فصصيلي السمك بقي ي ريهام ..!
= و إنت أتشليت بعد الشر!
- ياربي أنا متزوج دبش ليه كده ؟.
= بقي أنا دبش ي عبدو شُكرًا ،، وسبت السفرة و قومت..
- ياربنا يعني كمان قموصة !، استني ي ريهام أنا بهزر..
= ألتفت ليه وأنا بكتم دموعي،، الهزار مش في كده ي عبدالرحمن، كمل أكلك ولمَا تخلص نادي عليا هعملك قهوتك..
* سمعته بينفخ بضيق ورمي المعلقة من إيده ومشي للبلكونة، أنا وعبد الرحمن متزوجين بقالنا شهرين مش هقول قصة حُب عظيمة وكان بينا مواقف أفتكرها وأنا قاعدة جمبه علي الكنبة وبنضحك عليها، بالعكس علاقاتنا كانت قصة كلاسيكية بحتة، مامته سمعت عني، بنت محترمة وجميلة سألت عليا وعرفتني شافتني خطبتني لأبنها الجميل "عبدالرحمن."
علاقاتنا كانت مُريحة، علاقة هادية لدرجة كبيرة، مُملة شوية، أنا مكنتش حابة كده، أنا كان نفسي أعيش بجنون مع خطيبي، مش قصدي في الخروج ولا في كلام للحب لأني عارفة أنه حرام بس علي الأقل يعرف يفرحني، يعرف تفاصيلي ويعرف أنا بحب إيه ومبحبش إيه، يلاحظ تعابيري الِ أنا واثقة لو لاحظها هيضحك ويفرح من قلبه لأن بعمل تعابير وشي بشكل يضحك، يكون تافه ويسمع معايا كرتون، اتجوزنا اهه ولسه ميعرفش عني كتير، ميعرفش أني بحب الكرتون وبحب القهوة زيه، وبحب الألوان الكتيرة وبحب لبس الأطفال وبحبه..
مش هنكر أنه ممل ويكاد يكون أنطوائي بس بحبه، هدوئه جميل علي الرغم من أني أوقات كتير بمل منه، رزين وعاقل بس أحيانًا نفسي يكون مجنون معايا، يعني مثلًا أقوله يلا نلبس الفجر وننزل نتمشي يقولي يلا، أقوله في عز الشتا وهي بتمطر يلا نشتري آيس كريم من عمو الِ في آخر البلد يقولي قرار مجنون بس موافق، نلبس زي بعض ونتمشي إيد بإيد علي الكورنيش وفي إيدنا التانية حمص الشام أو ترمس، تفاصيل كتير مُفتقداه معاه بس هو لطخ ومش حاسس..
- ي ريهام قميصي الأسود فين؟!
= رديت عليه وأنا في المطبخ، عندك ي عبدالرحمن في الرف الثاني علي الشمال كده ..
- طب والكوتشي الأبيض !!
= أتنهدت وأنا بغسل الأطباق،، تحت السرير ي عبدو طلعته الصبح ونضفته.
- تسلم إيدك ي حبيبتي.
= أبتسمت بأمل علي أني أكون حبيبته فعلًا..
- باس رأسي زي ما متعود كل شوية وأنا بقيت مُدمنة لحركته دي،، عايزة حاجة وأنا راجع!!
= هات بس جوافة معاك وسلامتك علي كده .
- ماشي، يلا مع السلامة..
~ المدام الحلوة عاملة إيه.؟
= بصيت عليها بضحكة،، تعالي ي فرحة، شرفتي بيتي المتواضع.
~ أمم والحليوة جوجك مش هنا .!
= ضيقت حواجبي بضيق، متقوليش عليه حليوة بس .
~ هوف هوف بنغير والا إيه!
= هزيت كتفي لفوق،، مش زوجي قُرة عيني يحقلي أغير عليه..!
~ ماشي ي ست المهم طمنيني إنتو بخير .؟
= أتنهدت،، بخير ، تشربي إيه.؟
* مهما كانت علاقتك بصحبتك إيه مينفعش تحكي كل حاجة، في حاجات بتكون خاصة أوي مينفعش تتحكي ولا تتقال، يعني مثلًا مينفعش أروح أقولها أني عايشة مع زوجي كأننا أغراب عن بعض، ميعرفش بحب إيه ولا بكره إيه!، مينفعش أقولها أنه مُمل ومبنعرفش نحكي ونتكلم مع بعض زي أي زوجين طبعيين.
