فتنة الجزء الأول

3

الحلقة 3 <3 <3
.... الريق يبس في حلقو كيف زاد سمع ضحكة جاية من ورا الباب الصغير ... رجليه خانوه و بداو يقدموا بخطوات ثقيلة .. يتبسم بقهرة... حتى سكران و باقي متفكر المصيبة لي حلت بيه و باقي واعي بالواقع الأليم ... عارف حتى لو كان قدم مش باش يلقا شي ... كل خطوة يخطيها تجاه الباب يزيد القلب يقوي فيها دقاتو كأنو حاب يخرج و يسبق ... حط يده على الباب ... عنيه في القاع ..خذا نفس طوييل يحاول يطفي بيه النار لي شاعلة فيه و دخل ... شاف جنينة حالها يبكي و شجر يابس.. زاد قدم و شاف بسين كبييييير مكسر .. دمعة نزلت مسحها و كمل في طريقو مش باش يتراجع هالمرة ... تنهد بحرقة .. هو اليوم واقف قدام villa مهجورة شهدت على أخيب نهارى في حياتو.. جبد مفتاح و يديه ترعش ... حل باب لوح كبير و دخل ... وقف في أول دروج و سند ضهرو للحيط .. حس كإنه تهد ... موقف صعييب حط روحو فيه ... زادت الدموع قوات و معاهم دقات القلب... كمل لي بداه و طلع ... وقف قدام باب مقفول و للحظة فكر يتراجع ... مش قادر يتقوا أكثر و يكابر أكثر ... تراجع بزربة و في آخر لحظة سمع صوت ولد صغير ينادي بإسمو .. تبسم و رجع ملهوف .. دخل لقا بيت صغار مزيانة ... حيوطها في الأزرق و لكلها لعب .. لعب كلها غبرة و عنكبوت ... قدم و خذا لعبه لحظنو و برك في القاعة يبكي بحرقة ... صوت بكاه يزعزع الأرض .. كل آآآآه تخرج منو تعبر على قمت الألم لي عايش فيه ... وقف و خرج يجري في حالة هستيريا ... يلقا خوه مراد يمنع فيه و يرجع فيه بقوة لدار بوه ... دزو و خطف الكرهبة و هرب من القصر بأقصى سرعة ... خذا طريق الفيرمة ... ليلة خريف ... جو مقلوب و ريح قوية يعبرو على الحالة لي وصل فيها ... طريق طوييييل و أضلم فيه كان أشجار يتمايلو بقوة تحسهم باش يتقلعوا من أرضهم .. تحسهم حزانا عليه .. حزانا على محمود لي ذنبه الوحيدة إنو حب يرضي ولديه... #ريما