فتنة الجزء الثالث

40

الحلقة 132
بعد الخطبة فتنة قعدت عند حفصية  و مودي مطرود مطرود و مايجي و مايقبل فتنة كان برخصة من عند مولات المول يحكي معاها ربع ساعة امام حفصية
مودي يحكي مع فتنة و حفصية  شدتلهم ارؤوسهم
مودي : حفصية  عنا مانحكيو انا و فتنة في اومورنا مل احسن تخلينا وحدنا
حفصية : ايي احكيو احسبني منيش موجودة خوذو راحتكم
مودي : لا مانجموش خاطر ثما مشاهد - 40 بش تصير تو ماهيش متع عجايز
حفصية : انا عجوزة الله لا تباركلك و زيد المشاهد الي تحكي علاها قبل العرس ممنوعة
مودي : باهي خلينا وحدنا
حفصية : علاه بابا بش تهرب بالطفلة
مودي : حرمت علينا شوية اكسيون زادة تي امشي و انت تذكرني بجماعة الحبس الي يبداو شدين العسة و الوقت انتي تحكي كلمتين تي مزلت في المقدمة تي بديت تقول في سلام اشنوة حوالك و هو يقلك وقت الزيارة متاعك اوفا
حفصية : ملا وقت الزيارة متاعك اوفا ايا فتنة أدخل
مودي : جيناهاشي تو مازلت ماحكيت شي ... تي استنا انتي وين ماشية ايجا اهنا مزلت ماكملتش كلامي
فتنة : ظاهرلي اسمعت امي حفصية اش قالت
مودي : تي تفذلك امك حفصية و انتي جدت عليك
حفصية : لا مانيش انفذلك ايا فتنة أدخل و انتي برا روح
مسكين مودي عذبوه كيما حبو ماعادش ينجم يصبر و يحبهم يعملو هل العرس اليوم قبل غدوة ماصبرش علاها دقيقة خلي جمعتين تحضير اش صار فيه مسكين
تعادو هل الجمعتين كي جمر على مودي و فتنة زادة من المعذبون في الارض غير ماتحبش تظهر ماتعرف لحقيقة كان مخدتها شاهدة علاها كل شي حاضر جنينة كبيرة  مزينة طاولة من هنا الغادي كيما تحب فتنة و اكثر مختار الرايس حبها تفرح كي اندادها و اكثر و مانحكيلكمش على فتنة كيفاش طلعت برنسيسة على حالها روب سيران بيضة ماشية مع بدنها محلولة مل القدام حتا لصدرها و اكا محمود بش يترشق معادش فيه مايقاوم  و مايصبر يغزل علاها كي شافها لابسة روبة هكا اما هو الكوستيوم الي لابسها في لاكحل موهرتو كانو شدين يدين بعضهم و دخلين على طابي روج و الناس كل تزغرت الي يراهم يقول عرس مشاهير مشاو دراكت قعدو على الطاولة وين لعدول يستنا فيهم
اااه نسيت ماقلتلكمش ماو مودي مرجهم ماعدش ينجم يصبر قنعهم بش يعملو الصداق و العرس فرد النهار اكهو ماعدش ينجم يصبر و هو عصبانة قديدة غلبهم البارحة عملو الحنة و العشاء ببعضهم مسكينة فتنة بلبز علاها كل شي لكن اليوم اعمللها عرس عالمي خلاها تنسي الي فات
مودي معه نسيبو الماسط و فتنة معها مختار قعدو عل الطاولة بش يكتبو صداقهم في وقت اذاكا ثما عينين تشعل بلحقد اول مشهد شافو اول ماداخلت انو مودي وافق على فتنة نعمللكم شوية كيما المسلسلات الكاميرا كانت مركزة عل عينين الي خارج منها الشر و ماشية و تبعد لين أظهر الوجه وجه مريم مزالت كي دخلت تو بعد ماكتبو صداق مودي هز فتنة و مشاو بش يتصدرو و مريم القات الفرصة في عمها مختار جبدتو من يدو بعدو عل ناس الكل ورا الجنينة
مريم تغزر العمها: انت تستخايل مريم الي ربيتها و عوضتلها حنية البو الي فقدتو نسات فضلك علاها ... خليني نكمل كلامي ماتقطعنيش خاطر يمكن هذا آخر كلام تسمعو مني انا بش نسافر نشوف حياتي نبعد على محمود و ننساه و نخرجو من حياتي لكن قبل ما نسافر حبيت نقلك الطفلة ليتيمة الي تربات في عزك و خيرك و دلالك عمرها مانسات فضلك علاها  وليت نغير من فتنة خاطر فكتلي بابا الي رباني أكثر من غير منها خاطر فكتلي محمود كي شفتك اكا نهار تعانق فاها و هي تبكي تمنيت نكون في بلاصتها انا عمري ما حسيت بليتم كان انهارتها وقت حسيت الي ماعادش عندي بو يحميني يدللني كيما كان وقت انا كنت صغيرة  مانحبش نخسرك و نحبك تسامحني على كل شي خايب اعملتو
كانت تحكي و دموعها على عيناها : نعرف روحي غلط في حق محمود و حق صغاري الي ماتو بسبب التهاون متاعي لكن الي متى بش نقعد نتحاسب على ذنب تعدي عليه سنين هي اكك و تسمع في صوت خشين فيه بحة لين تموت