حلقة 9💔
زادت بهتت و هزت حاجبها - غريبة إنتي خالتي حفصية عمرك ما قتلي عندي صغار .
- إيه عندي ... عندي أربعة اولاد و بنية ... أما بيناتنا هذا أغلاهم عندي ... معزتو بدنيا والله
قلبت شفايفها كيف الصغار - وعليه خليتني نفطر منو الفطور ... إنت من الصباح واقفة و تحضر و فرحانة بجيت ولدك و أنا جيت فسدت ...
-صحة و فرحة لبنتي ... كول الخير بزايد ... أنا محضرة الفطور ليكم اثنين
تبسمت و رجعت تاكل بزربة - ووقتاه يوصل ولدك
- الفوق راقد ... وصل تاعب وليدي ... قلت نخليه يزيد سويعه و نطلع نفيقو قبل ما يبرد الخبز
مسكينة أطرافها بردت ... بلعت ريقها بسيف ... بالنسبة ليها الرجال كائنات موذية... الراجل لي يراها لازم يعمللها geste خايبة ... حتى يوجعها بالكلام ... ديمة متجنبتهم باش تتقي شرهم ... حطت يدها على الخيمار زادت خبت بيه وجها أكثر و وقفت كيف الملسوعة باش تروح...
- مفماش مرواح يا فتنة ... لتو لا حكيت معا راجلك ... خليني نكبسه كبسة باهية و بعد أرجع
فشلت مسكينة ملقت متقول ... متنجمش ترجع تو .. والله يكمل عليها و هي بدنها مهدود .... قالت نقعد بحذا خالتي حفصية و نتجنب ولدها
💔حفصية مسكينة بقات تستنا في محمود باش يفيق .... تعرفو ربايت فلاحة يحب الفيقة بكري مش كيف إخوتو.. كيف بطا قالت نمشي أنا نفيقو ... حلت الباب و دخلت راسها ... شفتو راقد باين مهدود و تاعب ... سخفت عليه ..سكرت الباب و رجعت .. بقت نهار كامل تحكي هي و فتنة قاعدين في الكوجينة يطيبو و يقصرو في الوقت ... كل مرة ترمي عينها على الدروج تقول أكيد تيفيق تو ... أما محمود كان في سابع نومة ... نهار كامل راقد ... في المغرب حفصية مسكينة حضرت سفرة جيدة و بقات تستنا ... تنهدت من القلب و كبست بيدها على عكازها... فتنة كانت حاسة إنها مش مرتاحة أما بقات ساكتة ...تطبيعتها هادية برشا و متحب تتدخل في حد أو الأصح الدنيا علمتها ما تدخل في حد .. دابها داب روحها و شوف تسلم شوف لا... كل مرة تسرق نظرة لحفصية لي كانت باين عليها التوتر ...
في الضلام الباب دق بالقوي ... حفصية عرفت طول شكون جا ... طلبت من فتنة تطلع للبيت و تسكر على روحها .. اما فتنة جاتها رزينة باش تخلاها و تطلع خاطر عارفة إنه إلي يدق هو راجلها و مش ناوي عالخير . #ريما
أنت تقرأ
فتنة الجزء الأول
Romanceهذي من أنجح الكرونيكات التونسية فاها رسالة تحفونة برشا تحب توصلها الكاتبة احساس الأبوة #منقولة
