فتنة الجزء الثالث

4

الحلقة 97 💎💎
(ما تنسوش .. عندي ليكم رسالة 😈)صحيح هوا غلط ... اما مش قد غلطها هي ... يمكن هوا غلط خاطر خلاها و تراجع ... اما مش منو .. حالتو ليلتها ما يعلم بيها كان ربي ... دخل في حالة هستريا ... من خوفو عليها و على صغيرها و من خوفو لا تجرالهم حاجة هرب ... شخصية محمود لنا ذكرتني بالقطوسة .. لي من خوفها تاكل صغارها .. هوا من شدت وجيعتو عليهم .. ختار انو يهرب من الحقيقة خاطر صعيبة عليه بااااارشا .. اما بألي عملو هوا ماغلطش غلطتها .. هوا ماعملش كيفها .. هوا ما غدرهاش و ما بدلهاش ... هي توا غلطت غلطة حياتها .. تعدت الحدوده الحمرا .. غلطت غلط محمود مستحيل يعديه و لا يتساهل فيه ...كل شي و لا كرامتو .. كل شي و لا رجولتو .. هو حطها في مقام مرتو ... اما هي هربت لغيرو ... وجيعة الغدرة مستحيل يتحملها اي راجل عادي .. خلي يا محمود الرايس ... راجل شرقي بأمتياز .. مسكر في مخو .. و معڨد ما يفهم شي في الأمور هذي ... .. و بالاخص مع فتنة .. معاها يفهم حاجة وحدة .. يفهم انها هي متاعو ... حقو ... ملك خاص لمحمود الرايس فقط .. هيا توا غلطت غلطت عمرها... غلطت وقت لي شعلت نيران الغيرة و الشك في قلب واحد كيف محمود ..شويا وقت و دخل الطبيب المباشر لحالتها ... تصدم كيف قالولو مش موجودة ... محمود يخزرلو و يقدم في شفتو من الغزول لي ماكنو .. باش يموت و يسأل على حالتها ... هوا لتوا ما يعرف عليها شي .. من ليلتها رفض انو يعرف اي معلومة .. قلبو فد من الوجايع ... اما توا لازم يعرف ... غمض عيونو يحاول يهدي في روحو .. و تكلم بصوت ثابت ..- هي .. هي كيفاش حالتها .. - تاعبة .. بدنها فارغ ... ظاهر انو ليها مدة مش قاعدة تاكل مليح .. حك لحيتو بعصب ...تنهد و سألو من جديد .. - حبلة مش هكا !! و لنا الطبيب تربث بكل اتم معنى الكلمة .. بدا يقلب في عيونو .. طيح الستيلو من يدو .. طبس جابو بزربة .. كبس روحو و جا باش يجاوب اما محمود فهم انو الصغير طاح .. هز يدو كأنو يقلو اسكت... فهمت وحدي من غير ما تقولها ... حط يديه في جيوبو و وقف مقابل الشباك في البيت ... عطا لامو و بسمة و الطبيب و المدير بالقفا ... و طلب منهم بصوت قوي و ثابت انهم يخليوه وحدو شويا .... للا خديجة خلات محمود في الكلينيك و روحت للقصر تعفس في الطاجين تقعرو ... قلبها طاب و تعب من وجيعت ولدها و من لي تعدا بيه ... دخلت من الباب تزرب ... شافت سي مختار قاعد في الجنينة باين مهموم من عيونو ... حقرتو و دخلت ..عرضتها سميرة في الطريق ... - اختي خديجة ويني فتنة لباس ليوم ؟ - مش لباس ... هجت .. الطفلة هجت منا و من عمالنا.. - ووووه ... هجت ... فين و كيفاش ...تنهدت بقهرة .. - اكا المغبون خليتو في حالة يا سميرة يا وخيتي ... كان ترا اش عمل .. قلب االكلينيك سافيه على عاليه ... من شوية لشوية .. من قهرة لقهرة .. - حليلي على وليدي ... من نكبة لنكبة ... تحكي و ترعش بكلها من العصب لي ماكنها ..- انا معادش قاعدة القعدة هوني .. قلبي تشوا يا سميرة ... يزيني ... تعبت و روحي تعبت ... راني ام و نحس بصغاري ..- صلي على النبي يا خديجة ... شنوا هالحديث هذا ... تي لا عمرك عملتها و خرجت من الدار ... و للا خديجة بالكلمة هذي زادة تشوات... - ايه لا عمري عملتها ... اما توا قلبي تعب ... معادش حاملة نرا الوجيعة في عيون ولدي اكثر ... قد ما حاولتها سميرة و شي ... لمت دبشها و جات خارجة .. تسمع في صوتو يزعزع ... عرفتو سي مختار ... جاها يزرب .. وجهو ازرق ... - وين على خير ... دبش شكون هذا ... بلعت ريقها ... جاتها صعيبة بعد سنين عشرة لا نهار سيبتو فيهم .. بحلاوتهم بمرهم كانت ديما واقفة معاه ... و اليوما باش تخلي دارها ... - مشيا حذا اختي حفصية .. - ليه شبيها حفصية ... - لباس بيها .. اما انا ماشيا .. خرجة من هالقصر و معادش راجعتلو جملة .. ضيق عيونو .. اول مرة يسمع منها هااكلام .. - شنوا هالكلام ... شبيك تحكي هكا .. هبلت ...- لا ما هبلتش .. اما كان باش نقعد هوني باش نهبل ... خلتو و مشات .. و هوا ركبو العصب .. تكلم بصوت منرفز .. - اييييييه .. تعلمت تحقرني جملة وحدة يا خديجة ...جوبتو بغزول و هي تجبد في الفاليز وراها - كيف ما انت تعلمت تعفس فينا ... تعلمت تعفس في ولدك سنين من غير ما تراجع روحك ... تصدم... بهم من كلامها ... وهي وقفت شويا .. دموعها غلبوها و هبطو .. تلفتتلو بعيون مكسورة لاقصى درجة ... ميلت راسها و سالتو باستخفاف.. - تعرف بالحق شنيا لي يحرق القلب في الحكاية الكل ؟؟ ...ضيق عيونو كأنو يقلها شنيا... - لي يحرق انك لي عفست فيه سنين .. هوا لي قواك سنين .. لي عطيتو بضهرك ... هوا لسندلك ضهرك .. الي قهرتو اكثر واحد بين اولاد .. هوا لي مانع شرهم عليك ... رجعتلو بخطوات رزينة .. حطت عيونها في عيونو و تكلمت بصوت فيه بحة .. - توا فهمت عليه ديما تقلي محمود مربيه لكبري .. عدت يدها على لحيتو البيضة بكل حنانة .. خزرتلو بعيون كلها عشق و حرقة .. - ربيت و لقيت يا مختار .. لقيتو في كبرك ... ولدك في ضهرك .. داعمك و حاميك ... يضرب عليك بسيفين ... اما في اخرتها فد منا و من همنا .... شوف اخرتها فين .. اشرت بصبعها لقصر محمود .. - اخرتها فضل يعيش في قصر مهجور و لا يبقا معانا .. خلتو .. طلعت في الكرهبة و مشات .. في الوقت هذا فتنة كانت في كرهبة مخرجتها بعيد على تونس العاصمة .. تخزر لطريق بعيون ذابلة ... مخها فارغ من كل شي ... # ريما 💋💋وووووه .. البنات فتنة وييين مشات !!! ... شنوا جرا 😲😲!!!حاولو تتوقعو😈 .. و انا نتحداكم اذا تقدرو تتوقعو 💪💪هههههه