فتنة الجزء الأول

8

حلقة 8💔
السبعة متع الصباح الشمس بدت تزرق .. نهار مغيم و كئيب من الصباح .. حتى الشمس زرقت موخر .... فتنة كانت في الفرش فايقة أما مش قادرة تتحرك بدنها مكسر من طريحت البارح .. صحيح هي والفت بالضرب أما البارح كان همجي أكثر من اللازم ... هزت روحها بالسيف و كيف العادة أول حاجة تعملها تمشي للمراية ... تثبت في البقع الزرق لي في وجها و في رقبتها... يديها مندوبا ووحالها يشكي لربي ... تنهدت لمت شعرها كعكة و لفت عليه خيمار أكحل غطات بيه شطر وجها و هبطت حذا حفصية تكركر في رجليها تكركير و راسها مغروس في القاعة...
وصلت للكوجينة تشم في ريحة بنينه مش نرمال ... حطت يدها على كرشها و تفكرت إنها من فطور أمس مكلات شي ... كبست مشيتها و دخلت تلقا طاولة طويلة عريضة فيها الخيرات السبعة منضرها يشهي بقات تثبت فيها : زيت ، جبن ، ريقوتة ، يغرط، عضم مقلي و مغلي ،هريسة عربي، كويكة ، 4 أنواع زيتون، عسل ، 3 أنواع jus، خبز طابونة سخون يحرق ، حليب ، قهوة عربي، معجون فراز و مشماش ، رمان، تمر، عنب ...بإختصار سفرة منصوبة ... عقدت حواجبها باهتة و بعد ضحكت كيف الصغار
- هو صحيح أنا ماكلة تريحت موت و لازمني ناكل باش عضامي تصح و نتحسن أما مش لهدرجة ... منجمش أنا ناكل هذا الكل
تلفتت حفصية بتبسيمتها العسل - هيا الحمد الله كيف شفنا هضحكة ... اقعد و كول لتقدر عليه ... عبي أك الكريشة ... أما حط في بالك السفرة هذي مش ليك إنت وحدك
فتنة طول بدات تاكل في الخبز السخون و الهريسة و شادة في يدها لخرة كاس jus
- المهم ناكل .. أنا الجوع قتلني ... سكتت شوي و بعد ضيقت عينيها و سألت
- خالتي لشكون السفرة كيف مش ليا ... كان أنا و إنت باش نفطرو ولا باش تهز منهم للخدامة في الأرض !
- لا يا للا مش كان أنا و إنت باش نفطرو ... اليوم باش يفطر معايا ولدي العزيز و الغالي ... #ريما