قام حضنى وشالنى من على الأرض وقالى"لم يكن الوصول إليكِ سهلاً ولكنه عظيماً♥️"..
الحب عظيم ، الحب بيخلينا نعمل أى حاجة وكل حاجه مجنونه ، الحب روح بتغامر وقلوب بتتكلم ، الحب أساس رحلتنا في الحياه♥️👌🏻
