فتنة الجزء الأول

43

الحلقة 43😍😍
بابا الله يهديه داروا بيه أصحاب السو و علموه الشرب ... كل مرة واحد منهم يقلو كلمة خايبة في حق امي ..و هو كل مرة كان يصدقهم و ينقم عليها اكثر ... كانت شخصيتو ضعيفة لدرجة كبيرة ...و أي كلمة كانت قادرة تهزو و أي كلمة قادرة تجيبو .. الحاصل عذبها و حقرها و قتلها ناقصة عمر ...ماتت ناقصة عمر من بابا و من عمالو ... وقت لي توفات أنا كان عمري 3 سنين ... بابا وين يراني يرا فيا إنعكاس لصورت أمي ... عذبني و عيشني أخيب أيامات حياتي .. السنين لي عشتهم معاه الكل كان يفكر فيهم في حاجة وحدة و هي كيفاش يتخلص مني قبل ما نكبر و نزيد نجيبلو الكلام كيف أمي يرحمها ... تحكي و الدموع كيف الشتا .. مع كل كلمة تقولها تتفكر الماضي و وجيعتو .. سكتت شوي ترد في النفس و كملت تحكي
- بابا كان عازم و مقرر إنو يعطيني لأول واحد يدق بابو .. و من زهري أول واحد كان صلاح .. ههههه بابا يوميتها رماني قدام الباب .. قلي هذا راجلك برا عيش معاه و أنسى إنو عندك بو .. أنسا باش ترجعلي هوني ... و من يومها بدات قصت عذاب جديدة مع صلاح ... نتصور إنو خالتي حفصية حكاتلك عليها و إنت حضرت على جزء منها
تنهد بغصة مسكين ... حس بيها و سخفو حالها ..
- غريبة والله ... الجمال عمرو ما كان نقمة أو حاجة يحشمو منها ... الجمال هو مصدر فرحة لصاحبو... مش مصدر نقمة
تبسمت بوجيعة - الجمال بنسبة ليا أكبر نقمة .. نقمة دمرتلي حياتي ..نقمة قتلت أمي ...
- كهو ... يزي .. أنسا .. من اليوم أبدا من جديد و أنا في ضهرك ... ما تخاف من حد و ما يهمك في حد .. عيش و أفرح ... مسحلها دمعتها و باس جبينها بحنية كبييييييرة .. و هي مسكينة فرحت و حست بالأمان ..
تعدا النهار يجري .. محمود و أخيرا عدا نهار عادي في حياتو .. نهار كيف ما هوا يحب يعديه ... فتنة و لجين أول ما روحو دخلو طول للفرش و رقدو .. اللعب هدهم هههه ... أما محمود قرر يطلع لبيتو ياخو دوش و يخدم شوي .. عندو أوراق مهمة
دخل لبيتو و لمح حاجة صغيرة على فرشو .. قدم منها لقاه صندوق cadeau bleu ciel صغير و مضخم ... استغرب منو ... قلبو بين يديه و حاجبو مرفوع و بعد حلو ... لقا فيه رسالة صغيرة مكتوبة بخط اليد ... بدا يقرا فيها و معالم الدهشة عمال توضاح على وجهو .....