فتنة الجزء الأول

11

حلقة 11 💔
... محمود فاق متيقر و زاد كمل عليه صوت الصياح ... هبط يترهوج حب يعرف شنوا لي صاير ... كيف شاف صلاح في الصالة ستغرب ... يعني هو لي كان يعلي في صوتو تو !!! ... رفع حاجبو و كمل هبط ... و الهدوء كان مسيطر على الموقف ... محمود من الصغرة يعرف إلي صلاح انسان واطي بأتم معنى الكلمة ...
هو واحد من الخدامة لي يخدمو عندهم ...و ليه سنين في الفيرمة ... بوه ديما كان يتشكا منو و من عمالو مع باقي الفلاحة ... كل مرة يعمل مشلكة نوع ...و بما إنو سي مختار بو محمود هو مالك الأرض و المسؤول... الخدامة الكل كانو كل مرة يتشكولو من صلاح لي وصل حتى يسرق فيهم و يقلب فيهم... و بالنسبة لتحرش ما قال حدد لحد.. المرا لي يراها يلصق فيها و يعيفها في روحها... بإخصار مخلا عملة ناتنة و معماهاش وهذا الشي لي خلا حفصية تسخف على فتنة و تعاونها ... كل ما تراها قلبها يذوب دم على سعدها المحمم لي طيحها في واحد كيف صلاح ... مش كان هي غايظها حالها الفلاحة الكل لي في الفيرمة غايضتهم كيفاش وحدة بزين هذاكا تعرس بحيوان كيف صلاح لي عاش عمرو الكل في الفيرمة و لمن حب يعطيه بنتو.... غاب حكايت جمعة وورجع معاه بنية صغيرة فلقة متع زين تقول للشمس أزرق أو خليني نزق في بلاصتك ... لدرجت إنو رجال الفيرمة الكل حسدوه عليها و هو ولا يمشي و فارد ريشو قال شنوة خذيت أزين مرا في العالم الكل .... كل ليلة يشرب و يفرج عليها أمت لا إلاه إلا الله .... يضربها و يرميها في الليل في الشارع وويسكر الباب و يدخل ...حفصية حنت عليها و حلتلها باب دارها ساعات تجيى تبات بحذاها في الليل ...أما في النهار كل يوم تجي تعاونها في القضية و مرتبتلها شهرية و صلاح لاقيها من الجنة و الناسي....
محمود قدم لوين واقفة حفصية لفت عينو لقا باكو دخان و بريكية مطيشين فوق الطاولة ... قرب منها و تسند عليها ... هز سيقارو بشفتو... شعلو وجبد نفس طويل ... الطريقة لي شعل بيها البريكية زادت وترت صلاح أكثر ... خزرلو بنضرة ثاقبة و تكلم بصوت منرفز
- إشكي .. هاني نسمع...
صلاح برد .. كأن شكون صب عليه سطل ماء ... عارف إلي محمود بالذات ميتلعبش معاه... هو بذات مختلف مش كيف إخوتو ...راجل مسكر في مخو .. كلمتين إخوة ما يحملهمش.. نرفوزي كيف بوه و بالو ضيق .... بلع ريقو و وكوك
- سي سي مح محمود .. مرحبا بيك ..سا .. سامحني مكنتش عارف إنك جيت .. لو كنت نعرف كنت جيت سلمت عليك
-و كي عارف إني منيش موجود ... و عارف إلي المرا لي قدامك وحدها ... قلت نجي نسترجل عليها شوي !!
-لا والله لا ... فهمتني بالغلط سي مح... قص عليه محمود الكلام بعيطة تزعزع
- إقلب منضرك ...
صلاح خرج يجري قالو بالسلامة و متلفتش وراه .. و حفصية تبسمت .. رفعت راسها بالراجل لي ربتو ... كبر و وقف في ضهرها ...
-صحة النومة يا بابا ... رقدت مليح !!
- الي وراه الهم ميرقدش ... شبيه جاي فارد جنحاتو و يعلي في صوتو ؟؟
تربثت و حبت تبدل الموضوع .. عارفة ولدها فادد ومش حامل مشكلة أخرا ... أما بينها و بين نفسها كانت عازمة تحكيلو على صلاح و عمالو ... محمود بطبعو رجولي و حنين و يعاون في الفلاحة الكل .. و هو الوحيد لي بكلمة منو قادر يوقف لصلاح... على الأقل ينبهو باش رجلو معادش يحطها في الvilla... كل مرة و هو هاد على حفصية و عمللها عرعور ... وزيد قالت نحكيلو علي عمالو بفتنة و تتلحلح بيه بالك يهديه ربي و يزيد ينبه عليه على معاملتو مع فتنة .. أما متأكدة إنو تيرفض و تجيه صعيبة يتدخل بين راجل و مرتو .....
- متحطوش في بالك وليدي ... هذاكا لناقص تنعملوا قعدة على صلاح ... وليدي مجعتش .. من صباح ربي و ميمتك في الكوجينة.... تبسم و باسلها يدها
- جعت يا للا جعت ... و أنا نقدر منجوعش وعندي عسلة تدلل فيا
- ياخو بخاطرك وليدي ... برا تغسل و إلبس الطقس برد ... و بعد أهبط نتعشو و نفهم شنية حكايتك .. حالك الصباح مسرنيش ... تبسم بوجيعة و عطاها بالضهر باش يطلع
- نحب ناكل برك أنا ... برحمت بوك لا تسأل على شي ... القلب ميعلم بيه كان الخالق
فهمت ولدها و الوجيعة لي في قلبو تنهدت و سكتت و دخلت للكوجينة .. فتنة من أول ما رات محمود وهي باهتة ... قاعدا فوق الفرش و تتفكر في المنضر لي راتو .. أول مرة ترا راجل كيف محمود .. هههه تفكرت الابطال لي في الافلام المصرية ... الحس بات ... هبطت تجري لحفصية باش تطيب خاطرها بكلمتين بعد الكلام لي قالو لي ما يتسما... دخلت لقاتها فرحانة تحظر في العشا
- خالتي ..
تلفتت حفصية لقت فتنة تتغصور و مشبكا أديها .. حابة تقول حاجة ... عرفتها كيف العادة تتطلب السماح على كلام صلاح ..
- متقول شي يا فتنة ... عوني في العشا بنيتي .. محمود جاع ..
قدمت تزرب و عملت هي كل شي .. نصبت الطاولة في بيت الفطور و رجعت للكوجينة ... حفصية شدت فيها باش تتعشا معاهم أما فتنة مش موافقة ... قد ما لحلحت بيها و شي .. محبتش تغصب عليها ... خلتها تتعشا في الكوجينة و مشت هي تتعشا مع محمود ...
محمود رتاح شوي بعد ليلة البارح ...الجية للفيرمة ديما تهديه ...كمل تعشا و عمل برشا جو على الماكلة البنينة و طلع رقد ... يحس في روحو مهدود ... وأخيرا ليلة هادية بنسبة....
#ريما