فتنة الجزء الثالث

3

الحلقة 96💎💎
تعدا توا يومين من اكا الليلة الكارثية ..ليلة كارثية بكل اتم معنى الكلمة .. ليلة تعدات اما خلات في كل واحد فيهم اثر لجرح غريييييق و كبيير صعيب انو يداوا .. و محمود كيف ما تجرح .. جرح .. حالتو ليلتها كانت كيف الصيد المجروح لي كشر عن انيابو و جرح كل حد تعدا عليه بمخالب حادة و قوية .. جرح بوه .. قلو إنساني كيف ما انا باش ننساك و فعلا كان عند كلامو .. لم دبشو و خرج من القصر بقلب مجروح و مش راضي .. عارف روحو غالط .. كيفاش يقدر يعمل هكا !! .. كيفاش قلبو طاوعو يقول لبوه انو ينساه .. تي هوا يحب بوه يموت عليه .. لي عملو ليلتها الكلو كذب .. هوا قلبو مستحيل يقصى على الراجل لي رباه .. كل حاجة في شخصية محمود هي امتداد لشخصية مختار .. رباه من الصغر و عطاه من قلبو و روحو و حتى عطاه من شكلو .. محمود هوا نسحة من بوه .. عارف روحو غالط اما الله غالب .. و كعقاب لروحو .. سكن في قصرو القديم .. طلب منهم ينضفولو بيت وحدة فيه و البقية ما يتلمسو فيها شي .. عاقب روحو بالعيش مع ذكريات حزينة في قصر مهجور .. و في الحقيقة هوا ما جرحش كان بوه .. حتى اخوتو منير و مكرم جرحهم .. او بالاحرا انتقم منهم .. انتقم من كل حاجة خايبة عملوهالو .. من كل كذبة كذبوها عليه .. من كل نضرت غل و شماتة راها في عيونهم لمدة سنين .. كيف حاولو ليلتها باش يشعلو النار اكثر بينو و بين بوه .. هوا فرشلهم كوارتهم ههههه ..فضح كل حاجة عملوها و هوا غطا عليها و عمل في روحو ما في علموش فقط احتراما لسنهم الكبير..فرش سرقتهم و تحيلهم في الشركات .. قلهم على معاملاتهم المشبوها .. على القمار .. على النساء .. و الأدهاو الامر على محاولتهم لرفع قضية وصاية على بوهم باش يفكولو رزقو و يورثوه بالحياة.. و سي مختار في هذا الكل يسمع و قلبو تحرق و تدمر تماما .. و عض على صوابعو ندم ... فهم انو بالحق خسر الراجل لي رباه لكبرو .. ماكانش يعرف هذا الكل .. و مكانش يعرف انو لولا وقفت محمود في ضهرو .. اولادو كانو ناوينلو الغدرة ..فتنة عدات يومين مرار في الكلينيك .. في كل لحضة تقول باش يجيني توا .. كل لحضة تقول باش يحل الباب توا و يضمني لصدرو.. مش فاهمة توا شنيا لي جرا .. عليه كل شي تقلب .. كانو في صحفة العسل .. عداو ايامات ولا في الاحلام .. عيشها و طيرها لسابع سماء .. و في ليلة خلاها مرمية على القاعة و خرج هههههه ..يمكن هذا هذا اخيب احساس ... من النقيض لنقيض .. من نجمة تضوي في قلب السماء ... لجمرة طافية في الارض ...هز لي حبو و فصع في اول مشكلة .. عمركم شفتو عريس هرب على عروستو ؟؟ .. خلاها و مشا !!.. خلاها وحدها في اصعب حالاتها في وسط ناس يكرهوها .. خلاها و هي في امس الحاجة ليه .. خلاها في قصر تطردت منو وجوه الصبح بعد ما مرتو عملتلها فضيحة .. 😣😣😣😣..هوا مش حابب صغار غير صغارو لي ماتو .. مش قابل يكون بو لغيرهم .. هذي الافكار لي دارت في مخ فتنة لمدة يومين .. او بالاصح .. هذي الافكار لي زرعها زياد في مخ فتنة لمدة يومين ...تنهدت بحرقة مسكينة .. مسحت دموعها بكفوف يديها ... عيونها الحلوين فيهم نضرة مش مفهوما ... وجها ذابل و تاااااااعب .. تهدت من بعدو في هاليومين ... قامت بشويا تتعكز مع الفرش ... وقفت للحضات تثبت في سواريها لي لتوا موجود في البيت بنقمة كبيييييرة ... من يومين و هي تخزرلو ... و لتوا حايرة .. حايرة في قطعة هالقماش الابيض لي كانت سبب سعادتها ... في لحظة صارت بنسبة ليها سبب جرحها و ذكرة خاااااايبة بنسبة ليها .. زايد المتعوس متعوس .. مش كاتبلك تلبسو كيف باقي البنات و تفرح يا فتنة ... منين كنت عروسة صرت منكوسة ... عدت يدها على رقبتها تتحسس في العقد لي فيها ...هذا عقد عرسها .. لبسهولها محمود بيدو .. و يوميها هيا قتلو انا مستحيل نخلعو من رقبتي ... اما توا .. توا هوا كيف الحبل لي مطوق رقبتها و كاتم على نفسها .. يفكر فيها بواحد نذل في نضرها توا ... تبسمت بمرارة كبيييييرة ... ميلت شعرها على جنب و خلعتو بكل أرياحية ... و حطتو فوق اكا السواري ... مشات خطوتين بالسيف ... حلت الساك لي فيه دبشها لي جابتهولها سمر و بدت تلبس و دموعها تقطر ...لحد لنا يكفي ...ستنتو ياااااااااسر ... و هوا بطا عليها ياااااااااسر .. اصل أيست من انو يجيها من جديد ... و ما كانتش تعرف انو محمود في اليومين هذوكم ما بعدش على الكلينيك و لا لحظة و في نفس الوقت ما تجرأش يدخلو ... في النهار قاعد في جنينة الكلينيك و في الليل في الكرهبة قدام بابو... يرا في امو و خوه و مرتو و سمر و سمير كل يوم عندها .. اما ما تجرأش يدخللها .. قلبو مجروح من لي عاشو و زيد لي صار بينو و بين بوه اثر فيه اكثر و اكثر .. كملت بدلت دبشها مسكينة .. قلبها مقسوم في ثنين ... غايضتها روحها ... حست روحها ذليلة ... تبكي بالشهقة .. يديها ترعش من لي تحس فيه ..
غاضتها روحها خاطر مقطوعة من شجرة .. حست انو اي حد يجي يمسح ساقيه فيها كيف الشليقة و يتعدا .. و حست روحها محتاجة لحضن المرحومة امها اكثر من اي وقت .. الوجيعة لي حستها مع صلاح سنين .. ما تجيش ربع وجيعتها في هاليومين ..محمود بالنسبة ليها غدرها ... بعد ما طيرها لسابع سماء .. هبطها لقعر الارض .. كيفو كيف اي راجل عرفتو .. عشق زينها ... بدنها حرك غريزتو ... و هي كيف البهيمة سلمتلو ... عطاتو روحها و هوا عطاها بالضهر ... تسندت مع الحيط و جت خارجة من البيت و الباب تحل .. تسمع في جملة وين ماشيا .. مازلت مريضة .. اما هي توا مش قادرة تجاوب .. تبكي بالشهقة و صوت الاااه مش مفارقها ... اما عيونها لي كيف موج البحر .. نقلت إحساسها بكل وضوح ...بعد بحكاية سويعة محمود جاه تليفون من بسمة مرت مراد خوه .. و بعدها دخل للكلينيك يجري ... يمشي بزربة و حالتو حليلة .. التعب باين من ملامحو ...يمشي و يفتش بعيونو في كل مكان .. وصل لطاق لي فيها بيتها يرا في امو و بسمة جاتو تجري .. و تلهث ... حطت يدها على قلبها كأنها تهدي في دقاتو و تحكي ...- محمود فتنة مش موجودة .. ما لقيناهاش .. عدا يدو على وجهو بعصب و تكلم .. - شنيا معناها مش موجودة .. شنوا الكلام هذا .. - والله مش موجودة .. كنت بجنبها .. خرجت و رجعت ما لقيتهاش .. رص على سنونو و يتكلم بعصب كبير .. - بسمة ما تهبلنيش .. شنيا مش موجودة .. وين عندها تمشي بحالتها هذي .. - والله فتشنا يا محمود .. قلبنا الدنيا بكلها ملقيناهاش .. خلاها تحكي و دخل للبيت لي كانت فتنة فيها.. اول ما دخل عنيه ترشقت في سواريها لي فوق الفرش و العقد لي محطوط فوقو .. و للحظة دخلت لمخو فكرة انها سيباتو و مشات ... بدا يفتش بعيونو في اليبيت كيف المجنون مالقاهاش ... هد على التوالات هدان زادة ملقاهاش .. خرج يزرب يلقا الفرملية جاية سألها قاتلو لا ما ريتهاش جملة ... هبل جن .. صوتو بدا يعلا في اكا الكلينيك و صياحو يتسمع على بعد كيلومتر... يعارك فيها و قلها ناديلي توا المسؤول...شويا وقت و جا مدير الكلينيك يجري .. وجهو اصفر .. قدم منو سلم عليه بربثة و بدا يحكي .. ههه .. باين مفجوع .. - سي محمود والله لا نعرف شنيا صار .. هذي اول مرة تجرا ... اول مرة مريض يخرج من غير ما نفيقو .. كلمتو هذي زادت شعلت محمود اكثر و كملت على حالتو. .. هز يدو بدا يسأل فيه بيها... عاقد جبينو ... و يخزرلو بطريقة يبست الدم في عروقو ... - شنيا يخرج هاذي !!! ... بالكشي وكالة و انا غالط ... شنيا مريض يخرج من غير ما نفيقو ... واعي بالكلام لي قاعد تقول فيه يا سيد !!! ... - هدي روحك يا سيد محمود .. انا مقدر وضعك .. قمت بالاجراءات اللازمة قبل ما نجي ... كلمت الاولاد يثبتو في الكميراوات شكون دخل و شكون خرج من الكلينيك حكاية ساعة لتالي ... محمود ضيق عيونو و تلفت لبسمة يسأل بإستغراب .. - ساعة!!! و بسمة فهمتو .. تفجعت و بدت تجاوب بزربة .. - لا لا .. والله لاهي ساعة .. توا توا انا كنت بجنبها .. مشيت نشري في قهيوة و رجعت .. يمكن حكاية ربع ساعة .. شويا وقت و جابولو المقاطع لي مسجلين متع لي الدخول و الخروج من الكلينيك ... ثبت فيهم بالواحد بالوحد ... و تصدم ... تصدم خاطر راها خارجة هي و واحد مع بعضهم ... مسندة بدنها عليه .. باينة فاشلة تبدل في الخطوة بطلوع الروح .. و هو لافف يدو على كتفها و يسايس فيها .. يحس في الدم طلع لراسو .. تكبس بكلو من لي يرا فيه .. شكونو هذا .. شكون لي خارجة معاه .. باينة تمشي بكل ارادتها .. حاول يرا وجهو اما هوا عاطيه بالقفا ... زاد تنرقز أكثر و تسيب في اكا مدير الكلينيك ... سخسخو ما خلا و ما قلو ... تحمص خاطر ما نجمش يعرف شكون الراجل لي مشات معاه ... ماقدر يعرف حتى معلومة .. حتى الكرهبة لي ركبت فيها ما فيهاش رقم .. بدا يمشي و يجي .. العصب مكنو بكلو ... تقولش الناس بكلها تفاهمت ضدو ... و ضربات الدنيا كثرو عليه .. بسمة حاولت تهديه اما ما قدرتش ...عندو الحق ... بوه ... اخوتو .. صغارو .. امو ... بكلهم غدروه و توا جا دور فتنة !! .. فتنة لي ما قدرتش ضروفو و لا ستنتو حتى باش يدافع على روحو !! ... هذي لي عشقها و عشقها سكن روحو !! ... هزت روحها و خلاتو بدون سابق انذار !! ... اصل من لي را العقد لي لبسهولها فوق الفرش شمها قارصة ... حس روحو فشل ... قعد على حافة السرير .. و بدا يمسد في رقبتو ... اعصابو بكلها تشنجت .. و عيونو حمارت من الغش ... الغيرة كلاتلو قلبو ماكلة ... و في الوقت هذاكا ما جا لمخو كان زياد .. تبسم بوجيعة خاطر حتى هي غدرتو و بدلتو بغيرو ... # ريما