الله الله يا سي بابا بقي حضرتك قاعد في البلكونه بتشرب قهوتك وبتسمع الست ام كلثوم من غيري
ابتسملي وقام وقف"مانتي ال اتأخرتي يا ست منة وانتي عارفه اني مقدرش اتأخر على طرب الست ولا ايه
ضحكت=ماشي هعديهالك بس علشان خاطر الست
"شكرا يا ستي يلا تعالي اقعدي بقي
قعدت قدامه وبدات اسمع معاه طول ما الست بتغني وانا مبتسمه وباصه على البلكونه ال في وشنا بابا لاحظ وبص علي وراه الناحية ال ببص فيها ورجع باصلي
"في حاجه يا منة
=لا ابدا يا بابا مفيش حاجه
"طيب قوليلي بقي عملتي ايه في شغلك انهارده
=ال عادي بتاع كل يوم روحت المدرسة جالي صداع من شقاوه الولاد ال مبتخلصش وبعدها روحت ل جلال في المستشفى قعدت معاه شويه ورجعت
"جلال عامل ايه دلوقتي يا بنتي
=مسكين يا بابا بقاله اكتر من اسبوعين في المستشفى واحمد سايبه مش بيسأل عليه عمري ما كنت اتخيل ان احمد يكون بالقسوة دي يا بابا
كل ما جلال يسألني عن أحمد وليه مش بيجي يسأل عنه بفضل ساكته ومش بعرف ارد عليه اقوله ايه
"احمد معذور بردو يا منة ال حصاله دا مش شويه احمد فقد والده و والدته في يوم واحد
احمد فاهم ان جلال هو السبب في موت اهله لانه كان السبب في خروجهم من البيت علشان يروحوا السيما
=يا سلام يا بابا وهو جلال ذنبه كان ايه لما الحادثة دي حصلت مهو دخل المستشفى ورجله اتكسرت جلال ملهوش ذنب يا بابا علشان احمد يسيبه لوحده في المستشفى وميسألش عليه كده
"ربنا يهديه يا بنتي
والله انا عايز اروح ل جلال يا منة بس انتي عارفه اني تعبت ومش بقدر انزل من البيت
=اكيد عارفه يا بابا وعارفه انك لو تقدر تروحله كل يوم مش هتتاخر
بصيت على بلكونة أحمد=الغلط على اخوه ال سايبه لوحده وهو طفل عنده 8 سنين ملهوش ذنب في اي حاجه
فضلنا ساكتين وبنسمع الست في هدوء قومت من مكاني مرة واحدة
"الله رايحه فين يا منة
=رايحه انام يا بابا علشان عندي مدرسه بكرة الصبح
تصبح على خير
"وانتي من اهله يا بنتي
دخلت اوضتي وقفلت على نفسي الباب
اهل احمد جيرانا من 20 سنة وكانوا قريبين جدا ل اهلي ومن يوم ما والداتي اتوفيت ووالدة احمد كانت بتعتبرني زي بنتها وكانت بتعاملني كويس جدا من اسبوعين اهله عملوا حادثه واتوافوا وجلال اخوه دخل المستشفى ولحد دلوقتي هناك احمد لحد دلوقتي مش عايز يزوروه وسايبه لوحده انا الوحيده ال بروح ل جلال كل يوم وبقعد معاه ودايما بيسألني عنه ومبقاش عارفه ارد اقوله ايه
عمري ما كنت اتخيل ان احمد بالقسوة دي وان قلبه طاوعه أنه يسيب اخوه ويبعد عنه احمد طيب جدا وحنين ودا السبب ال خلاني احبه من زمان طيبه احمد وحنيته دي جميله جدا تخلي اي حد يحبه لكن من ساعه موت اهله وهو اتغير اسبوعين بس قدروا يغيروا منه جامد لدرجه تخوف لما انا و بابا روحنا نسأله ليه مش بيزور جلال وانه دايما بيسأل عليه اتكلم بطريقة غريبة وزعق وقال الشخص ال كان سبب في موت اهلي هو عدوي مش اخويا وسابنا ودخل اوضته كأنه بيطردني انا و بابا بس كان حزين عليه اكتر من حزنه منه على ال عمله
فضلت قاعدة على السرير وباصه للسقف وساكته لحد ما نمت
تاني يوم نزلت من البيت لقيته واقف في الشارع على جنب وبيشرب سيجارة مشيت خطوتين وبعدين وقفت بصاتله ورجعتله بعصبية وقفت قدامه
=تسمحلي ب خمس دقايق من وقتك يا حضرة
رمي السيجارة تحت رجله وداس عليها ب رجله ورجع بصالي
_اؤمري يا ست الاستاذه خير في ايه
=انت ازاي يا حضرة تسيب اخوك مرمي في المستشفى ولا تسألش عنه
_مانا قولتهالك قبل كده يا ست الاستاذه ان الشخص ال كان السبب في موت اهلي عدوي مش اخويا
عن اذنك
=يا سلام وهو جلال كان ذنبه ايه في قدر ربنا جلال كان عايز يروح السيما زيه زي اي حد يا استاذ واهلك لو مكانوش ماتوا في الحادثه كانوا هيموتوا ب اي طريقه تانيه في نفس الوقت دا لان دا مقدر ومكتوب
افتكر انك انسان كبير وفاهم الكلام دا وتقدر تتعايش مع الوقت ال انت فيه دا لكن الطفل ال بريئ دا هيستحمل ازاي فراق اهله كلهم حتي اخوه بعيد عنه ومش عايز يكلمه ذنبه ايه انه يستحمل كل دا
_والله انا مليش دعوه ب كل دا طالما سيدتك خايفه عليه اوي كده خليكي جمبه لكن أنا مليش دعوه بيه
=تسمحلي اقولك انك عديم القلب ومعدكش ذرة رحمه في قلبك دا اكتر وقت اخوك محتاجك فيه وانت بايعه ورميه في المستشفى لوحده انا عمري ما تخيلت ان قلبك يكون بالقسوة دي على اخوك دلوقتي بس اقدر اقولك انك انسان اناني ومبتحبش غير نفسك واني اتخدعت فيك حقيقي واسفه اني اخدت من وقتك الغالي علشان اكلمك في وضع اخوك
سابته ومشيت وانا متعصبه
روحت المدرسة وبعد ما خلصت روحت ل جلال المستشفى لقيته كان بيضحك و قاعد قدامه شخص ماسك ايده
اول ما شافني ضحك-:منة تعالي
الشخص ال كان قاعد بصالي واتفأجت انه احمد
ابتسمت ل جلال وقربت منه وقعدت جمبه
=عامل ايه انهارده يا جلال
-:انا عايز امشي من هنا بقي يا منة انا زهقت
=خلاص هانت يا جلال فاضل 10 ايام وتخرج من هنا
احمد قام وقف وكان خارج من الاوضه
-: رايح فين يا احمد
_هروح اعمل حاجه برا يا جلال وهرجعلك
-:متتاخرش عليا
ابتسم_حاضر يا حبيبي
خرج برا الاوضه وأنا قعدت قدام جلال وبدأت العب واهزر معاه قعدت العب معاه لحد ما تعبت وهو نام واحمد مرجعش خرجت من الاوضه وكنت هروح سمعت صوته بينده عليا وقفت وبصاتله لقيت بيجري ورايا علشان يلحقني
_ ممكن اتكلم معاكي دقيقتين يا ست منة
=اتفضل
_انا كنت حابب اني اشكرك على كلامك ليا الصبح كلامك فعلا فوقني انتي عندك حق جلال ملهوش ذنب في ال حصل دا وانا كنت غلطان اني سيبته لوحده وانا اسف اني اتكلمت معاكي ومع الاستاذ والدك ب اسلوب مش ولابد انا هاجي لو والدك واحب على ايده واعتذرله والله بس جلال يخرج لان زي ما انتي قولتي جلال محتاجلي اكتر من اي وقت
ابتسمت=ولا يهمك يا استاذ احمد انا والدي مقدر الظروف ال انت مريت بيها وانا كمان المهم دلوقتي تكون جمب جلال ومتسبهوش لحد ما يخف
عن اذنك
_اتفضلي
سيبته ومشيت
كنت كل يوم اروح المستشفى اقعد مع جلال وكنت بلاقيه هناك كنت بقعد العب مع جلال نضحك ونهزر وهو واقف بعيد بيبص علينا ومبتسم بعد خروج جلال من المستشفى انا وبابا كنا هنروح نطمن عليه بس لقينا الباب بيخبط
=غريبه
مين ال هيجلنا دلوقتي يا بابا
"والله يا بنتي مانا عارف خليكي هنا لحد ما اخرج اشوف مين دا
بابا راح يفتح الباب وانا واقفه بعيد باصه علي الباب
سمعت بابا بيتكلم
"اهلاا يا احمد يا ابني تعالي اتفضل
دا انا كنت لسه هجيلك
احمد دخل وكان لوحده
"اومال فين جلال اومال
_جلال نايم يا عم محمود انا كنت عايز حضرتك في موضوع مهم
"موضوع ايه دا يا ابني اتفضل
احمد وبابا دخلوا قاعدوا وانا باصه عليهم من بعيد
"خير يا ابني في ايه قلقتني
_الحقيقه يا عم محمود انا جاي اعتذرلك بسبب طريقه كلامي مع حضرتك اخر مرة انا بجد ال حصل معايا وفقداني ل اهلي أثر عليا بشكل رهيب وخلاني اتصرف بطريقة غريبة
بابا ابتسم"وهو انا يا ابني لو كنت زعلان منك ولا مدايق من ال انت عمالته دا كنت دخلتك بيتي وقعدت اتكلمت معاك كده
انا عارف يا ابني انك كنت متأثر بموت اهلك وحزين عليهم علشان كده عملت كده
انا عارف ان قلبك طيب ومتقصدش وكنت عارف انك اول ما تهدي وتفهم غلطك هتيجي وتعتذرلي لاني انا ال مربيك وحافظك يا ابني
_انا حقيقي اسف على ال عمالته مع حضرتك دا
"مفيش اب يزعل من ابنه يا ابني وانت زيك زي منة بنتي
قام وقف_شكرا يا عم محمود انك قابلت اعتذاري تصبح على خير
باب وقف"متقعد يا ابني معانا شويه
_مرة تانيه أن شاء الله
تصبح على خير
"وانت من اهله يا ابني
بابا وصله وقفل الباب وراه
عدا ست شهور وانا واحمد بنقرب ل بعض اكتر واكتر مرة انا وهو نقف نتكلم من البلكونة مرة يجي يشرب معانا القهوه انا وبابا ونتكلم مرة يجي يلعب شطرنج مع بابا وافضل انا وجلال قاعدين نتفرج عليهم علاقتنا مع بعض بدات تكبر لحد ما في يوم كنا واقفين مع بعض في البلكونه لقيته بيقولي
_غمضي عينك يا منة
=اغمض عيني ليه
_غمضي بس
بصاتله
_متخافيش هو انا هخطفك يعني
غمضت عيني وبعد دقيقه لقيته بيقولي افتحي عينك فتحت لقيته مادد ايده ب كتاب
_انهارده عيد ميلادك كل سنه وانتي طيبه
انا عارف انك بتحبي الكتب والروايات علشان كده جبتلك كتاب هديه
يا رب يعجبك
=شكرا بجد يا احمد دي من احلي الهدايا ال جاتلي بجد
_العفو مستني رأيك فيه
تصبحي على خير
=وانت من اهله وشكرا جدا على الهديه بجد يا احمد
_العفو
دخلت وقفلت البلكونه ودخلت اوضتي
سهرت على الكتاب وفضلت اقرأ فيه لحد ما لقيت ورقه في نص الكتاب استغربت ومسكتها وكانت مكتوبه بالحبر الاحمر
قريتها
لأول مرة اكون ندمان على حاجه في حياتي ندمان اني مكملتش تعليمي في صغري وبقيت اقل منك حبيتك وانتي اعلي مني في المقام يا ست الاستاذه قلبي حبك وعقلي عارف ومتأكد انك عمرك مهتقبلي بيا اكمني معيش شهادة زي باقي الخلق بس ال معايا هو قلبي ال حبك وبقي عشقك
ابتسمت ل كلامه ال كتبه وكنت فرحانه لاني عرفت انه بيحبني واعترافلي ب دا بس في نفس الوقت كنت عايزه اصححله غلطه اني هرفضه علشان مكملش تعليمه لاني حبيت احمد ابن الجيران ال جمبنا الولد الطيب الجدع ال كل الناس تشهد بطيبته وحنيته وال بكلمة مني رجع لطيبته وجرا على اخوه وفضل جمبه ومسبهوش
محبتش احمد الدكتور ولا المهندس
تاني يوم في نفس الوقت كنت واقفين بنتكلم وسألني عن الكتاب
_قريتي الكتاب ولا لسه
=ااه قريته
_وايه رأيك فيه
=رأيي هنا
مديت ايدي بكتاب واديتهوله وابتسمتله ودخلت من البلكونة وقفلت بابها
كتبت رساله مكتوب فيها
لو كنت هحبك علشان تعليمك مكنتش حبيتك امبارح وفضلت احبك انهارده وفكرت أني احبك بكرة
حبي ليك طول الوقت بيكبر مش بيقل خمس سنين حبي كان ليك بيكبر وعمري ما فكرت ب طريقتك دي
لو كان عقلك قالك اني مش بحبك سكته وامشي ورا قلبك وسيبك من عقلك لاني ب اختصار
حبيتك وبحبك وهحبك علطول يا احمد
عدا اسبوع بعد الكلام دا واحنا بنتكلم عادي ومش بنجيب سيرة الموضوع دا
كنت قاعده في اوضتي وصوت الست مالي البيت كله بسمعلها وانا سعيده بكلامها وهو في بالي بفكر فيه
"طول عمرى بأقول لا أنا قد الشوق وليالى الشوق ولا قلبى قد عذابه
وقابلتك انت لقيتك بتغير كل حياتى
ما أعرفش إزاي انا حبيتك ما أعرفش إزاى ياحياتى
من همسة حب لقيتنى باحب وأدوب فى الحب وصبح وليل على بابه
.....
الست دي عظيمه جدا كلامها كله بيعبر عن الشعور ال جوايا ليه وال نفسي اقولهوله نفسي اروح اخبط على بابه واقوله قد اي اني بحبه واني بحلم بيه كل ليله وبتمني انه يكون ليا واني من ساعه ما حبيته حياتي كلها اتغيرت كتير
بحب كل تفاصيله بحب جماله ال يشبه رشدي اباظه
خفه دمه ال تشبه خفه دم فؤاد المهندس شكل لبسه ال شبه لبس احمد رمزي
كنت قاعده بفكر في وبدندن مع الست لقيت بابا قفل الراديو
قومت علشان اعرف اقفله ليه واتفاجات بيه هو جلال قاعدين مع بابا
"تعالي يا منة اقعد
=هو انت قفلت ال الراديو ليه يا بابا
-:دا احمد ال قفله يا منة علشان عارف انك هتخرجي اول ما الراديو يتقفل
_بس يا جلال يا حبيبي اسكت
=مش فاهمه بردو
ليه عايزني اخرج من الاوضه يعني
-: علشان يقولك انه بيحبك وانه عايز يتجوزك يا منة
بابا ضحك"بقي كده يا جلال يا ابني بوظت المفاجأة
اهو جلال قالك كل حاجه يا منة
"احمد جالي وقالي انه بيحبك وعايز يتجوزك ها بقي قولتي ايه
=يتجوزني انا يا بابا
"اومال يعني هيتجوز مين يا حبيبتي
قولتي ايه بقي
ابتسمت وبصيت في الارض=ال تشوفه يا بابا
"يا سلام يا اختي
يعني انتي مش بتحبيه زي ما هو بيحبك
ضحكت وبصيت في الارض
"طبعا بتحبيه
انتو فاكريني عبيط يا ابني انت وهي مانا عارف انكم بتحبوا بعض من زمان مانا كنت شاب زيكم وبحب انا كمان
_ربنا يعلم انا بحبها قد ايه يا عم محمود
"ربنا يفرح قلوبكم يا ولاد الف مبروك يا حبيبي
بصاتله وابتسمت ب فرحه اني اخيرا اجتمعت ب حبيبي
#الحب_ايام_زمان
